قازاقستاننان شەتەلگە 8 اۋە باعىتى اشىلادى

قازاقستاننان پراگا, ۆەنا, ۆارشاۆاعا اۋە باعدارى اشىلادى. بۇل تۋرالى بۇگىن ۇكىمەت وتىرىسىندا قر ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى. ءمينيستردىڭ ايتۋىنشا, بۇگىنگى كۇنى استانا 25 حالىقارالىق باعدار بويىنشا 16 ەلمەن تىكەلەي اۋە بايلانىس ورناتقان. ونىڭ ىشىندە فرانكفۋرت, لوندون, دۋباي, گونكونگ, سەۋل سىندى 5 حالىقارالىق قارجى ورتالىعى دا بار. جالپى, ءبىر اپتادا ەلوردا اۋەجايىنان 415 رەيس ورىندالادى. ونىڭ 126-سى حالىقارالىق, ال 289-ى ىشكى باعدارلار. «ەكسپو-2017-گە» دايىندىق ءۇشىن «اشىق اۋە» جانە استانا اۋەجايىندا كۇندەلىكتى رەيستەرگە شەكتەۋلەردى الىپ تاستاۋ بويىنشا ىلكى جوبالاردى ىسكە قوسۋ جوسپارلانۋدا. پراگا, حەلسينكي, ۆەنا, ۆارشاۆا, بۋپاپەشت سىندى 8 جاڭا باعىت اشىلادى دەپ كۇتىلۋدە», - دەدى قاسىمبەك. ونىڭ سوزىنە قاراعاندا, 2012 جىلى ىشكى اۋە تاسىمالداۋ نارىعى تولىعىمەن ىرىقتالعان. قازىرگى ۋاقىتتا 6 اۋە كومپانياسى 39 باعدار بويىنشا ىشكى رەيستەردى ورىندايدى. ىشكى باعدارلار سۋبسيديالانادى. اعىمداعى جىلى ءتۋريزمدى دامىتۋ ماقساتىندا الماتى مەن استانادان بالقاشقا, الماتىدان ۇرجارعا جانە اقتاۋدان كوكشەتاۋعا اۋە رەيسى اشىلعان. كەلەسى جازعى ماۋسىمدا استانادان ۇرجارعا, الماتى مەن استانادان ۇشارالعا اۋە رەيسىن اشۋ كوزدەلىپ وتىر.