سەمەيدە قايىم مۇحامەدحاننىڭ اتىنا كوشە بەرىلەدى

سەمەي قالاسى ءماسليحاتىنىڭ تۇراقتى كوميسسياسىندا وتكەن قوعامدىق تىڭداۋ بارىسىندا بۇرىنعى ينتەرناتسيونال كوشەسىنىڭ اتاۋىن اسا كورنەكتى عالىم, ابايتانۋشى, اباي مۇراجايىن قۇرۋشى, الاش قايراتكەرلەرىنىڭ ءىزىن جالعاۋشى قايىم مۇحامەدحانوۆتىڭ اتىنا اۋىستىرۋ ماسەلەسى قارالدى. قالا باسشىلىعى, ءماسليحات دەپۋتاتتارى, جەرگىلىكتى اتقارۋشى ورگاندار مەن قوعامدىق ۇيىمداردىڭ وكىلدەرى قاتىسقان تىڭداۋ بارىسىندا تۇراقتى كوميسسيا مۇشەلەرى كوشەگە عالىمنىڭ ەسىمىن بەرۋدى قولدادى. بيىل بىرقاتار ءوڭىر زيالىلارى جانە دينا قايىمقىزى عالىمنىڭ اتىنا ءوزى ەڭبەك ەتكەن سەمەي قالاسىنان كوشە اتاۋىن بەرۋ تۋرالى ۇسىنىستارىن جەتكىزگەن بولاتىن. بۇعان دەيىن عالىمنىڭ اتىنا اۋىستىرىلماق بولعان شميدت كوشەسىنە ق.مۇحامەدحانوۆتىڭ ۇرپاقتارى مەن سەمەيلىك زيالىلار قارسىلىق بىلدىرگەن ەدى. ولار اتالعان كوشە قاعا بەرىستە, ەلەۋسىز ءارى كىشىگىرىم كوشەلەردىڭ ءبىرى دەگەن ءۋاجدى العا تارتقان بولاتىن. ال ينتەناتسيونال كوشەسى قالانىڭ ورتالىعىندا ورنالاسقان. – جەرگىلىكتى ونوموستيكا كوميسسيالارى 2013 جىلى تاراتىلعاندىقتان, تۇراقتى كوميسسيا مۇشەلەرىنىڭ داۋىس بەرۋىمەن ءماسليحات حاتتاما تولتىرىپ, ونى جەرگىلىكتى اتقارۋشى بيلىك ءوزىنىڭ اقپاراتتىق رەسۋرستارىندا جاريالايدى. بۇدان كەيىن وبلىستىق جانە رەسپۋبليكالىق ونوماستيكالىق كوميسسيالاردىڭ قاراۋىنان ءوتۋى ءتيىس. ۇكىمەت قاۋلىسىمەن تولىعىمەن بەكىتىلگەن سوڭ عانا كوشە اتاۋى زاڭدى بولماق, دەدى بۇل تۋراسىندا سەمەي قالاسى مادەنيەت جانە تىلدەردى دامىتۋ ءبولىمىنىڭ قىزمەتكەرى تولقىن بەرىكبەكوۆا. بيىل وڭىردە قايىم مۇحامەدحانوۆتىڭ 100 جىلدىق مەرەيويى اياسىندا ءتۇرلى ءىس-شارالار ءوتىپ جاتىر. جىل باسىندا وسكەمەن قالاسىنداعى ا.پۋشكين اتىنداعى وبلىستىق كىتاپحانادا عالىمنىڭ ەلەكتروندىق بيبليوگرافياسىنىڭ تۇساۋكەسەرى وتسە, سەمەيدە «قازاقتىڭ ۇلى قايىمى» اتتى تانىمدىق كەش ۇيىمداستىرىلعان بولاتىن. قازىرگى كەزدە عالىمنىڭ ەسىمىن وبلىس ورتالىعىندا دا ءتيىستى دەڭگەيدە ۇلىقتاۋ ماسەلەسى قارالىپ جاتىر. دۋمان اناش, «ەگەمەن قازاقستان»