الماتىدا ءبىر كۇندە 75 كولىك اپاتى بولدى

اۋا رايىنىڭ كۇرت وزگەرۋىنە بايلانىستى الماتى پوليتسياسى ازاماتتاردى جول ۇستىندە اسا مۇقيات بولۋعا شاقىرادى, دەپ حابارلايدى قالالىق ءىىد. «ءبىز بارلىق جۇرگىزۋشىلەر مەن جاياۋ جۇرگىنشىلەردى جالپىعا ورتاق ەرەجەلەردى ساقتاۋعا شاقىرامىز. قازىرگى اۋا رايىندا بۇل اسا ماڭىزدى,  اسىرەسە جۇرگىزۋشىلەر قالا جولدارىندا اسا مۇقيات بولىپ, كولىك قۇرالىن قىس مەزگىلىنە كەشىكتىرمەي دايىنداعانى ءجون. وتكەن تۇننەن بەرى الماتىدا 75 جول-كولىك اپاتى تىركەلدى, 17 ادام ءتۇرلى جاراقات الدى», - دەپ حابارلادى الماتى ءىىد جەرگىلىكتى پوليتسيا قىزمەتىنىڭ باسشىسى, پوليتسيا پودپولكوۆنيگى جاسۇلان بايكەنوۆ. مەكەمە بۇل كۇندەرى قالا اۋماعىندا جول قوزعالىسى قاۋىپسىزدىگى اپتالىعى ءوتىپ جاتقانىن ەسكە سالدى. اتاپ وتكەن ءجون, تۇندە الماتىدا قار جاۋىپ, تاڭەرتەڭ قالا جولدارىنداعى كەپتەلىس ۇلعايدى. الماتى اكىمدىگىنىڭ رەسمي Instagram اككاۋنتى تۇننەن بەرى ۇزدىكسىز ءجۇرىپ جاتقان قار تازالاۋ جۇمىستارىنىڭ ۆيدەولارىن جاريالادى. كوكتايعاقتى بولدىرماۋ ءۇشىن جولدارعا حلوريد قۇمى سەبىلۋدە. كۇنى كەشە قالا بيلىگى قالىڭ قار جاۋادى دەپ ەسكەرتكەن ەدى. ولار تۇرعىندارعا اۋا رايى بولجامىنان ۇنەمى حاباردار بولىپ, جۇمىسقا قوعامدىق كولىكپەن بارۋعا كەڭەس بەردى.