اسقار ابىلداەۆ: "شاحتەر" كومانداسىنىڭ قارجىلىق جاعدايى تۇزەلىپ كەلەدى

بيىلعى ماۋسىمدى ءبىراز قيىنشىلىقتارمەن وتكىزگەن «شاحتەر» فۋتبول كومانداسىنىڭ باسشىلىعى مەن باپكەرلەرى بىرنەشە رەت اۋىستى. سوڭىنان اتقارۋشى ديرەكتور بولىپ  اسقار ابىلداەۆ كەلدى. – اسقار ءزۇبايدىلدا ۇلى, قالىڭ وقىرمانعا ءوزىڭىزدى قىسقاشا تانىستىرىپ وتسەك. – مەن وسى «شاحتەردىڭ» دايارلىق توبىنا العاش بالا كۇنىمدە كەلىپ ەدىم. توعىز جاسىمنان اناتولي چۋدينوۆتىڭ قول استىندا جات­تىقتىم. كوماندانىڭ نەگىزگى قۇرا­مىندا 1986 جىلدان باستاپ وينادىم. ول كەزدە باس باپكەرىمىز سەرىك اشىربەكوۆ ەدى. «شاحتەردە» ءۇش ماۋسىم ويناپ, 1991 جىلى الماتىنىڭ «قايراتىنا» اۋىستىم. 1992 جىلى وسى كوماندامەن بىرگە قازاقستان چەمپيونى, ەل كۋبوگىنىڭ يەگەرى بولدىم. 1994 جىلى ءبىر ماۋ­سىم پاۆلوداردىڭ «اڭسات» كلۋبىندا ونەر كورسەتىپ, ودان سوڭ قايتادان «شاحتەرگە» كەلدىم. كەڭەس داۋىرىندە دە, ەلىمىز تاۋەلسىزدىك العاننان كەيىن دە قازاقستاننىڭ الدىمەن جاسوسپىرىمدەر, جاستار قۇراماسىندا, ودان كەيىن ۇلتتىق قۇراما كومانداسىندا وينادىم. كەيىن مەملەكەتتىك قىزمەتكە اۋى­سىپ, 2008 جىلى «شاحتەر» فۋتبول كلۋبىنىڭ اتقارۋشى ديرەكتورى بولىپ تاعايىندالدىم. 2015 جىلدان قازىرگى قىزمەتىمە دەيىن قازاقستان فۋتبول فەدەراتسياسىنىڭ بۇقارالىق فۋتبول دەپارتامەنتىن باسقاردىم. – كلۋب باسشىلىعىنا ەندى كەلىپ جاتىرسىز. باعىت قانداي بولماق؟ – «شاحتەردىڭ» قۇرامىندا جەر­گىلىكتى مىقتى ويىنشىلار قاي كەزدە دە بولعان. كەزىندە كوماندانى مەيلىنشە قاراعاندى فۋتبولىنىڭ ءتول شاكىرتتەرىمەن قامتاماسىز ەتتىك. ول باستاما ناتيجەسىز بولعان جوق. قازىر دە سول جالعاسادى – كوماندانىڭ بيىلعى پروبلەمالارى نەگىزىنەن قارجى جەتىس­پەۋشىلىگى بولدى دەپ وتىرمىز. الداعى ماۋسىمدا بۇل جاعداي قايتالانباي ما؟ – «شاحتەر» فۋتبول كلۋبىنىڭ قارجىلىق جاعدايى قازىر تۇزەلىپ كەلەدى. وبلىس باسشىلىعى سپورتقا, ونىڭ ىشىندە, اسىرەسە, فۋتبولعا ەرەكشە كوڭىل ءبولىپ وتىر. كوكەيدە كوپتەن جۇرگەن وزەكتى ماسەلەنىڭ ءبىرى – كەنشىلەر قالاسىنا جەكە فۋتبول مانەجى كەرەك. قالانىڭ مايقۇدىق جانە وڭتۇستىك-شىعىس تۇرعىن اۋداندارىنىڭ اراسىنداعى بوس كەڭىستىككە فۋتبول ستاديونى سالىنادى دەپ جوسپارلانعان. سول ماسەلە تەزىرەك قولعا الىنسا, قاراعاندى فۋتبولىن جەتىلدىرۋگە كوپ كومەگى تيەر ەدى. – ءداستۇر جالعاستىعى بولۋى كەرەك. قازىر «شاحتەردىڭ» قوسال­قى قۇرامىن, جاس فۋتبولشىلاردى دايارلاۋ جاعى قالاي؟ – كومانداعا قوسالقى قۇرام فۋتبولشىلارىن دايارلاۋ دا وزەكتى ماسەلەنىڭ ءبىرى. ونىمەن قازاقستان فۋتبول فەدەراتسياسىنىڭ ارنايى باعدارلاماسى بويىنشا «شاحتەر» كلۋبىنىڭ ورتالىعى, سونىمەن قا­تار, بالالار مەن جاسوسپىرىمدەر سپورت مەكتەبى جانە  ءا.مولداعۇلوۆا اتىنداعى سپورتقا بەيىمدى, دارىندى بالالارعا ارنالعان وبلىستىق مامانداندىرىلعان مەكتەپ-ين­تەرناتتىڭ فۋتبول بولىمدەرى اينالىسادى.  وكىنىشكە قاراي, مەكتەپ-ينتەرنات بالالاردى بىلتىر العاش رەت فۋتبول بولىمىنە قابىلداماي قالدى. بىراق, سولاي ەكەن دەپ سالىمىز سۋعا كەتپەۋى كەرەك. سپورت باس­قارماسى تاياۋدا قالانىڭ سۇ­رىپ­تاۋ تۇرعىن اۋماعىنداعى «لو­كوموتيۆ» سپورت كەشەنىن قايتا جوندەۋدەن وتكىزىپ, «شاحتەر» فۋتبول كلۋبىنىڭ فۋتبول ورتالىعى سوندا كوشىرىلەتىن بولادى. كەيىن سول جەردەن فۋتبول اكادەميا­سىن اشۋعا بولادى. «لوكوموتيۆ» سپورت كەشەنىن قايتا جوندەۋدەن وتكىزىپ, سونىڭ بازاسىندا فۋتبول اكادەميا­سىن قۇرۋ قاجەتتىگىن  2007 جىلى سول كەزدەگى قاراعاندى وبلىسىنىڭ اكىمى نۇرلان نىعماتۋلين ايتقان بولاتىن. سودان بەرى ونشاقتى جىل وتسە دە, اكادەمياعا دەگەن سۇرانىس وسپەسە, كەمي قويعان جوق. سوندىقتان, بۇل ماسەلەنى تەزىرەك شەشۋگە اسىققانىمىز ابزال. اڭگىمەلەسكەن قايرات ءابىلدينوۆ, «ەگەمەن قازاقستان»   قاراعاندى