ن.نىعماتۋلين جەنەۆادا پارلامەنتارالىق وداق اسسامبلەياسىنا قاتىستى

قر پارلامەنتى ءماجىلىسىنىڭ توراعاسى نۇرلان نىعماتۋلين جەنەۆادا ءوتىپ جاتقان پارلامەنتارالىق وداقتىڭ 135-ءشى اسسامبلەياسىنا قاتىستى. «بيىل قازاقستان تاۋەلسىزدىگىنىڭ 25 جىلدىعى تويلانادى. قىسقا مەرزىمدە ەلىمىز تۇڭعىش پرەزيدەنت نۇرسۇلتان نازارباەۆتىڭ باسشىلىعىمەن جۇرگىزىلگەن ساياسي, الەۋمەتتىك-ەكونوميكالىق رەفورمالاردىڭ ارقاسىندا وراسان تابىستارعا قول جەتكىزدى. سونىمەن قاتار, جالپىعا بىردەي سايلاۋ قۇقىعى كەپىلدىگى, گەندەرلىك تەڭدىك جانە ادام قۇقىعىن قورعاۋ سالالارىندا ايتارلىقتاي جۇمىستار اتقارىلدى», - دەدى ءماجىلىس سپيكەرى. ن.نىعماتۋلين اتاپ وتكەندەي, قازاقستاندا ادام قۇقىعىن قورعاۋ باعىتىندا قارقىندى دامۋ جولىنا تۇسكەن ۇلتتىق جۇيە قالىپتاسقان. ونىڭ ماڭىزدى ەلەمەنتتەرىنىڭ ءبىرى – قر پرەزيدەنتى جانىنداعى ادام قۇقىعى جونىندەگى كوميسسيا. ءماجىلىس توراعاسىنىڭ ايتۋىنشا, سوڭعى جىلدارى ەلىمىزدە ۇلتتىق زاڭنامانى جەتىلدىرۋ جولىندا بىرقاتار ماڭىزدى رەفورما قولعا الىندى. ول ەلىمىزدىڭ دەموكراتيا ۇردىستەرى مەن ادام قۇقىن قامتاماسىز ەتۋگە دەگەن ۇستانىمىن كورسەتەدى. ايتا كەتسەك, پارلامەنتارالىق وداق 1889 جىلى قۇرىلعان. ول پارلامەنتتەردىڭ ءىس-ارەكەتىن ۇيلەستىرۋ قىزمەتىنە ارنالعان حالىقارالىق ۇيىم. پارلامەنتارالىق وداق بۇۇ-دا بايقاۋشى مارتەبەسىنە يە. قازاقستان ۇيىمعا 1993 جىلى 4 ناۋرىزدا مۇشە بولدى. قازاقستان پارلامەنتىندە پاو ۇلتتىق توبى رەتىندە ءماجىلىس توراعاسى باسقاراتىن قر پارلامەنتىنىڭ دەلەگاتسياسى قۇرىلعان.