رەسپۋبليكالىق پارتيانىڭ تاجىريبەلى ساياساتكەرلەرىن قيراتا جەڭىپ, سايلاۋ ناۋقانىنىڭ شەشۋشى كەزەڭىنە شىقتى. ساياسي تاجىريبەسى جوق ەكەندىگىنە, داۋ تۋعىزاتىن مالىمدەمەلەردى ءجيى جاسايتىنىنا, وتكەن ومىرىنە قاتىستى ىڭعايسىز فاكتىلەر جاريا بولعانىنا قاراماستان, ترامپتىڭ تانىمالدىعى ارتۋمەن بولدى. مۇنىڭ سەبەبى نە؟
دونالد ترامپ – جىلجىمايتىن م ۇلىك سالاسىندا كاسىپكەرلىكپەن بايىعان ميللياردەر. مەدياماگنات. 16 كىتاپتىڭ اۆتورى. بيىل قاراشا ايىندا وتەتىن پرەزيدەنت سايلاۋىنا رەسپۋبليكالىق پارتيا اتىنان قاتىسادى. ەگەر جەڭىسكە جەتسە, ساياسي تاجىريبەسى مەن اسكەري مانسابى جوق العاشقى پرەزيدەنت بولماق. 2003 جىلى ول NBC تەلەراناسىندا «كانديدات» رەاليتي-شوۋىن جۇرگىزدى. توسىن پىكىردى دۇڭك ەتكىزىپ قويىپ قالاتىنى باعدارلاما رەيتينگىن كوتەردى.
وسى جىلدىڭ ماۋسىمىندا Washington Post گازەتى ساراپتاما جاساپ, دونالد ترامپقا قاتىستى 3500 سوت ءىسى بار ەكەنىن انىقتادى. ال PolitiFact.com باسىلىمى ترامپتىڭ ساياسي كوزقاراستارى ءجيى وزگەرىپ, بىرنەشە رەت پارتيا اۋىستىرعانىن جازدى. باسىلىمنىڭ ەسەپتەۋىنشە, دونالد 17 رەت ءوزىنىڭ پىكىرىنەن باس تارتقان. سونىمەن قاتار ايتقاندارىنىڭ 75 پايىزى وتىرىك ەكەنى دالەلدەنگەن. دەگەنمەن, جۇرتشىلىقتىڭ كوڭىلى ترامپقا اۋدى. سايلاۋ ناۋقانى جاڭا باستالعان كەزدە ليدەرلەر قاتارىندا بولعان رەسپۋبليكالىق بەن كارسون ومىرباياندىق كىتابىنداعى وتىرىكتەرى انىقتالعان سوڭ بەدەلى تومەندەي باستادى. ونداي فاكتىلەر مەن پىكىرلەر ترامپتىڭ تانىمالدىعىنا كومەكتەسپەسە, نۇقسان كەلتىرە الماۋدا.
The Guardian, Washington Post, ۆۆس سياقتى باسىلىمدار رەسپۋبليكالىق كانديداتتىڭ بۇل تابىسىنىڭ سىرىن ءتۇسىنۋ ماقساتىندا زەرتتەۋلەر جاسادى. سولاردى ساراپتاپ كورسەك. بىرىنشىدەن, سوڭعى ەلۋ جىلدا اقش-تا بيلىككە دەگەن سەنىم ازايۋمەن بولعان. ادامدار قاعيدالارى سىرەسىپ قالعان, باعدارلامالارى جاتتاندى ساياساتكەرلەردەن جالىققان. كوپشىلىگى ترامپتى ساياساتكەر بولماعانى ءۇشىن دە ۇناتاتىنىن ايتىپتى. سونىمەن قاتار سايلاۋالدى كومپانياسىن ترامپ ءوزى قارجىلاندىرادى, سوندىقتان ونى باقىلاۋ مۇمكىن ەمەس دەگەن دە پىكىر باسىم.
ەكىنشىدەن, حالىق قيىن سۇراققا وڭاي جاۋاپ العىسى كەلەدى. مىسالى, ترامپ ميگرانتتارعا توسقاۋىل قويۋ ءۇشىن مەكسيكامەن ارادا قورعان سالا سالۋ كەرەك دەيدى. ىسكە اسىرۋ وڭاي بولمايتىنىن بىلە تۇرا, حالىقتىڭ كوكەيىندە جۇرگەن ماسەلەلەرگە وڭاي شەشىم ۇسىنادى. ۇمىتتەندىرەدى. زەرتتەۋلەر ترامپتى جاقتاۋشىلاردىڭ كوپشىلىگى جوعارى ءبىلىمى جوق ادامدار ەكەنىن ايتادى. ولار وزدەرىنىڭ جۇمىس ورىندارىنا تالاساتىن يمميگرانتتاردى ۇناتپايدى. سول سەبەپتى ترامپتى جاقتايدى.
ۇشىنشىدەن, ونىڭ بيزنەستەگى تاجىريبەسى ادامدارعا سەنىم بەرەدى. 2016 جىلى Forbes ونىڭ كاپيتالىن 3,7 ملرد, ال Bloomberg 3 ملرد دوللارعا باعالاعان. ەڭ باي امەريكاندار قاتارىندا ول 156 ورىندا, الەمدىك رەيتينگتە 496 ورىندا تۇر. سوندىقتان سايلاۋشىلارى ترامپ ەلدە جاڭا جۇمىس ورىندارىن اشىپ, ەكونوميكانى كوتەرەدى دەپ سەنەدى. بي-بي-سي جۇرگىزگەن ساۋالناماعا قاتىسقانداردىڭ كوپشىلىگى ترامپتى بيزنەستەگى جەتىستىگى ءۇشىن قۇرمەتتەيتىنىن ايتقان.
تورتىنشىدەن, ول باسقالار ايتۋعا قورقاتىن, بىراق حالىقتىڭ كوكەيىندەگى نارسەلەردى ايتادى. فرانتسۋزداردا «ادامنىڭ قيالىن بۇزعان ادام – جاۋى, ال ءدوپ باسىپ ايتقانى – سۇيىكتى باسشىسى» دەگەن ءسوز بار ەكەن. ترامپ كوبىنە فاكتىلەر مەن لوگيكالىق ارگۋمەنتتەردى ريتوريكاعا الماستىرىپ سويلەيدى. ال جاقتاستارى ونى شىنشىل ساياساتكەر دەپ بىلەدى.
بەسىنشىدەن, ەليتا حالىقتى كىنالايدى. ترامپ تا ەليتاعا قارسى. ليبەرالداردىڭ اشۋ-ىزاسىن تۋعىزاتىن پىكىرلەر ايتادى. سوندىقتان قاراپايىم ادامدار ونى قولدايدى. اقش-تا 45-ءشى پرەزيدەنت سايلاۋى 8 قاراشا كۇنى وتەدى.
گۇلنۇر قۋانىشبەكقىزى,
"ەگەمەن قازاقستان"
