قازىرگى زامان قاھارماندارىنا قۇرمەت

وبلىس ورتالىعى مەن اقسۋ قالاسىندا «قازىرگى زامان قاھارماندارى» رەسپۋبليكالىق شاراسىنا قاتىسۋشىلارمەن كەزدەسۋ ءوتتى. بۇل شارا قىلمىسكەرلەرمەن كۇرەس كەزىندە قازا تاپقان ىشكى ىستەر سالاسىنىڭ قىزمەتكەرى, حالىق قاھارمانى, پوليتسيا كاپيتانى عازيز بايتاسوۆتىڭ قۇرمەتىنە ارنالدى. – ىشكى ىستەر ءمينيسترى قالمۇحانبەت قاسىموۆتىڭ ارنايى تاپسىرماسىمەن «قازىرگى زامان قاھارماندارى» اتتى شارا وتۋدە. ياعني, بۇل يگى ءىس پاتريوتتىق تاربيە, ىشكى ىستەر ورگاندارىنىڭ بەدەلىن كوتەرىپ, حالىقتىڭ ولارعا دەگەن سەنىمىن ارتتىرۋعا باعىتتالدى. ال مۇنىڭ باس­تاۋى 2013 جىلى عازيز بايتاسوۆتىڭ تۋ­عان جەرى – جامبىل وبلىسىندا وتسە, 2015 جىلى قىزىلوردا وبلىسىندا ۇيىمداستىرىلعان ەدى. بيىلعى جىلى جالعاسىن پاۆلودار وڭىرىندە تاپتى, – دەيدى مينيسترلىكتىڭ كادر جۇمىسى دەپارتامەنتى باسشىسىنىڭ ورىنباسارى, پوليتسيا پولكوۆنيگى رۋسلان قۇرىمباەۆ. وتكەن جىلدارى ەلىمىزدە كەۋدەسىن وق پەن وتقا توسقان 763 پوليتسيا قىزمەتكەرى قازا تاۋىپتى. ال ۇلتتىق ۇلان مەن ىشكى ىستەر ءبولىمىنىڭ 1093 قىزمەتكەرى مەم­لەكەتتىك دارەجەدە ماراپاتتالعان. وكى­نىشكە قاراي, ولاردىڭ 115-ىنە قازا تاپقان سوڭ ماراپات بەرىلدى. بۇل ءتىزىمنىڭ ىشىندە پاۆلودارلىق پوليتسەيلەر دە بار. ولار ءوز ومىرلەرىن قيىپ, كوپ­تەگەن تۇرعىندارعا تونگەن قاۋىپتى سەيىلتتى. سوندىقتان, سولتۇستىكتەگى وبلىس ورتالىعىنا ەلىمىزدىڭ ءار وڭىرىنەن جينالعان بۇگىنگى كۇننىڭ باتىرلارىن جۇرتشىلىق ماقتانىشپەن قارسى الىپ, قۇرمەت كورسەتتى. پوليتسەيلەردىڭ ءبىرى قاۋىپتى قىل­مىس­كەر­دى اۋىزدىقتاسا, ءبىرى سۋعا سەكىرگەن ادامدى, ەندى ءبىرى وتتا قالعان سابيلەردى قۇتقاردى. ولار – وڭتۇستىك قازاقستان وبلىسىنان بەكسۇلتان كەڭەسوۆ, ءسابيتجان ايازحانوۆ, جامبىل وبلىسىنان دانيار زاۋىربەك, الماتى وبلىسىنان ماقسات اليەۆ, سەرىكبەك الپىسبەكوۆ, قاراعاندى وبلىسىنان داۋرەن التاەۆ, قوستاناي وبلىسىنان ەرلان تاڭجارىقوۆ, قىزىلوردا وبلىسىنان نۇرلىبەك نۇرتاەۆ, شىعىس قازاقستان وبلىسىنان تىلەك شاياحمەتوۆ پەن ەرلىك كوكاشەۆ, الماتى قالاسىنان نۇرسۇلتان قارتباەۆ, استانا قالاسىنان ءومىرجان تەمىربەكوۆ, پاۆلودار وبلىسىنان امان اۋباكىروۆ, قوسىمباي نۇرجاۋار جانە سىرىم سۇندەتوۆ سىندى ازاماتتار. تاعزىم ەتىپ, ەسكە الۋ كەشى الماتى قالاسىنىڭ ىشكى ىستەر دەپارتامەنتى ءانسامبلىنىڭ ونەر كورسەتۋىمەن اياقتالدى. فاريدا بىقاي, «ەگەمەن قازاقستان» پاۆلودار وبلىسى