قازاقستان ەلەكترمەن قامتۋ بويىنشا رەيتينگتە جوعارى كوتەرىلدى

دۇنيەجۇزىلىك بانكتىڭ «Doing Business» رەيتينگىندە "ەلەكترمەن قامتۋ جۇيەسىنە قوسىلۋ" ينديكاتورى بويىنشا قازاقستان 27 ساتى كوتەرىلدى, دەپ حابارلايدى قازاقستان رەسپۋبليكاسىنىڭ ەنەرگەتيكا مينيسترلىگىنىڭ ءباسپاسوز قىزمەتى.   «ەلەكترمەن جابدىقتاۋ جۇيەسىنە قوسىلۋ» ينديكاتورى بويىنشا قازاقستان وتكەن جىلعى 102-ءشى ورىننان وسى جىلى رەيتينگتە 75-ءشى ورىنعا سەكىرىس جاسادى, ياعني بىردەن 27 ساتىعا كوتەرىلدى. وسى كورسەتكىش بويىنشا قازاقستان ءازىربايجان – 105-ءشى ورىن, قىرعىزستان – 163-ءشى ورىن, ۋكراينا – 130-شى ورىن سياقتى تمد ەلدەرىن باسىپ وزدى. رەسەي مەن بەلورۋس بۇل رەيتينگتە تيىسىنشە 30-شى جانە 24-ءشى ورىن الدى. باياندامادا 2015 جىلعى 2 ماۋسىمنان باستاپ 2016 جىلعى 1 ماۋسىمعا دەيىنگى كەزەڭدە جۇرگىزىلگەن رەفورمالار ەسەپكە الىنعان. وسى ۋاقىت ارالىعىندا ەلەكترمەن جابدىقتاۋ جۇيەسىنە قوسىلۋ بويىنشا قازاقستاندىق بيزنەس ءۇشىن جاعدايدى جاقسارتاتىن ماڭىزدى رەفورمالاردى جۇزەگە اسىردى. وسى كەزەڭدە قازاقستاننىڭ زاڭدارىنا بىرقاتار وزگەرىستەر مەن تولىقتىرۋلار كۇشىنە ەندى. اتاپ ايتقاندا, بەلگىلەنگەن قۋاتى 200 كۆت دەيىنگى ەلەكتر قوندىرعىلارى بار تۇتىنۋشىلار ءۇشىن ەلەكترمەن جابدىقتاۋ جەلىلەرىنە قوسىلۋ ءۇشىن تەحنيكالىق شارتتاردى بەرۋ مەرزىمى 14 كۇننەن 5 كۇنگە دەيىن قىسقارتىلدى. ەنەرگيا بەرۋشى ۇيىمدارمەن تۇتىنۋشىلاردىڭ جوبالىق شەشىمدەرىن كەلىسۋ مەرزىمى 20 كۇننەن 3 كۇنگە دەيىن ازايتىلدى. قۇرىلىس-مونتاج جۇمىستارىنا رۇقسات الۋ قاجەتتىگى الىنىپ تاستالدى. ەندى جوبالاۋشىعا مەملەكەتتىك ساۋلەت قۇرىلىس باقىلاۋ باسقارماسىنا جۇمىستىڭ باستالۋى تۋرالى حابارلامانى ەلەكتروندىق تۇردە جىبەرۋ جەتكىلىكتى. بۇدان باسقا, مەملەكەتتىك ەنەرگەتيكالىق قاداعالاۋ جانە باقىلاۋ ورگانىنان ەلەكتر جەلىلەرىنە قوسىلۋعا رۇقسات الۋدىڭ قاجەتتىلىگى جويىلدى.  ەلەكترمەن جابدىقتاۋشى ۇيىممەن ەلەكتر جابدىقتاۋعا شارت جاساسۋدىڭ ءبىر اپتالىق مەرزىمى ءۇش كۇنگە دەيىن قىسقارتىلدى. ەلەكترمەن جابدىقتاۋدىڭ سەنىمدىلىك كورسەتكىشىنىڭ بەكىتىلگەن ءمانىن ساقتاماعانى ءۇشىن  ەنەرگيا بەرۋشى ۇيىمداردىڭ باسشىلارىنا اكىمشىلىك ايىپپۇلدى ەنگىزۋ دە تاعى ءبىر جاڭالىق بولدى. Doing Business حالىقارالىق رەيتينگىسىندە قازاقستان رەسەي, بەلگيا, يتاليا, گرەكيا جانە ليۋكسەمبۋرگ سياقتى مەملەكەتتەردىڭ الدىنا شىعىپ, جاپونيا مەن رۋمىنيانىڭ اراسىنا ورنالاستى.