جاستارعا جاسالىنعان ۇلكەن مۇمكىندىك

قازاق مەملەكەتتىك قىزدار پەداگوگيكالىق ۋنيۆەرسيتەتىندە قازان ايىنىندا ءبىر كۇن بويى, ياعني ساعات تاڭعى 7:00-17:00 ارالىعىندا «مەنىڭ بۇگىنگى جۇمىسىم...» اتتى ستۋدەنتتەر اراسىندا ايرىقشا اكتسيا وتكىزىلدى. اتالمىش اكتسيانىڭ ماقساتى – ستۋدەنت-جاستار زاماناۋي كوشكە ىلەسىپ, تەك قانا ءبىر ماماندىقپەن شەكتەلمەي, جان-جاقتى بولىپ, كەز كەلگەن كاسىپتى يگەرۋى كەرەك. جاستاردىڭ بويىندا ازاماتتىق ۇستانىم, تاپقىرلىق, الەۋمەتتىك جاۋاپكەرشىلىك قاسيەتتەرى ارتا تۇسەدى. جاس ادام نەعۇرلىم سان-سالالى بولسا, ومىردەن ءوز ۇلەسىن الۋ جولىندا ەش قينالمايدى. قازىرگى تاڭدا ەلىمىزدە عانا ەمەس, الەمدە جۇمىسسىزدار سانى ارتۋدا. سول سەبەپتەن قاتىپ قالعان شەڭبەردەن شىعىپ, العان ماماندىقتان بولەك, ءتۇرلى كاسىپتى دوڭگەلەتىپ اكەتكەن ابزال. بۇل باستامانى الماتى قالاسىنىڭ جاستار ساياساتى باسقارماسى قولعا الىپ وتىر. باسقارما ستۋدەنتتىك ءوزىن-ءوزى باسقارۋدىڭ جۇمىسىن جەتىلدىرۋ جانە باعالاۋ ماقساتىندا بيىلعى جىلدان باستاپ «Almaty YouthAwards» سالتاناتتى ماراپاتتاۋ ءراسىمىن وتكىزۋدى جوسپارلاپ وتىر. قازاقستاندا جاستاردى قولداۋ جانە كاسىپكەرلىكتى دامىتۋ جونىندەگى ەلباسى ن.ءا.نازارباەۆتىڭ يدەياسى بولاتىن. پرەزيدەنت جىلداعى حالىققا ارنالعان جولداۋلارى مەن ۇلت جوسپارىندا ۇنەمى جاستاردى قولداپ, باعىت-باعدار بەرىپ كەلەدى. قىزدار ۋنيۆەرسيتەتى ستۋدەنتتەرى «مەنىڭ بۇگىنگى جۇمىسىم...» اتتى اكتسيا بارىسىندا بارلىعى 33 جۇمىس ورنىمەن كەلىسىپ, جۇمىسقا ساي قىزمەت ءتۇرىن كورسەتتى. اتاپ ايتار بولساق, قر ۇلتتىق كىتاپحاناسىندا «كىتاپحاناشى», «نۇر وتان» پارتياسىنىڭ ەڭبەكشىقازاق اۋداندىق فيليالىندا «ءىس قاعازدار جۇرگىزۋشى», الماتى قالالىق ارداگەرلەر ۇيىندە «الەۋمەتتىك قىزمەتكەر», «اق ءۇمىت» بالالار ۇيىندە «تاربيەشى», «Oskar» «مودۋل» مودەلدىك اگەنتتىگىندە, «پولەزنايا اپتەكا» اتتى ءدارىحانادا فارماتسەۆت, «Deneba» اۋتسورينگتىك كومپانياسىندا «ساقتاندىرۋ اگەنتى», №7 قالالىق كلينيكالىق اۋرۋحانادا «اعا مەيىربيكەنىڭ كومەكشىسى» سىندى  33 ءتۇرلى مەكەمەمەن جۇمىس جاساپ شىقتى. سونداي-اق, «بالمۇزداق