قازاقستان رەسپۋبليكاسى ۇكىمەتىنىڭ قاۋلىسى  №685 

  2016 جىلعى 9 قاراشا  استانا, ۇكىمەت ءۇيى تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپارات ءۇشىن سىياقى بەلگىلەۋ جانە تولەۋ قاعيدالارىن بەكىتۋ تۋرالى «تەرروريزمگە قارسى ءىس-قيمىل تۋرالى» 1999 جىلعى 13 شىلدەدەگى قازاقستان رەسپۋبليكاسىنىڭ زاڭى 9-بابىنىڭ 3-تارماعىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى: 1. قوسا بەرىلىپ وتىرعان تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپارات ءۇشىن سىياقى بەلگىلەۋ جانە تولەۋ قاعيدالارى بەكىتىلسىن. 2. وسى قاۋلى 2017 جىلعى 1 قاڭتاردان باستاپ قولدانىسقا ەنگىزىلەدى جانە رەسمي جاريالانۋعا ءتيىس. قازاقستان رەسپۋبليكاسىنىڭ پرەمەر-ءمينيسترى ب.ساعىنتاەۆ قازاقستان رەسپۋبليكاسى ۇكىمەتىنىڭ 2016 جىلعى 9 قاراشاداعى №685 قاۋلىسىمەن بەكىتىلگەن تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپارات ءۇشىن سىياقى بەلگىلەۋ جانە تولەۋ قاعيدالارى 1. جالپى ەرەجەلەر 1. وسى تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپارات ءۇشىن سىياقى بەلگىلەۋ جانە تولەۋ قاعيدالارى (بۇدان ءارى – قاعيدالار «تەرروريزمگە قارسى ءىس-قيمىل تۋرالى» 1999 جىلعى 13 شىلدەدەگى قازاقستان رەسپۋبليكاسىنىڭ زاڭى 9-بابىنىڭ 3تارماعىنا سايكەس ازىرلەندى جانە تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپارات ءۇشىن سىياقى بەلگىلەۋ جانە تولەۋ ءتارتىبىن ايقىندايدى. 2. سىياقى تولەۋ وسى ماقساتقا تەرروريزمگە قارسى ءىس-قيمىل سالاسىنداعى قىزمەتتى ۇيلەستىرۋ جونىندەگى ۋاكىلەتتى مەملەكەتتىك ورگانعا (بۇدان ءارى – ۋاكىلەتتى ورگان) ءتيىستى قارجى جىلىنا كوزدەلگەن بيۋدجەت قاراجاتى ەسەبىنەن جۇرگىزىلەدى. 2. تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپارات ءۇشىن سىياقى بەلگىلەۋ جانە تولەۋ ءتارتىبى 3. تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامدارعا ۋاكىلەتتى ورگان سىياقى تولەيدى. سىياقى ءبىر رەت تولەنەدى جانە مىناداي تارتىپپەن بەلگىلەنەدى: 1) 2014 جىلعى 3 شىلدەدەگى قازاقستان رەسپۋبليكاسىنىڭ قىلمىستىق كودەكسى (بۇدان ءارى – قك) 255-بابىنىڭ ءبىرىنشى جانە ەكىنشى بولىكتەرىندە كوزدەلگەن تەرروريزم اكتىسى تۋرالى قىلمىستىق ىستەر بويىنشا – 750 (جەتى ءجۇز ەلۋ) ايلىق ەسەپتىك كورسەتكىش (بۇدان ءارى – اەك); 2) قك 255-بابىنىڭ ءۇشىنشى جانە ءتورتىنشى بولىكتەرىندە كوزدەلگەن تەرروريزم اكتىسى تۋرالى قىلمىستىق ىستەر بويىنشا – 1000 ء(بىر مىڭ) اەك. تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادام سىياقىدان باس تارتقان جاعدايدا, ۋاكىلەتتى ورگاننىڭ اۋماقتىق ورگانىنا (بۇدان ءارى – اۋماقتىق ورگان) ءتيىستى ءوتىنىش بەرەدى. 4. تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامعا سىياقى بەرۋ, ەگەر ايىپتى ادامعا قاتىستى: 1) 2014 جىلعى 4 شىلدەدەگى قازاقستان رەسپۋبليكاسى قىلمىستىق-پروتسەستىك كودەكسىنىڭ (بۇدان ءارى – قپك) 521-بابىنا سايكەس مەديتسينالىق سيپاتتاعى ماجبۇرلەۋ شاراسىن قولدانۋ تۋرالى سوت قاۋلىسى نەمەسە ايىپتاۋ ۇكىمى زاڭدى كۇشىنە ەنگەن; 2) قپك 35-بابى ءبىرىنشى بولىگىنىڭ 9), 11) جانە 12) تارماقشالارىندا كوزدەلگەن نەگىزدەر بويىنشا قىلمىستىق ءىستى توقتاتۋ تۋرالى قاۋلى شىققان جاعدايدا تولەنەدى. 