بيىل 7 ملن. توننا استىق ەكسپورتتالدى

قازاقستان اعىمداعى جىلدىڭ باسىنان بەرى شامامەن 7 ملن. توننا استىقتى ەكسپورتقا شىعاردى. بۇل تۋرالى  قازاقستانداعى استىق نارىعىنىڭ اشىقتىعىن ارتتىرۋ جونىندەگى كونفەرەنتسيادا ەلىمىزدىڭ اۋىل شارۋاشىلىعى ۆيتسە-ءمينيسترى گۇلميرا يساەۆا ءمالىم ەتتى. «اعىمداعى جىلى ءبىز مول ءونىم الىپ, 23,7 ملن. توننا استىق باستىردىق. ونىمدىلىك گەكتارىنا 15,4 تسەنتنەردى قۇرادى. بۇل سوڭعى جىلدارداعى رەكوردتىق ءتۇسىم بولىپ وتىر. وڭدەلگەننەن كەيىنگى تازا سالماقتاعى استىقتىڭ وندىرىلگەن كولەمى 21,7 ملن توننا دەڭگەيىندە بولادى دەپ بولجانۋدا», – دەدى ول. ۆيتسە-ءمينيستردىڭ اتاپ وتۋىنشە, بۇل كولەم ىشكى سۇرانىستى تولىقتاي قاناعاتتاندىرۋمەن قاتار, 9 ملن تونناعا دەيىنگى استىقتى ەكسپورتقا شىعارۋعا دا مۇمكىندىك بەرەدى. «وسى جىلدىڭ باسىنان بەرى 10 قاراشاداعى مالىمەتتەرگە سايكەس استىققا بالاما ۇندى قوسا العاندا, شامامەن 7 ملن. توننا استىق ەكسپورتقا جونەلتىلدى. ال بۇل وتكەن جىلدىڭ سايكەس كەزەڭىمەن سالىستىرعاندا, شامامەن 21 پايىزعا ارتىق. جالپى, قازاقستاندىق استىق پەن ۇن ەكسپورتقا شىعارىلاتىن ءداستۇرلى نارىقتاردىڭ قاتارىندا ورتا ازيا ەلدەرى, اۋعانستان, يران, ازەربايجان مەملەكەتتەرى بار. سونىمەن بىرگە ءبىز سولتۇستىك افريكا, تاياۋ شىعىس, ەۋروپالىق وداق ەلدەرى مەن قىتايعا دا استىق جەتكىزۋ كولەمىن ۇلعايتۋعا نيەتتىمىز», – دەدى يساەۆا.