رەسپۋبليكالىق بيۋدجەت تۋرالى زاڭ جوباسى ماجىلىسكە قايتارىلدى

سەنات دەپۋتاتتارى "2017-2019 جىلدارعا ارنالعان رەسپۋبليكالىق بيۋدجەت تۋرالى" زاڭ جوباسىن پلەنارلىق وتىرىستا قاراستىرىپ, وزدەرىنىڭ تۇزەتۋلەرىمەن ماجىلىسكە قايتاردى, دەپ حابارلادى Today.kz. سەناتتىڭ ءپروفيلدى كوميتەتىنىڭ قورىتىندىسىندا زاڭ جوباسىن تالقىلاۋ بارىسىندا دەپۋتاتتار مەن كوميتەتتەردىڭ ۇسىنىستارىن ەسكەرە وتىرىپ, بەلگىلى ءبىر وزگەرىستەر ەنگىزۋ قاجەتتىلىگى تۋىندادى دەلىنگەن. سەنات تۇزەتۋلەرى شقو, پاۆلودار وبلىستارىنداعى سۋمەن قامتۋعا باعىتتالعان جوبالاردى, پاۆلودار, اتىراۋ, سولتۇستىك قازاقستان وبلىستارىنداعى اۆتوكولىك جولدارىن جوندەۋ, تۇرعىن ءۇي سالۋ, باتىس قازاقستان وبلىسىنىڭ ەلدى مەكەندەرىن گازبەن قامتۋ جوبالارىن قارجىلاندىرۋدى ارتتىرۋدى كوزدەيدى. بۇل جوبالاردى جۇزەگە اسىرۋعا قوسىمشا 2017 جىلى 26,1 ميلليارد  تەڭگە, 2018 جىلى - 16,8 ميلليارد تەڭگە, 2019 جىلى 10,1 ميلليارد تەڭگە ءبولۋ قاراستىرىلعان. سونىمەن قاتار "جۇمىسپەن قامتۋ جول كارتاسى - 2020" باعدارلاماسىنىڭ وزگەرىستەرىنە بايلانىستى بۇقارالىق كاسىپكەرلىك پەن جۇمىسپەن قامتۋعا 113,5 ميلليارد تەڭگە بولىنبەك. زاڭ پروتسەدۋراسىنا سايكەس, بۇل وزگەرىستەردى ەندى ءماجىلىس دەپۋتاتارى قولداۋى كەرەك.