استانادا حالىقارالىق كىتاپ كورمە-جارمەڭكەسى وتەدى

9-12 قاراشا ارالاعىندا استانادا «Eurasian Fair-2016» ەۋرازيا حالىقارالىق كورمە-جارمەڭكەسى بولادى. وندا تمد-نىڭ, ەۋروپا جانە ازيانىڭ 30-دان استام ەلىنىڭ باسپا, كىتاپ ساۋداسى, عىلىمي-اعارتۋشىلىق جانە پوليگرافيا كومپانيالارىنىڭ وكىلدەرى باس قوسادى.  قازاقستان تاۋەلسىزدىگىنىڭ 25 جىلدىعىنا ورايلاستىرىلعان بۇل شاراعا مادەنيەت جانە سپورت مينيسترلىگى مەن استانا قالاسى اكىمدىگى قولداۋ كورسەتسە, ال ۇيىمداستىرۋشىسى – «فوليانت» باسپاسى. كورمە-جارمەڭكەگە كەلۋشىلەردىڭ نازارىنا جاقىن جانە الىس شەت مەملەكەتتەردىڭ كىتاپ شىعارۋ, پوليگرافيا سالاسىنداعى جەتەكشى باسپا ۇيلەرىنىڭ زاماناۋي كىتاپ ونىمدەرىنىڭ باي اسسورتيمەنتى, جاڭا تەحنولوگيالارى ۇسىنىلادى. ۇيىمداستىرۋشىلاردىڭ ايتۋىنشا, كورمە-جارمەڭكەنىڭ ءارى كۇنى قىزىقتى مادەني باعدارلامالارعا, عىلىمي شارالارعا تولى بولماق. ماسەلەن, ونىڭ اياسىندا عىلىمي-تاجىريبەلىك كونفەرەنتسيالاردى, تۇساۋكەسەرلەردى, دوڭگەلەك ۇستەلدەردى, تانىمال مادەنيەت قايراتكەرلەرىمەن, جازۋشىلارمەن, اقىندارمەن كەزدەسۋلەردى, فورۋمداردى, بايقاۋلار مەن ۆيكتورينالاردى وتكىزۋ كوزدەلىپ وتىر. سونىمەن قاتار, بۇل كۇندەرى باسپا ۇيلەرى مەن كىتاپ ساۋداسىن جۇرگىزەتىن ۇيىمداردىڭ باسشىلارى, رەسمي تۇلعالار, حالىقارالىق ساراپشىلار, پروزا مەن پوەزيانىڭ بەلدى وكىلدەرى, باسپا جوبالارىن قولدايتىن ۇيىمدار مەن قورلاردىڭ, كىتاپحانا, ءبىلىم بەرۋ, عىلىمي قوعامداستىقتىڭ وكىلدەرى كىتاپ سالاسى توڭىرەگىندەگى وزەكتى ماسەلەلەردى تالقى تارازىسىنا سالاتىن بولادى. «Eurasian Fair – 2016» ەۋرازيا حالىقارالىق كىتاپ كورمە-جارمەڭكەسى ديرەكتسياسى ديرەكتورىنىڭ ورىنباساسىر راۋشان قاپانقىزىنىڭ سوزىنە قاراعاندا, مۇنداي اۋقىمداعى شارا استانا تورىندە العاش رەت ۇيىمداستىرىلماق. ال ونى وتكىزۋ تۋرالى باستامانى «فوليانت» باسپاسى كوتەرگەن. ءلايلا ەدىلقىزى, «ەگەمەن قازاقستان»