امەريكالىق زەرتتەۋشى عالىم, ەنەرگەتيكا, حالىقارالىق ساياسات جانە ەكونوميكا سالاسىنداعى تانىمال قايراتكەر, جازۋشى, پۋليتتسەر سىيلىعىنىڭ لاۋرەاتى دەنيەل ەرگيننىڭ «TheQuest» دەپ اتالاتىن كىتابى قازاق تىلىندە جارىققا شىقتى. بۇل د.ەرگيننىڭ قازاق تىلىنە اۋدارىلعان ەكىنشى كىتابى. بۇعان دەيىن, ناقتى ايتقاندا, 2013 جىلى ونىڭ «ThePrize» كىتابى «قازىنا. مۇناي, اقشا, بيلىك ءۇشىن كۇرەستىڭ بۇكىلالەمدىك تاريحى» دەگەن اتاۋمەن اۋدارىلعان بولاتىن. اۆتوردىڭ وسى «ThePrize» كىتابى پۋليتسەر سىيلىعىنا يە بولعان. ال بۇگىن تانىستىرىلىمى وتكەن «ەنەرگيا كوزدەرىن ىزدەستىرۋ جولىندا رەسۋرستار شايقاسى, جاڭا تەحنولوگيالار جانە ەنەرگەتيكا بولاشاعى» دەپ اتالعان ەڭبەگى وسى كىتاپتىڭ جالعاسى.
اۆتوردىڭ ايتۋىنا قاراعاندا, بۇل ەڭبەك 5 جىلدىڭ زەرتتەۋلەردىڭ نەگىزىندە جازىلعان. وندا قازىرگى ەنەرگەتيكالىق الەم مەن ونىڭ بولاشاقتى قۇرىلىمداۋعا قاتىستى ديناميكاسىنىڭ تولىق تالداۋى كورسەتىلگەن.
«مەن ءۇشىن بۇل كىتاپتى قازاق ءتىلدى وقىرمانعا ۇسىنۋ اسا ماڭىزدى. بۇل گەوساياسات, قاۋىپسىزدىك, تەحنولوگيا, يننوۆاتسيالار مەن مۇناي لاندشافتىنداعى ەنەرگەتيكالىق كۇشتەردىڭ سوڭعى جيىرما جىلداعى زەرتتەۋى», - دەيدى د.ەرگين.
كىتاپتى قازاق تىلىنە اۋدارۋعا «استانا» حالىقارالىق قارجى ورتالىعى قولداۋ كورسەتكەن. جالپى رەداكتسياسىن قايرات كەلىمبەتوۆ باسقارعان.
«استانا» حالىقارالىق قارجى ورتالىعى باسقارۋشىسى ق.كەلىمبەتوۆتىڭ ايتۋىنشا, بۇل مۇناي يندۋسترياسىنىڭ تاريحى, ال د.ەرگين ەنەرگەتيكا جانە حالىقارالىق ساياسات پەن ەكونوميكاداعى بەدەلدى ساراپشى رەتىندە اسا ماڭىزدى دەرەكتەرمەن بولىسەدى.
«ءبىزدىڭ وقىرماندارىمىز ءۇشىن كىتاپ اسا قۇندى, سەبەبى قازاقستان مۇناي ءوندىرۋشى ەل رەتىندە 100 جىلدان استام تاريحقا يە. سوندىقتان رەسۋرستاردى ءتيىمدى پايدالانۋ العىشارتتارىن جاقسىلاپ ءتۇيسىنۋ كەرەك», دەدى ق.كەلىمبەتوۆ.
ونىڭ ايتۋىنشا, بۇل كىتاپ ەنەرگەتيكالىق نارىقتاعى قازىرگى احۋالدى وزگەرتەتىن جاڭا ەنەرگيا كوزىن تابۋعا اسەر ەتەتىن «قيراتۋشى تەحنولوگيانىڭ» پايدا بولۋ مۇمكىندىگىمەن دە قىزىقتى. وسىلايشا قازاق ءتىلدى كىتاپ قورى وقىرمانىن قۋانتىپ, سيرەكتەۋ كەزدەسەتىن ەكونوميكالىق تاقىرىپتاعى تاعى ءبىر ەڭبەكپەن تولىقتى.
دينارا بىتىكوۆا,
"ەگەمەن قازاقستان".
