جاڭاشا جابدىقتالدى

ەۋرازيالىق توپتىڭ قۇرامىنا كىرەتىن ەلىمىزدەگى «قازحروم» ترانسۇلتتىق كومپانياسى» اق فيليالى – اقسۋ فەرروقورىتپا زاۋىتى الىپ كاسىپورىندار قاتارىندا. ءوندىرىس ورنىندا 7 مىڭداي ادام ەڭبەك ەتۋدە. جىلىنا 1,2 ميلليون توننا فەرروقورىتپا وندىرەتىن زاۋىت ەلىمىزدە عانا ەمەس, الەمدىك مەتاللۋرگيا نارىعىنداعى الىپ كاسىپورىنداردىڭ بىرىنەن سانالادى. جۋىردا زاۋىتتىڭ №1 بالقىتۋ تسەحىندا كۇردەلى جوندەۋدەن وتكەن №15 پەش پايدالانۋعا بەرىلدى. زاۋىت ديرەكتورى سەرگەي پروكوپەۆتىڭ ايتۋىنشا, ەسكى پەشتى جوندەۋ جۇمىسى شىلدە ايىندا باستالىپتى. بۇل الىپ پەشتە جوعارى كومىرتەكتى فەرروحروم بالقىتىلادى. ول جاڭعىرتىلىپ, جوندەلىپ, جاڭا زاماناۋي جۇيە-تەتىك قوندىرعىلارمەن جابدىقتالدى. ياعني مەحانيكالىق, گيدراۆليكالىق جانە ەنەرگەتيكالىق تەحنيكالىق قاجەتتىلىكتەرى اۆتوماتتاندىرۋ جۇيەسىنە اۋىستىرىلدى. الىپ ەلەكتر پەشىنىڭ كۇردەلى جوندەۋى زاۋىتتىڭ ينۆەستيتسيالىق باعدارلاماسى اياسىندا جۇزەگە استى. پەشتى جاڭا زامان تالاپتارىنا ساي جابدىقتاۋعا, جاڭارتۋعا سالىنعان ينۆەستيتسيا كولەمى 1,4 ملرد تەڭگە. مەتاللۋرگيا سالاسىنداعى وزىق قۇرال-جابدىقتار ورناتىلدى. قاۋىپسىز, ءارى ەكولوگيالىق جاعىنان تازا. زاماناۋي تەحنولوگيا, جاڭا پەشتىڭ قوسىلۋى زاۋىتتىقتار ءۇشىن ونىمدىلىككە, ۇنەمدىلىككە ۇلەس. پەشتىڭ جىلدىق ونىمدىلىگى شامامەن 50 مىڭ توننا جوعارى كومىرتەكتى فەرروحروم. – نەگىزگى جانە قوسالقى جابدىقتى ۇنەمى جاڭالاپ تۇرۋ – كاسىپورىننىڭ تابىستى دامۋىنىڭ كەپىلى. ەكىنشىدەن, قورشاعان ورتانى قورعاۋ جانە ەڭبەكتى قورعاۋ سالاسىنداعى زاماناۋي تالاپتار ەسكەرىلەدى. كۇردەلى جوندەۋ كەزىندە پەش قايتادان جاڭالانىپ, رەتتەلەدى. بارلىق قۇرىلىس-مونتاج جۇمىستارىن زاۋىت ماماندارى جۇرگىزدى. بۇل ءبىز ءۇشىن ماقتانىش. قازىر زاۋىتتىعى ەڭ قۋاتتى قۇرىلىمى №6 تسەحتى قايتا جاڭعىرتۋ جۇمىسىنا دايىندىق جاسالۋدا. الداعى جەلتوقسان ايىندا №64 پەش تە كۇردەلى جوندەۋگە شىعارىلادى, – دەيدى سەرگەي پروكوپەۆ. بۇعان دەيىن دە زاۋىتتاعى №28, №№63, 46, 45 جانە 12 پەشتەردىڭ كۇردەلى جوندەۋدەن وتكەندەرىن جازدىق. بۇل – ءوندىرىس ورنىنداعى ماقساتتى ينۆەستيتسيالىق باعدارلامالار ءتيىمدى ورىندالۋدا دەگەن ءسوز. قايتا جاڭارعان پەشتەر ەكولوگياعا زيانسىزدىعى مەن قاۋىپسىزدىككە دە كەپىل­دىك بەرەدى. ەسكى تەحنيكانىڭ ۋاقىتى كەتتى. جاڭعىرتۋ ونىمدىلىكتى, سونداي-اق ءوندىرىستىڭ سەنىمدىلىگى مەن قاۋىپسىزدىگىن دامىتۋدىڭ باستى فاكتورى. زاۋىتتا ءوندىرىستى جاڭعىرتۋ جۇمىس­تارى كەزەڭ-كەزەڭمەن جۇرگىزىلۋدە. ءوندى­رىستىڭ وزىق تەحنولوگيالارىن قولدانۋ جانە جاڭعىرتۋداعى ماقسات جوعارى كومىرتەكتى فەرروحروم ءوندىرىسىن ارتتىرۋ بولىپ تابىلادى. فاريدا بىقاي, «ەگەمەن قازاقستان» پاۆلودار وبلىسى, اقسۋ قالاسى