ساتۋشى», «مۋزىكانت», «جۋرناليست», «كونسۋلتانت», «رەداكتور-مونتاجداۋشى», «دايارشى», «گۇل ساتۋشى», «ۆيزاجيست», «كىشى مەديتسينا قىزمەتكەرى», «پروموۋتەر», «مەكتەپ ديرەكتورى», «ەسەپشى», «تاريح ءپانىنىڭ مۇعالىمى», «اۋدارماشى», «كەڭەسشى-ساتۋشى», «اسپازشى», «شاشتاراز» سىندى سان ءتۇرلى مامان يەسى بولىپ, ءبىر كۇن بويى اتالمىش قىزمەتتىڭ قىزىعى مەن قيىندىعىن كوردى. ءار ستۋدەنت جۇمىس جاساۋ بارىسىندا ءوز شەبەرلىكتەرىن كورسەتىپ, پەداگوگيكالىق ماماندىعىنان وزگە سالا ءتۇرىن دە يگەرە الاتىندىقتارىن دالەلدەدى. شارا سوڭىندا اكتسيانىڭ سالتاناتتى قورىتىندى كەشى ءوتتى. ساحنا تورىنە الەۋمەتتىك ماسەلەلەر جانە تاربيە ىستەرى جونىندەگى پرورەكتور ز. سابىروۆا شىعىپ, بارشا اتسالىسقان ستۋدەنتتەردى قۇتتىقتاپ, مەكەمەلەردەن كەلگەن ارنايى ساراپشىلارعا زور العىسىن ءبىلدىردى. ءتۇرلى كومپانيادان كەلگەن وكىلدەر قازمەمقىزپۋدىڭ ستۋدەنتتەرىنە, ياعني ءوز «قىزمەتشىلەرىنىڭ» جۇمىسىنا باعا بەردى. مۇنداي ءىس-شارالاردى ۇيىمداستىرۋدا بەلسەندىلىك تانىتىپ, ستۋدەنتتەرگە ۇلگى-ونەگە, جول سىلتەپ وتىرعان قىزدار ۋنيۆەرسيتەتى جاستار ساياساتىنىڭ دامىتۋ ءبولىمىنىڭ باستىعى نۇرگۇل قايداۋىلوۆا بىزبەن اڭگىمەسىندە: «الداعى ۋاقىتتاردا بۇگىنگى جۇرگىزىلگەن جۇمىس ءوز جالعاسىن تابادى. جاستار وقۋ وردامىزدىڭ ميسسياسىنا سايكەس ءبىلىم الۋمەن قاتار, ءتالىم-تاربيەنى قاتار الىپ ءجۇرۋ كەرەك. ءوز-ءوزىن شىڭداپ, دامىتۋ شارت. «بۇلاق كورسەڭ, كوزىن اش» دەمەكشى, ءار ستۋدەنت – ءبىر-ءبىر تۇلعا. ەرتەڭگى ەلىنە ەڭبەك ەتەتىن ۇلتجاندى ازامات پەن ازاماتشانى ءبىز بۇگىن دايىنداۋدامىز. سوندىقتان بارىنشا جاستاردى يگى ىستەرگە جانە ءوز ءىسىنىڭ بىلگىرى بولىپ قانا قويماي, جان-جاقتىلىققا تاربيەلەيتىنىمىزگە ەش كۇمان كەلتىرمەيمىن. اكتسيانىڭ دىتتەگەن ماقساتى دا وسى بولاتىن», –  دەپ ايتىپ ءوتتى. ءبىلىم شاڭىراعى بۇگىن ەرتەڭنىڭ سەنىمدى ىرگەتاسىن قالايتىن جىگەرلى جاستارعا جاۋاپكەرشىلىك پەن پاتريوتتىق سەزىم قالىپتاستىرىپ تاربيەلەۋدىڭ وزىق ۇلگىسىن كورسەتىپ وتىر دەسە بولعانداي ەكەن. جاستارعا ۇناعان ايرىقشا اكتسيانىڭ سوڭى تارتىمدى كونتسەرتتىك  كوڭىلدى كەشكە ۇلاستى. ساپارباي پارمانقۇلوۆ,  «ەگەمەن قازاقستان»