ەلىمىزدە 2 ملن ادام تەگىن ءدارى-دارمەك الادى

استانادا 13-ءشى «AstanaZdorovie-2016» حالىقارالىق كورمەسى ءوتىپ جاتىر. كورمەگە الەمنىڭ 11 مەملەكەتىنىڭ ءىرى كومپانيالارى شىعارعان مەديتسينالىق جابدىقتار كويىلدى, دەپ حابارلايدى Baq.kz. قاراشانىڭ 3-5 ارالىعىندا وتەتىن كورمەگە گەرمانيا, يران, قازاقستان, قىتاي, كورەيا, رەسەي, تاجىكستان, وزبەكستان, ۋكراينا, چەحيا جانە شۆەيتساريا سياقتى ەلدەردىڭ 80-نەن استام كومپانياسى مەديتسينالىق جابدىقتارىن قويدى. جىل سايىن وتەتىن ءداستۇرلى كورمەنىڭ شىمىلدىعىن قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا اشىپ بەردى. «استانادا كەزەكتى 13-ءشى حالىقارالىق ءدارى-دارمەكتەر جانە مەديتسينالىق بۇيىمدار كورمەسىن وتكىزىپ جاتىرمىز. بۇل كورمە ەل تاۋەلسىزدىگىنىڭ 25 جىلدىعىنا ارنالعان. سوندىقتان, كورمەدە تەك مەديتسينالىق جاڭا تەحنيكالار مەن دارىلەردى عانا ەمەس, قازاقستاننىڭ 25 جىل ىشىندە دەنساۋلىق ساقتاۋ سالاسىندا جەتكەن جەتىستىكتەرىن دە پاش ەتتىك. ءبىز بۇگىندە مەملەكەت تاراپىنان 49 اۋرۋ تۇرىنەن 400 ءتۇرلى ءدارى-دارمەكتى 2 ملن ادامعا تەگىن بەرىپ جاتىرمىز. ال ستاتسيونارعا كەلىپ تۇسەتىن ادامدار تولىق مەملەكەتتىڭ ەسەبىنەن ەمدەلۋدە. بۇل ءۇشىن جىلدا 200 ملرد تەڭگەدەن استام قارجى جۇمسايمىز», - دەپ مالىمدەدى مينيستر. شەت ەلدەردە شىعارىلىپ, ءوز ەلىمىزدە قۇراستىرىلاتىن مەديتسينالىق قۇرال-جابدىقتار دا از ەمەس. «Kazmedpribor hoiding» وتاندىق فيرماسى 10 جىلدان استام وزگە ەلدەرمەن تىعىز جۇمىس ىستەپ كەلەدى. «ءبىزدىڭ فيرمامىزدىڭ باس شتابى شىمكەنت قالاسىندا ورنالاسقان. 2005 جىلى اشىلدىق. ءبىز مەديتسينالىق ەمدەۋ مونيتورلارىن, لابوراتوريا قۇرالدارىن, رەنتگەن جابدىعىن, ۋزي-گە تۇسىرەتىن قۇرال جابدىقتاردى قۇراستىرامىز. قازاقستاننىڭ ءار تۇكپىرىنەن تۇسكەن تاپسىرىستاردىڭ بارلىعىن ورىندايمىز. ءبىز جاسايتىن تەحنولوگيالاردىڭ باستى بولىكتەرى گەرمانيا مەن كورەيادا شىعارىلادى», - دەيدى «Kazmedpribor hoiding» فيرماسىنىڭ باس ديرەكتورى قانىبەك قاناتبەك ۇلى. اتالمىش كورمەنى قر دەنساۋلىق ساقتاۋ جانە الەۋمەتتىك دامۋ مينيسترلىگىمەن بىرىگىپ «قازمەدتەح» اق جانە «سك-فارماتسيا» جشس بىرىگىپ ۇيىمداستىرىپ وتىر.