«قازاقستان – ەۋرازيا جۇرەگى» اتتى حالىقارالىق تەاتر فەستيۆالى باستالدى

بۇگىن تالدىقورعاندا ەل تاۋەلسىزدىگىنىڭ 25 جىلدىعىنا وراي قر مادەنيەت جانە سپورت مينيسترلىگىنىڭ قولداۋىمەن «قازاقستان – ەۋرازيا جۇرەگى» اتتى VI ورتا ازيا مەملەكەتتەرى تەاترلارىنىڭ حالىقارالىق فەستيۆالى باستالدى. فەستيۆالعا 7 تەاتر, اتاپ ايتقاندا, تاتارستاننىڭ ت.ا. مينۋللين اتىنداعى نيجنەكامسك تاتار مەملەكەتتىك دراما تەاترى, قىرعىزستاننىڭ ت.ءابدىمومىنوۆ اتىنداعى ۇلتتىق اكادەميالىق تەاترى, تاجىكستاننىڭ م.ۆوحيدوۆ اتىنداعى تاجىك مەملەكەتتىك جاستار تەاترى, ەلىمىزدەگى بايتەن وماروۆ اتىنداعى تەاتر, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, استانالىق جاستار تەاترى مەن ب.ريموۆا اتىنداعى الماتى وبلىستىق دراما تەاترلارى قاتىسادى. فەستيۆالدىڭ ماقساتى – ورتا ازيا ەلدەرى مەن قازاقستاننىڭ مادەني قارىم-قاتىناسىن ودان ءارى نىعايتۋ, قازىرگى زاماننىڭ ەستەتيكالىق تالابىنا ساي درامالىق شىعارمالاردىڭ جاڭا فورمالارىن تابۋ, ولاردىڭ دۇنيەگە كەلۋىنە ىقپال ەتۋ. بۇعان دەيىن وسىنداي فەستيۆالدار الماتى جانە اقتاۋ قالالارىندا وتكەن بولاتىن. بيىل تالدىقورعاندا 24 قازاننان باستالىپ بەس كۇنگە سوزىلاتىن فەستيۆالعا كورنەكتى تەاتر جانە كينو اكتەرى, رەجيسسەر, كسرو مەملەكەتتىك سىيلىعىنىڭ لاۋرەاتى, كسرو جانە قازاقستاننىڭ حالىق ءارتيسى, پروفەسسور ءاسانالى ءاشىموۆ باستاعان قازىلار القاسى تورەلىك ەتەدى. قازىلار القاسىنىڭ قۇرامىندا پروزايك, اۋدارماشى, دراماتۋرگ, تاجىكستان كوركەمونەر اكادەمياسىنىڭ اكادەميگى ابدۋگاففور ابدۋجاببوروۆ, تەاتر سىنشىسى, د.سيرازيەۆ اتىنداعى تەاتر سىيلىعىنىڭ لاۋرەاتى, حالىقارالىق, بۇكىلرەسەيلىك تەاتر فەستيۆالدەرى سىنشىلار القاسىنىڭ مۇشەسى نياز يگلاموۆ, تەاتر سىنشىسى, دراماتۋرگ, قىرعىز رەسپۋبليكاسى تەاتر قايراتكەرلەرى وداعىنىڭ توراعاسى جانىش كۋلمانبەتوۆ, ازەربايجان مەملەكەتتىك جاس كورەرمەندەر تەاترىنىڭ باس رەجيسسەرى, ءازىربايجان مەملەكەتتىك مادەنيەت جانە ونەر ۋنيۆەرسيتەتى «دراما تەاترىنىڭ رەجيسسۋراسى» كافەدراسىنىڭ مەڭگەرۋشىسى, دوتسەنت باحرام وسمونوۆ بار. فەستيۆالدىڭ اشىلۋ سالتاناتىن قۇتتىقتاۋ سوزبەن اشقان وبلىس اكىمىنىڭ ورىنباسارى باقتيار ونەرباەۆ قوناقتارعا جانە شاراعا قاتىسۋشىلارعا ساتتىلىك تىلەدى. سونىمەن قاتار, قازاقستان رەسپۋبليكاسى مادەنيەت جانە سپورت مينيسترلىگىنىڭ جاۋاپتى وكىلى گۇلنافيس مىرزاشەۆا مەن تاتارستان وكىلى نياز يگلاموۆ ءوز لەبىز-تىلەكتەرىن جەتكىزدى. الماتى وبلىسى اكىمدىگىنىڭ ءباسپاسوز قىزمەتىنىڭ مالىمەتىنشە, فەستيۆال اياسىندا ت.سلوبودزيانەكتىڭ «ودنوكلاسنيكي. ۋروكي جيزني», ش.ايتماتوۆتىڭ «انا – جەر انا» جانە «سابانشىنىڭ جولى», ب.ريموۆانىڭ «قوس مۇڭلىق», ا.چەحوۆتىڭ «شيە», ب.ءسوبيردىڭ ولەڭىنىڭ جەلىسى بويىنشا «نوچ ۆدالەكە وت رودينى», ۋ.شەكسپيردىڭ «اساۋعا تۇساۋ» سپەكتاكلدەرى قويىلادى. قويىلىمدار كۇندەلىكتى ب. ريموۆا اتىنداعى وبلىستىق دراما تەاترىندا ساعات 12.00-دە جانە كەشكى 18.00-دە وتەدى. كىرۋ تەگىن.