تىڭ ىسكە تارازدىڭ دا تالاسى بار

جامبىل وبلىسىندا بارلىعى 3 336 تاريحي-مادەني ەسكەرتكىش بار. ونىڭ 28-ءى رەسپۋبليكالىق ماندەگى ەسكەرتكىشتەر. 5 تاريحي نىسان يۋنەسكو-نىڭ دۇنيەجۇزىلىك مادەني مۇرا تىزىمىنە ەنگىزىلگەن, ولار – اقتوبە, قۇلان, ورنەك, قوستوبە جانە اقىرتاس قالاشىقتارى. ۇلى جىبەك جولىنىڭ اۋقىمدى بولىگى جامبىل وبلىسىنىڭ اۋماعى ارقىلى وتەدى. مۇندا تاريحي-مادەني ەسكەرتكىشتەر دە كوپتەپ ورنالاسقان. الايدا, بۇگىنگى تاڭدا اۋليەاتا جەرى تۋريزم ماسەلەسىندە تابىستى وڭىرگە اينالماي وتىر. راس, وتاندىق ەكونوميكاداعى قولايلى جاعداي, مەم­لە­كەت­تىك قولداۋ كاسىپكەرلەردى قولايلى قوناقۇيلەر سالۋعا ىنتالاندىرۋدا. مىسالى, جامبىل وبلىسىندا 2013 جىل­مەن سالىستىرعاندا 2016 جىلى قوناقۇيلەر سانى 82 پايىزعا ارتقان. ايتسە دە, قوناقۇيلەردەگى ورىنداردىڭ تولىمدىلىعى نەبارى 12,4 پايىزدى قۇراپ وتىر. بۇل 2013 جىلمەن سالىستىرعاندا 2,5 ەسەگە از. – مۇنىڭ باستى سەبەبى – وبلىس ورتالىعىندا شەت ەلدەن كەلەتىن تۋريستەرگە قىزمەت كورسەتەتىن جوعارعى كلاستاعى قوناقۇيلەردىڭ جوقتىعى, – دەيدى وبلىستىق كاسىپكەرلەر پالاتاسىنىڭ ديرەكتورى قارلىعاش ارالبەكوۆا. – ال قولدا بار قوناقۇي بازاسى 50-60 پايىزعا ەسكىرگەن. جىل باسىنان بەرى وبلىستىق كاسىپكەرلەر پالاتاسى مەن وبلىس اكىمدىگى ءتۋريزمدى دامىتۋ باعىتىندا بىرقاتار ناتيجەلى جۇمىستار اتقاردى. تۋريزم كلاستەرىن دامىتۋ جانە «جىبەك جولى» جوباسىن جۇزەگە اسىرۋ جونىندەگى جۇمىس­شى توبى قۇرىلدى. وتكەن ناۋرىز-ءساۋىر اي­لار­ىندا توپ وبلىسىمىزداعى تۋريستىك نىساندار­دى ارالاپ, ينۆەنتاريزاتسيالاۋ جۇمىستارىن ءجۇر­گىز­دى. سونىمەن قاتار, ايماقتا ءتۋريزمدى دامىتۋ ماق­ساتىندا وبلىستىڭ ۆيزيتتىك كارتاسى جاسالىپ, ءوڭتۇس­تىك قازاقستان جانە الماتى وبلىستارىنىڭ, قىرعىزستان مەن رەسەيدىڭ تۋريستىك فيرمالارىنا جولداندى. وسىنىڭ ناتيجەسىندە جەرگىلىكتى ءماسليحات 2016 جىلى ءتۋريزمدى دامىتۋعا 41 ميلليون بيۋدجەت قاراجاتىن بولۋگە شەشىم شىعاردى. بولىنگەن قاراجات تۋريستىك سايت جاساۋعا, جارنامالىق ونىمدەر شىعارۋعا جانە تۋريستىك-اقپاراتتىق ورتالىق قۇرۋعا جۇمسالاتىن بولادى. ەندى وڭىردەگى تۋريزم سالاسىن الەمدىك تاجىريبە نەگىزىندە دامىتۋ ءۇشىن قالانىڭ كورىكتى جەرلەرىن تاماشالاپ تانىسۋ ءۇشىن ەكى قاباتتى برەندتى اۆتوبۋستار جۇرگىزۋ, وبلىستىڭ تۋريستىك مارشرۋتىنا كىرەتىن نىسانداردىڭ ينفراقۇرىلىمىن قالپىنا كەلتىرۋ, وقيعالىق ءتۋريزمدى دامىتۋ اياسىندا جىل سايىن قازاق حاندىعى فەستيۆالىن وتكىزۋ, شەبەرلەر مەن قولونەرشىلەر قالاسىن جاساۋ جانە تاعى دا باسقا جۇمىستار قولعا الىنۋدا. كەلەسى جىلى ەكسپو-2017 حالىقارالىق كورمەسىن ۇيىمداستىرۋ قازاقستاننىڭ جارقىن جوبالارىنىڭ ءبىرى ەكەنى انىق. بۇل حالىقارالىق كورمەنىڭ دايىندىق جۇمىستارىنا وبلىستان ارىپتەستىك تۋرالى مەموراندۋمعا قول قويعان 4 تۋريستىك كومپانيا قاتىسۋدا. بۇل ءوڭىر ەكسپو قوناقتارىن قابىلدايتىن وبلىس رەتىندە قىزۋ دايىندىق ۇستىندە. بۇل كومپانيالار قالامىزعا كەلەتىن قوناقتار ءۇشىن تۋريستىك مارشرۋتتار ازىرلەدى. تاعى ءبىر ايتارى, ەكسكۋرسيالىق مارشرۋتتار قاتارىنا قالانىڭ كورىكتى جەرلەرىمەن قاتار ىسكەرلىك ءتۋريزمدى دامىتۋ ماقساتىندا ءىرى كاسىپورىندار دا ەنگىزىلگەن. سونىمەن قاتار, كەلگەن تۋريستەرگە اعىلشىن, قىتاي جانە تۇرىك تىلدەرىندە قىزمەت كورسەتەتىن گيد دايارلاۋ ءىسى دە قولعا الىنىپ, 35-40 ادام ارنايى وقىتۋ كۋرستارىنان وتەتىن بولادى. بۇگىندە جامبىل وبلىسى اۋماعىندا 3 قورىق مەملەكەت قامقورلىعىنا الىنعان. وبلىستىڭ فلوراسى مەن فاۋناسى ءارالۋان. مۇندا وسىمدىكتىڭ 3 مىڭنان استام ءتۇرى وسەدى. ال اڭشىلىق جەردىڭ جالپى اۋماعى 13,9 مىڭ گەكتاردى قۇرايدى. وندا جانۋارلاردىڭ 40 مىڭنان استام ءتۇرى مەكەن ەتەدى. سونداي-اق, بالىق شارۋاشىلىعى قورى 27,8 مىڭ گەكتاردى قۇرايدى. 74 سۋ ايدىنى بار. قالاي ايتساق تا, بۇل وڭىردە تۋريزم سالاسى ۇلكەن الەۋەتكە يە. ياعني, كاسىپكەرلىكتى دامىتۋداعى باسىم باعىتتاردىڭ ءبىرى رەتىندە تۋريزمگە ءالى دە تىڭ كوزقاراس پەن ناقتى تىرلىك قاجەت. ورالحان ءداۋىت, «ەگەمەن قازاقستان» جامبىل وبلىسى