قىزىلوردا وبلىسىندا كەزەكتى VIII وڭىرلىك «بايقوڭىر ينۆەست» ينۆەستيتسيالىق فورۋمى ءوتتى.
فورۋمنىڭ نەگىزگى ماقساتى – ءوڭىر كومپانيالارىنىڭ شەتەلدىك جانە وتاندىق ينۆەستورلارمەن ءوزارا ءتيىمدى ارىپتەستىك ورناتۋىنا, بيزنەس پەن عىلىم سالالارىنىڭ جانە بيلىك وكىلدەرىنىڭ ينۆەستيتسيالىق جوبالاردى جۇزەگە اسىرۋدا, ايماق ەكونوميكاسىن ديۆەرسيفيكاتسيالاۋدا جانە جەتىلدىرۋدە كۇش بىرىكتىرۋىنە مۇمكىندىك تۋعىزۋ بولىپ تابىلادى.
ينۆەستيتسيالىق فورۋمعا قر ينۆەستيتسيالار جانە دامۋ ءبىرىنشى ۆيتسە-ءمينيسترى البەرت راۋ, سونداي-اق, بىرقاتار بيزنەس قاۋىمداستىقتار مەن بىرلەستىكتەردىڭ, بانك سالاسى مەن بارلىق دەڭگەيدەگى مەملەكەتتىك ورگانداردىڭ, ۇلتتىق جانە شەتەلدىك كومپانيالاردىڭ, رەسەي, گەرمانيا, شۆەيتساريا, فرانتسيا, اقش جانە قىتايدىڭ حالىقارالىق قارجى ينستيتۋتتارىنىڭ وكىلدەرى قاتىسۋدا.
سونىمەن قاتار, فورۋمعا ءازىربايجاننىڭ, بەلورۋس مەملەكەتىنىڭ, بەلگيا كورولدىكتەرىنىڭ وكىلدەرى جانە وزبەكستاننىڭ رەسمي دەلەگاتسياسى كەلدى.
وسى رەتتە, فورۋم جۇمىسىنا «قاشاعان» كەن ورنىن يگەرۋ جوباسىنىڭ نەگىزى وپەراتورى «NCOC» كومپانياسىنىڭ دەلەگاتسياسى دا قاتىسقاندىعىن ايتا كەتكەن ورىندى.
كەزەكتى ينۆەستفورۋم اياسىندا «ينۆەستيتسيالىق ىنتىماقتاستىقتىڭ جاڭا مۇمكىندىكتەرى», «ينۆەستورلار ءۇشىن جاڭا كەلەشەك» تاقىرىپتارىندا پلەنارلىق وتىرىستار مەن «اۋىل شارۋاشىلىعى وندىرىستىك كووپەراتسياسى», «B2B كەزدەسۋ فورماتىنداعى حالىقارالىق ىنتىماقتاستىق» باعىتتارى بويىنشا سەكتسيالار جۇمىس جاسادى.
پلەنارلىق وتىرىس بارىسىندا قارجى ينستيتۋتتارى شاعىن جانە ورتا بيزنەستى قارجىلاندىرۋعا ارنالعان جاڭا ۇزاق مەرزىمدى ينسترۋمەنتتەرىن تانىستىردى, سونداي-اق, ەكونوميكانىڭ باسىمدىققا يە سالالارىنداعى ءوزارا ىنتىماقتاستىق ماسەلەلەرى تالقىلاندى.
جەرگىلىكتى كاسىپكەرلەردىڭ فورۋمعا قاتىسۋشى 11 ەلدىڭ وكىلدەرىمەن B2B كەزدەسۋلەرى وتكىزىلدى.
فورۋم قورىتىندىسىمەن 10-نان اسا مەموراندۋمدار مەن كەلىسىمدەرگە قول قويىلدى.
