قىزىلوردادا قوعام قايراتكەرى, پروفەسسور ابىلاي ايدوسوۆتىڭ 80 جىلدىعىنا ارنالعان شارالار ءوتتى. قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە ابىلاي ايدوسوۆ اتىنداعى اۋديتوريا اشىلدى. قالا كوشەلەرىنىڭ بىرىنە عالىمنىڭ اتى بەرىلدى. سونداي-اق, ۋنيۆەرسيتەت قابىرعاسىندا ايدوسوۆتىڭ ءومىرى مەن شىعارماشىلىعىنا ارنالعان عىلىمي-تاجىريبەلىك كونفەرەنتسيا ءوتتى.
وبلىس اكىمى قىرىمبەك كوشەرباەۆ كونفەرەنتسيادا ءسوز سويلەپ, ابىلاي ايدوسوۆتىڭ ايماق دامۋىنا قوسقان ۇلەسى تۋرالى ايتتى.
- ابىلاي حانگەرەي ۇلى «جاقاەۆشىلار» قوزعالىسىنىڭ مارتەبەسىن كوتەرە بىلگەن مىقتى يدەولوگ بولدى. ونىڭ قاتارىنا تەك قانا گەكتارىنا 40 تسەنتنەردەن جوعارى كۇرىش ءونىمىن العاندار قوسىلدى. ابىلاي ايدوسوۆ ارال تەڭىزىنىڭ ەكولوگيالىق جانە الەۋمەتتىك جاعدايىنىڭ زەرتتەلۋىن الەمدىك دەڭگەيگە كوتەردى. ونىڭ ۇسىنىسى بويىنشا 2004 جىلى شىلدەدە «ارال ءوڭىرى ەكولوگياسىن الەۋمەتتىك زەرتتەۋ» ورتالىعى قۇرىلدى,- دەدى وبلىس اكىمى.
كونفەرەنتسيا بارىسىندا ايدوسوۆتىڭ ارىپتەستەرى, دوستارى جانە شاكىرتتەرى عالىمنىڭ ەڭبەك جولى مەن وتانىنا دەگەن ماحابباتى, قاراپايىمدىلىعى تۋراسىنداعى ەستەلىكتەرىمەن ءبولىستى. سونداي-اق عالىمنىڭ ءومىرى مەن شىعارماشىلىعى تۋرالى دەرەكتى فيلم كورسەتىلدى.
