ورمان, سۋ, جەر ماسەلەلەرىن ورتاعا سالدى

كەشە وتكەن ورتالىق كوممۋنيكاتسيالار قىزمەتىندەگى بريفينگتە اۋىل شارۋاشىلىعى مينيسترلىگىنىڭ وكىلدەرى ورمان-توعايلارداعى سانيتارلىق كەسۋ مەن سۋارمالى جەرلەردىڭ اينالىمعا قايتارىلۋى جانە جەر كودەكسىنە ەنگىزىلەتىن وزگەرىستەر مەن تولىقتىرۋلار تۋرالى ايتتى. جيىن بارىسىندا نەگىزگى سپيكەردىڭ ءبىرى رەتىندە اۋىل شارۋاشىلىعى مي­نيسترلىگى ورمان شارۋاشىلىعى ءجا­نە جانۋارلار دۇنيەسى كوميتەتى ءتورا­عاسىنىڭ مىندەتىن اتقارۋشى قايرات ۇستەمىروۆ ءسوز سويلەدى. ول ورمان قورى القاپتارىندا قىلقان جاپىراقتى ەكپەلەردى سانيتارلىق كەسۋگە تىيىم سالۋدىڭ سەبەپ-سالدارىنا كەڭىنەن توقتالىپ, سالاداعى قازىرگى احۋالدى دا باياندادى. «سوڭعى ۋاقىتتا جاپىراقتى جانە قىلقان جاپىراقتى شارۋاشىلىق بويىنشا سۇرەك دايىنداۋ كولەمى ورمان پايدالانۋشىلارى مەن ورمان يەلەرى اراسىندا يگەرىلمەي جاتىر. قولدا بار دەرەكتەرگە سۇيەنسەك, اعاش كەسۋدە نەگىزگى پايدالانۋ كولەمىنىڭ يگەرىلمەۋى ورمان پايدالانۋشىلار مەن ورمان يەلەرىنىڭ سانيتارلىق كەسۋدى ءتيىمدى دەپ سانايتىندىعىندا بولىپ وتىر», دەدى ق.ۇستەمىروۆ. مىسالى, شىعىس قازاقستان وبلى­سىندا جىل سايىن سانيتارلىق كەسۋ ارقىلى 80 مىڭ تەكشە مەترگە جۋىق سۇرەك دايىندالادى. ال سوڭعى ءۇش جىلدا اقمولا وبلىسىنداعى سانيتارلىق كەسۋ كولەمى 185,3 مىڭ تەكشە مەتردى قۇرادى. وسىنىڭ سالدارىنان 2004-2014 جىلدار ارالىعىندا ەكپەلەر قورى ازايىپ قالدى. سانيتارلىق كەسۋدىڭ پايدالى بولۋى­نىڭ سەبەبى – ورمان پايدالانۋشىلار سۇرەك دايىنداۋ شىعىنىن ازايتۋ ار­قىلى تولەم سوماسىن دا كەمىتپەك. بۇل رەتتە ولاردىڭ تابىسىنىڭ ارتاتىنى تۇسىنىكتى. كوميتەت توراعاسىنىڭ مىندەتىن اتقارۋشى قىلقان جاپىراقتى ەكپەلەردى سانيتارلىق كەسۋگە تىيىم سالۋ ماسەلەسى پارلامەنت پەن ۇكىمەت دەڭگەيىندە تالقىعا ءتۇسىپ جاتقانىن دا جەتكىزدى. باسقوسۋدا مينيسترلىككە قاراستى جەر رەسۋرستارىن باسقارۋ كوميتەتى توراعاسىنىڭ مىندەتىن اتقارۋشى گۇل­جا­ھان بيمەندينا ءسوز سويلەپ, جەر كودەك­سىنە ەنگىزىلەتىن وزگەرىستەر مەن وسى با­عىتتا قولعا الىنعان شارالاردىڭ بارىسى جانە جەكە تۇرعىن ءۇي قۇرىلىسى ءۇشىن ون سوتىق جەر تەلىمىن بەرۋ ماسەلەسىنە ايرىقشا توقتالدى. «ەل ازاماتتارىن ون سوتىق جەر تەلىمىمەن قامتاماسىز ەتۋ­دەگى باستى ماسەلەلەردىڭ ءبىرى – ەلدى مە­كەندەر اۋماعىندا بوس جەرلەردىڭ بول­ماۋى. ال بۇعان دەيىن قامتىلعان جەر­لەردى الۋ ماسەلەسى اعىمداعى زاڭ­نامادا قاراستىرىلماعان. وسى رەتتە, جاڭا زاڭنامادا حالىق سۇرانىسىنا ءساي­كەس جەكە تۇرعىن ءۇي قۇرىلىسى ءۇشىن جەر تەلىمدەرىن مەملەكەتتىك قاجەت­تىلىك­كە جاتقىزۋ قاراستىرىلۋدا», دەدى گ.بي­مەندينا. سونىمەن قاتار, ول اۋىل شا­رۋاشىلىعى ماقساتىنداعى جەرلەر­دى پايدالانۋدىڭ زاڭدىلىعىن تەكسەرۋ بارىسىندا 3 مىڭعا جۋىق زاڭ بۇزۋ­شىلىقتاردىڭ انىقتالعانىن جانە ول جەرلەردىڭ مەملەكەتكە قايتارىلاتىنىن ءسوز ەتتى. شارا بارىسىندا سۋ رەسۋرستارى كوميتەتى توراعاسى يسلام ابىشەۆ سۋارمالى جەرلەردىڭ اينالىمعا قايتارىلۋى تۋرالى اڭگىمەلەدى. ونىڭ ايتۋىنشا, 2017-2021 جىلدار ارالىعىندا 610 مىڭ گەكتار اۋماقتاعى سۋارمالى جەرلەردىڭ يرريگاتسيالىق جۇيەلەرىن قايتا قالپىنا كەلتىرۋ كوزدەلۋدە. «بۇل اۋماقتار ەلى­مىزدىڭ 11 وبلىسىندا ورنالاسقان. قايتا قال­پىنا كەلتىرۋ جۇمىستارىنا 326 ميل­ليارد تەڭگە شاماسىندا قاراجات قاجەت. قازىرگى داعدارىس ۋاقىتىندا بۇل, ارينە, ۇلكەن سوما. سوندىقتان, اتال­عان ماسەلەنى حالىقارالىق قارجى ورتا­لىقت­ارى ارقىلى شەشۋدى جوسپارلاپ وتىرمىز. بۇل باعىتتا ءبىرشاما جۇمىستاردى ات­قارىپ تا ۇلگەردىك, ناقتى شارالار ءساۋىر-مامىر ايلارىندا باستالادى», دەدى ول. بريفينگتە اۋىل شارۋاشىلىعى مينيسترلىگى وكىلدەرى جۋرناليستەردىڭ ساۋالدارىنا جان-جاقتى جاۋاپ بەردى. اسحات رايقۇل, «ەگەمەن قازاقستان»