قازاقستاندىق رەجيسسەر اقان ساتاەۆ "ونا" اتتى جاڭا ءفيلمىنىڭ جۇمىسىن باستاپ كەتتى, - دەپ حابارلايدى Tengrinews.kz.
پسيحولوگيالىق تريللەردىڭ باستى رولىندە ايسۇلۋ ازىمباەۆا وينايدى ("پرەپود", "دجوكەر"). سونىمەن قاتار, وسى ءفيلمنىڭ يدەياسى دا وعان تيەسىلى.
"مەن ايسۇلۋ ازىمباەۆانى "كوڭىلدەس ايەل" قويىلىمىندا كورگەنمىن. ول وندا باستى رولدە وينادى. سپەكتاكلدەن كەيىن ءبىز سويلەسىپ, جاڭا ءبىر كارتينا تۇسىرەتىن بولىپ كەلىستىك. ايسۇلۋ ناعىز ءارتىس. ول بىزگە ءفيلمنىڭ يدەياسىن ايتىپ بەردى. سوسىن بىزگە تيمۋر جاقسىلىقوۆ قوسىلدى. بۇل ءبىزدىڭ ورتاق ويىمىز. مىنە, ءبىر جىل وتكەن ۋاقىتتا ءبىز جاڭا "ونا" ءفيلمىنىڭ ءوندىرىسىن باستادىق. بۇل پسيحولوگيالىق تريللەر. مەن بۇل جانردى جاقسى كورەمىن. ءبىز بۇرىندارى وسى جانردا اندرەي مەرزليكيننىڭ قاتىسۋىمەن "اداسقاندار" ءفيلمىن تۇسىرگەنبىز", - دەدى اقان ساتاەۆ.
تۇسىرىلىمدەر 2016 جىلى 5 قاراشادا باستالىپ, 29 قاراشاعا دەيىن الماتىدا وتەدى. كارتينا 2017 جىلى كوكتەمدە شىعادى دەپ جوسپارلانعان.
