بالالار ادەبيەتىنە «شيماي-شاتپاق» كەلدى...

الماتىدا «التىن قالام» ادەبي بايقاۋىن وتكىزۋشىلەر القاسى مەن «ارۋنا» باسپاسىنىڭ ۇيىمداستىرۋىمەن بالالارعا ارنالعان «شيماي-شاتپاق» اتتى كىتاپتىڭ تۇساۋكەسەرى ءوتتى. – «التىن قالام» بايقاۋىن وتكىزۋگە كەلىسكەن كەزىمىزدە بىزدە ءبىر عانا ماقسات بولعان ەدى: قازاق ادەبيەتىندە جاڭاشا سيپاتتاعى شىعارمالاردىڭ جازىلۋىنا, جارىق كورۋىنە ۇلەسىمىزدى قوسۋ. بايقاۋ بۇعان دەيىن بىرنەشە مارتە قورىتىندىلانىپ, جىل سايىن جۇلدەگەرلەردى ماراپاتتاۋ ءراسىمى ءوتىپ تۇردى. سوڭعى كەزەڭدە جۇلدەگەرلەردىڭ شىعارمالارىن جەكە كىتاپ ەتىپ باستىرۋ جايىن قاراستىردىق. بىزگە العاشقى بولىپ «ارۋنا» باسپاسى قولۇشىن سوزدى. ناتيجەسىندە بالالار ادەبيەتىنە «شيماي-شاتپاق» كەلدى, – دەدى «كىتاپ قالاشىعى» دۇكەنىندە وتكەن راسىمدە «التىن قالام» بايقاۋىن ۇيىمداستىرۋشىلار اتىنان ءسوز العان جۋرناليست كەنجە جۇمان ۇلى. شيماي - شاتپاق – شىت جاڭا كۇلكىلى كەيىپكەر. مۇنداي كەيىپكەرلەردى شەتەل ادەبيەتىندە كوميكس رەتىندە قابىلداۋ ءداستۇرى بۇرىننان بار. ال كىتاپ اۆتورى ۇزاق جىلدار بويى الماتىداعى ساپارعالي بەگالين اتىنداعى بالالار كىتاپحاناسىندا ەڭبەك ەتكەن تۇمار موكەشتەگى حانىم. «التىن قالام» بايقاۋىنىڭ بىلتىرعى جىلعى جۇلدەسىن العان شىعارمادا قازىرگى ءجاسوسپىرىم وقۋشىلار بويىنداعى جاقسىلى-جاماندى ادەتتەر مەن ولاردان بويىن اۋلاق سالۋعا شاقىراتىن ءساتتى يىرىمدەر سۋرەتتەلگەن. بۇل – كىتاپحاناشى-جازۋشىنىڭ باسپا بەتىن كورىپ وتىرعان تىرناقالدى تۋىندىسى. اۆتور الداعى ۋاقىتتا «شيماي - شاتپاقتىڭ» جالعاسىن جازۋعا نيەتتى. ايۋتاس قالماحانبەت مۇقامەتقالي, «ەگەمەن قازاقستان» الماتى