رەسەيدە امان تولەەۆتىڭ تاعدىرى شەشىلىپ جاتىر

14 قاراشا كۇنى رەسەيدىڭ تەرگەۋ كوميتەتى كەمەر وبلىسىنىڭ گۋبەرناتورى امان تولەەۆتىڭ ورىنباسارلارى الەكسەي يۆانوۆ پەن الەكسانر دانيلچەنكوعا, سونىمەن قاتار بىرنەشە قىزمەتكەرلەرىنە قارسى قىلمىستىق ءىس قوزعادى. ولار 1 ميلليارد رۋبلگە باعالانىپ وتىرعان «رازرەز «ينسكي» كاسىپورنىنىڭ اكتسيالارىن بوپسالادى دەپ ايىپتالىپ وتىر. بىراق گۋبەرناتور "ەكى ورىنباسارىم ۇستالدى. دانيلچەنكو, يۆانوۆ پەن ترويتسكايا ەشكىمگە كەرەك ەمەس. ولارعا كەرەگى مەنمىن. مەن بۇنى 2 جىلدان بەرى سەزىپ ءجۇرمىن. قاتتى تالاس ءجۇرىپ جاتىر», دەدى. سونىمەن قاتار ول ءوزىنىڭ ورىنباسارلارىنا جالا جابىلعاندىقتان,  ولاردى قىزمەتتەرىنەن بوساتپايتىنىن ايتتى. بۇل ىسكە ول كۋاگەر رەتىندە قاتىسۋدا. بىراق ساراپشىلار تولەەۆ تە ورنىنان كەتۋى مۇمكىن دەپ بولجاپ وتىر. امان تولەەۆ – رەسەيدە بيلىكتە ەڭ ۇزاق وتىرعان گۋبەرناتور. 1997 جانە 2001 جىلدارى ول اشىق سايلاۋدا جەڭىسكە جەتسە, ودان كەيىنگى مەرزىمدەرگە ونى مەملەكەت باسشىسى تاعايىنداعان بولاتىن. تولەەۆ 1991, 1996, 2000 جىلدارى 3 رەت پرەزيدەنتتىككە دە ۇمىتكەر بولدى. بىرنەشە رەت پارتيا اۋىستىردى. 2015 جىلى گۋبەرناتورلىق مەرزىمى بىتكەن كەزدە ساراپشىلار ونى زەينەتكە شىعادى دەپ بولجادى. الايدا, امان تولەەۆ تاعى دا سايلاۋعا ءتۇسىپ, 96,7 پايىز داۋىسپەن جەڭىسكە جەتتى. ەندى مىنا وقيعادان كەيىن كوپتەگەن ساراپشىلار ول گۋبەرناتورلىق قىزمەتتى بوساتادى دەگەن سەنىمدە. ال «ساياسي ساراپشىلار توبىنىڭ» جەتەكشىسى كونستانتين كالاچەۆتىڭ ايتۋىنشا, شاحتاعا قاتىستى داۋ ايماق باسشىسىن اۋىستىرۋعا ەش اسەر ەتپەيدى. «تولەەۆتى فەدەرالدى باسشىلىق وڭىردە تۇراقتىلىق پەن ءتارتىپ ورناتقانى ءۇشىن باعالايدى» دەدى ول. ساراپشىلار بۇل قىلمىستىق ءىس وبلىستاعى ىقپالدى توپتاردىڭ اراسىنداعى تولەەۆ مۇراسى ءۇشىن كۇرەس بولۋى مۇمكىن ەكەنىن دە جوققا شىعارمايدى.  "تولەەۆ - كەمەر وبلىسىنىڭ باسشىلىق سيمۆولى. ول بولماسا, بۇل تۇراقتىلىقتى ساقتاپ قالۋ قيىن", - دەيدى الەكساندر كىنەۆ. سونىمەن قاتار ساياساتتانۋشىنىڭ ايتۋىنشا, قازىر بۇكىل رەسەي بويىنشا جەرگىلىكتى مينيسترلەر مەن ۆيتسە-گۋبەرناتورلارعا قاتىستى قىلمىستىق ىستەر قوزعالىپ جاتىر. وسى رەتتە كىنەۆ "كەمەر وبلىسىنىڭ ۋاقىتى جەتكەن بولار", دەپ بولجادى. ال ولگا كرىشتانوۆسكايا "قىلمىستىق ىستە گۋبەرناتور تەك كۋاگەر رەتىندە قاتىسادى. بىراق بۇل شۋ ونىڭ ۇستانىمدارىنا اسەر ەتىپ, ەڭ بىرىنشىدەن, فەدەرالدى ورتالىق اتقارىپ وتىرعان سىبايلاس جەمقورلىققا قارسى ساياسات ءۇشىن تولەەۆ ورنىنان كەتۋى مۇمكىن" دەيدى. ونىڭ ويىنشا, پرەزيدەنت پۋتين تولەەۆكە جاقسى كوزقاراستا بولعاندىقتان گۋبەرناتوردىڭ ساياسي تاعدىرى تۋرالى شەشىم جاقىن ارادا قابىلدانبايدى.