استانادا جاڭا كىتاپتىڭ تۇساۋى كەسىلەدى

19 قاراشادا استانا قالاسىناداعى بالالار كىتاپحاناسىندا بەلگىلى قالامگەر, جازۋشى, قازاقستان جازۋشىلار وداعىنىڭ مۇشەسى جانبولات باشاردىڭ «قابىر ۇستىندەگى زۇلمات» دەپ اتالاتىن جاڭا كىتابىنىڭ تۇساۋكەسەرى وتەدى. وعان قر مەملەكەتتىك سىيلىعىنىڭ يەگەرى, اقىن نەسىپبەك ايت ۇلى, ەۋرازيا ۇلتتىق ۋنيۆەرسيەتىنىڭ پروفەسسورى, بەلگىلى عالىم سەرىك نەگيموۆ, استانا قالاسى اكىمدىگىنىڭ ءتىل باسقارماسىنىڭ توراعاسى تىلەۋعالي قىشقاشباەۆ, حالىقارالىق «الاش» ادەبي سىيلىعىنىڭ يەگەرى, اقىن ابزال بوكەن, مادەنيەت قايراتكەرى, جازۋشى قايىربەك سادۋاقاسوۆ, جازۋشى, ادەبيەتتانۋشى, «دارىن» مەملەكەتتىك جاستار سىيلىعىنىڭ يەگەرى ايگۇل كەمەلباەۆا, تولەگەن ايبەرگەنوۆ اتىنداعى سىيلىقتىڭ يەگەرى, اقىن ءىلياس مۇقاي جانە  باسقا دا قالامگەرلەر مەن باق وكىلدەرى قاتىسادى. جانبولات باشاردىڭ سوڭعى ۋاقىتتاردا جازعان «قابىر ۇستىندەگى زۇلمات» اتتى ادەبي شىعارماسىندا, وتىزىنشى جىلدارى قازاق حالقىنىڭ باسىنا تونگەن قۋعىن-سۇرگىن مەن اشارشىلىق قۇرباندارىنىڭ جانتوزگىسىز ازابى, زۇلمات جىلدارداعى حالىقتىڭ قايعى-قاسىرەتى سۋرەتتەلگەن. شىعارما وزەگى - قاراعاندى وبلىسىنىڭ اقتوعاي اۋدانى ايماعىندا, ەل ىشىندە «ۋىق كوتەرىلىسى» دەپ اتالىپ كەتكەن توقىراۋىن كوتەرىلىسى. بۇل تۋرالى كەزىندە ەشتەڭە جازىلمادى, ايتىلمادى. اۆتور سول ءبىر زۇلمات جىلداردى شىعارما وزەگىنە اينالدىرىپ, ەلدىڭ ەڭسەسىن ەزگەن ساياسي وزبىرلىققا قارسىلىق جاساعان جابايدىڭ سادۋاقاسى سىندى ەل ازاماتتارىنىڭ اقىرىپ اتقا قونۋىن, ەل باسىنا تۇسكەن اشتىق ناۋبەتىنىڭ جانتوزگىسىز قاسىرەتى شىنايى سۋرەتتەگەن. سونىمەن بىرگە, كىتاپقا جازۋشىنىڭ «پەرى مەن پەرىشتە, «ايعانا», «اڭشىنىڭ اجالى», «ۇرەي», «سوعىستان قالعان سىز» تاعى باسقا بۇگىنگى كۇننىڭ ءومىر ورنەگىن قاۋزايتىن  جاڭا تۋىندىلارى ەنگەن.