سالىق زاڭناماسىنا وزگەرىس ەنگىزۋ تۋرالى زاڭ جوباسى ماقۇلداندى

بۇگىن قر پارلامەنتى سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە كەدەندىك اكىمشىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا ماقۇلداندى, دەپ حابارلايدى قازاقپارات. زاڭ جوباسىن تانىستىرۋ بارىسىندا قر ۇلتتىق ەكونوميكا ءمينيسترى قۋاندىق بيشىمباەۆ ۇسىنىلىپ وتىرعان وزگەرىستەر قولايلى كاسىپكەرلىك ورتا قۇرۋعا, تۇراقتى الەۋمەتتىك-ەكونوميكالىق دامۋعا جانە اعىمداعى مىندەتتەردى جۇزەگە اسىرۋعا باعىتتالعانىن اتاپ ءوتتى. ماسەلەن, بيزنەسكە سالىقتىق جانە اكىمشىلىك جۇكتەمەنى بولدىرماۋ ماقساتىندا قولدانىستاعى قوسىلعان قۇن سالىعى بويىنشا ەسەپكە قويۋ ءۇشىن ەڭ تومەن شەكتى ءماندى 2017 جىلدى قوسا العاندا 30 مىڭ اەك-كە دەيىن ساقتاۋ قاراستىرىلعان. بۇدان كەيىن 2020 جىلعا قاراي كەزەڭ-كەزەڭمەن 15 مىڭ اەك-كە دەيىن تومەندەتۋ ەسكەرىلگەن. «الكوگول ونىمدەرى مەن تەمەكى زاتتارىنا ارنالعان اكتسيزدەردىڭ فيسكالدىق فۋنكتسيالارىن كۇشەيتۋ ماقساتىندا اكتسيزدەردى كەزەڭ-كەزەڭمەن ارتتىرۋ ۇسىنىلادى», - دەدى مينيستر. جەر قويناۋىن پايدالانۋعا ينۆەستيتسيالاردى ىنتالاندىرۋ ماقساتىندا كوممەرتسيالىق كورىنىس بولماعان جاعدايدا ينۆەستيتسيالىق قارجىلاندىرۋ بويىنشا قارىزداردى ەسەپتەن شىعارۋ كەزىندەگى تابىستى كورپوراتيۆتى تابىس سالىعىنان بوساتۋ قاراستىرىلعان. بۇدان باسقا, ۇلتتىق وپەراتورعا گاز وتكىزەتىن جەر قويناۋىن پايدالانۋشىلارعا سالىق سالۋ پروبلەمالارىن شەشۋ ماقساتىندا گاز ءوندىرۋدىڭ وزىندىك قۇنىنا بايلانىستى ناقتى وتكىزۋ باعاسى بويىنشا كىرىستى ايقىندايتىن نورما ۇسىنىلادى. زاڭ جوباسىندا سالىقتىق اكىمشىلەندىرۋ بويىنشا تۇزەتۋلەر بلوگى ەسكەرىلىپ وتىر. ونىڭ ىشىندە جەكە تۇلعالاردى جالپىعا بىردەي دەكلاراتسيالاۋدى ەنگىزۋ مەرزىمىن ۇزارتۋ, ەلەكتروندى شوت-فاكتۋرالاردى ەنگىزۋ مەرزىمدەرىن ۇزارتۋ, مونيتورينگىلۋگە جاتاتىن ءىرى سالىق تولەۋشىلەر تىزبەسىن قۇرۋ ءتارتىبىن ناقتىلاۋ ۇسىنىلادى.