5. اۋماقتىق ورگان تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامعا سىياقى الۋ قۇقىعى تۋىنداعانى تۋرالى ءۇش جۇمىس كۇنى ىشىندە حابارلايدى. تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادام تۇرعىلىقتى جەرى بويىنشا اۋماقتىق ورگانعا وسى قاعيدالاردىڭ 6-تارماعىنىڭ 2), 4) جانە 5) تارماقشالارىندا كورسەتىلگەن قۇجاتتاردى ۇسىنادى. 6. اۋماقتىق ورگان وسى قاعيدالاردىڭ 4-تارماعىنا سايكەس سىياقى الۋ قۇقىعى تۋىنداعان كۇننەن باستاپ ون جۇمىس كۇنى ىشىندە مىناداي قۇجاتتاردى قالىپتاستىرادى جانە ۋاكىلەتتى ورگاننىڭ توراعاسى ايقىندالعان ۋاكىلەتتى ورگاننىڭ قۇرىلىمدىق بولىمشەسىنە (بۇدان ءارى – ۋاكىلەتتى بولىمشە جىبەرەدى: 1) اۋماقتىق ورگاننىڭ قولداۋحاتى; 2) حابارلاما تالونى تۇبىرتەگىنىڭ كوشىرمەسى; 3) زاڭدى كۇشىنە ەنگەن ايىپتاۋ ۇكىمى نەمەسە مەديتسينالىق سيپاتتاعى ماجبۇرلەۋ شاراسىن قولدانۋ تۋرالى سوت قاۋلىسىنىڭ كوشىرمەسى نە قپك 35-بابى ءبىرىنشى بولىگىنىڭ 9), 11) جانە 12) تارماقشالارىندا كوزدەلگەن نەگىزدەر بويىنشا قىلمىستىق ءىستى توقتاتۋ تۋرالى قاۋلىنىڭ كوشىرمەسى; 4) تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامنىڭ جەكە سايكەستەندىرۋ ءنومىرىن كورسەتە وتىرىپ, جەكە باسىن كۋالاندىراتىن قۇجاتىنىڭ كوشىرمەسى; 5) تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامنىڭ اعىمداعى بانكتىك شوتى كورسەتىلگەن ەكىنشى دەڭگەيدەگى بانك انىقتاماسىنىڭ تۇپنۇسقاسى. ادامنىڭ اعىمداعى بانكتىك شوتى بولماعان جاعدايدا, ءوزى كەز كەلگەن ەكىنشى دەڭگەيدەگى بانكتە اعىمداعى بانكتىك شوتىن اشادى. 7. ۋاكىلەتتى بولىمشە بارلىق قاجەتتى قۇجاتتار كەلىپ تۇسكەن كۇننەن باستاپ ون جۇمىس كۇنى ىشىندە ولاردىڭ تولىقتىعى مەن دۇرىستىعىن تەكسەرەدى جانە تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامعا سىياقى تولەۋ تۋرالى ۋاكىلەتتى ورگان بۇيرىعىنىڭ جوباسىن دايىندايدى. تەكسەرۋ پروتسەسىندە قۇجاتتاردى رەسىمدەۋدە كەمشىلىكتەر مەن دالسىزدىكتەر انىقتالعان كەزدە ۋاكىلەتتى بولىمشە وسى قاعيدالاردىڭ 6-تارماعىندا كورسەتىلگەن قۇجاتتاردى قاتەلىكتەردى جويۋ جانە ونىمەن ءبىر مەزگىلدە تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامعا سىياقى تولەۋدى كەشىكتىرۋ سەبەپتەرى مەن مەرزىمدەرى تۋرالى حابارلاۋ ءۇشىن اۋماقتىق ورگانعا قايتارادى. اۋماقتىق ورگان كەمشىلىكتەر مەن دالسىزدىكتەر جويىلعاننان كەيىن ون كۇن ىشىندە وسى قاعيدالاردىڭ 6-تارماعىندا كورسەتىلگەن قۇجاتتاردى ۋاكىلەتتى بولىمشەگە قايتا جولدايدى. 8. ۋاكىلەتتى ورگاننىڭ سىياقى تولەۋ تۋرالى بۇيرىعى شىعارىلعاننان كەيىن اۋماقتىق ورگان سىياقى تولەۋ تۋرالى بۇيرىق شىققان كۇننەن باستاپ الپىس كۇنتىزبەلىك كۇن ىشىندە تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامعا قازىناشىلىقتىڭ اۋماقتىق بولىمشەلەرى ارقىلى ونىڭ ەكىنشى دەڭگەيدەگى بانكتەگى اعىمداعى بانكتىك شوتىنا سىياقىنى تولەۋدى جۇزەگە اسىرادى. 9. اۋماقتىق ورگان تەرروريزم اكتىسىن بولعىزباۋعا نەمەسە جولىن كەسۋگە كومەكتەسكەن اقپاراتتى حابارلاعان ادامعا زاڭنامادا بەلگىلەنگەن تارتىپپەن ونىڭ ەكىنشى دەڭگەيدەگى بانكتەگى اعىمداعى بانكتىك شوتىنا اقشالاي قاراجاتتىڭ اۋدارىلعانى تۋرالى ءۇش كۇن ىشىندە مالىمدەيدى.