استانادا اقمولا وبلىسى اۋىلشارۋاشىلىق تاۋارلارىن وندىرۋشىلەرىنىڭ جارمەڭكەسى ءوتىپ جاتىر. جارمەڭكەدە ازىق-ت ۇلىك باعاسى بازارداعىدان ايتارلىقتاي ارزان, دەپ حابارلايدى «ەگەمەن قازاقستان» ءتىلشىسى.
ماسەلەن, قوي ەتى – 950, سيىر ەتى – 1000, جىلقى ەتى – 1 100, بالىقتىڭ كيلوسى 400 تەڭگەدەن ساتىلىپ جاتىر. كارتوپ – 45, كاپۋستا – 55, ءسابىز بەن قىزىلشا – 60 تەڭگەدەن.
سونداي-اق, جارمەڭكەدەگى وسىمدىك مايى, ۇن مەن ۇن تاعامدارى, ءسۇت پەن ءسۇت ونىمدەرى, كونديتەرلىك تاعامدار ءبىرشاما ارزان ءارى تاڭداۋ مۇمكىندىگى جوعارى دەۋگە بولادى.
ساۋدا شاتىرلارىنىڭ شەتىندەگى ساحنادا اقمولالىق كۆن توپتارى, انشىلەر مەن بيشىلەر ونەر كورسەتۋدە. اسىق ويىنى, توعىزقۇمالاق سىندى ۇلتتىق ويىننىڭ كورىگىن قىزدىرىپ جاتقاندار دا كوپ.
«حان شاتىر» ساۋدا ويىن-ساۋىق ورتالىعىنىڭ الدىنداعى الاڭدا جارمەڭكە ەكى كۇنگە سوزىلاتىنىن ايتا كەتەيىك. وسىلايشا, «قۋاتتى ءوڭىر – قۋاتتى قازاقستان» اكتسياسىنىڭ اياسىنداعى وبلىستاردىڭ اۋىلشارۋاشىلىق جارمەڭكەسىن اقمولا وبلىسى قورىتىندىلاپ وتىر.
ارنۇر اسقار
فوتو: ەرلان وماروۆ
