بەلارۋس پەن پاۆلودار 45 ملن. دوللارلىق مەموراندۋم جاساستى

پاۆلودار وبلىسىندا 2 قاراشادا اشىلاتىن «ەرتىس ينۆەست-2016» حالىقارالىق فورۋمىنا كەلگەن بەلارۋس بيزنەس-دەلەگاتسياسى وبلىستىق كاسىپكەرلەر پالاتاسىندا ءوڭىردىڭ كاسىپكەرلەرىمەن كەزدەستى, دەپ حابارلايدى egemen.kz وكپ ءباسپاسوز قىزمەتىنە سىلتەمە جاساپ. قازاقستانداعى بەلارۋس رەسپۋبليكاسى ەلشىلىگىنىڭ ساۋدا-ەكونوميكالىق قىزمەتى باسشىسى  گەننادي كلىگانىڭ ايتۋىنشا, پاۆلودار وبلىسى ەكونوميكالىق ىنتىماقتاستىقتى  دامىتۋ ءۇشىن پەرسپەكتيۆالىق ءوڭىر رەتىندە قاراستىرىلادى.  بەلارۋستەن كەلگەن قوناقتار وڭىرگە ساپار شەڭبەرىندە 6 كەلىسىمگە قول قويۋ جوسپارلانىپ وتىرعاندىعىن حابارلادى. نەگىزىنەن بۇلار ماشينالار, ولاردى ودان ءارى قر-دا قۇراستىرۋ ءۇشىن جابدىقتار جانە كومبايندار  جەتكىزۋ بويىنشا 45 ملن. اقش دوللارىنا باعالانعان «گومسەلماش» ااق مەن «اگروماشحولدينگ» پاۆلودارلىق كاسىپورىنى اراسىنداعى مەموراندۋم بولىپ تابىلادى. كەزدەسۋدىڭ ماڭىزدى بولىگى پاۆلودار وبلىسى كاسىپكەرلەر پالاتاسى مەن «گومەل-راتون» ەركىن ەكونوميكالىق ايماعى اكىمشىلىگى» اراسىنداعى ىنتىماقتاستىق تۋرالى مەموراندۋمعا قول قويۋ بولدى. «وسى كەلىسىم وڭىرلەردىڭ بيزنەس ورتالارىنىڭ ىنتىماقتاستىعىن دامىتۋدى جانە ىسكەرلىك بايلانىستاردى نىعايتۋعا جاردەمدەسۋدى بولجايدى. بۇدان باسقا قولدا بار الەۋەت پەن ينۆەستيتسيالىق مۇمكىندىكتەردى ەسەپكە الا وتىرىپ, ءبىز مەموراندۋم ساۋدا-ەكونوميكالىق بايلانىستاردى نىعايتۋعا سەبەپشى بولاتىنىنا سەنەمىز. جالپى, ءتيىمدى ءوزارا بيزنەس-ىنتىماقتاستىقتى ارتتىرۋعا ىقپال ەتەتىن بولادى», - دەپ ەسكەرتتى وبلىستىق كاسىپكەرلەر پالاتاسىنىڭ ديرەكتورى سەرىك بايسەيتوۆ.