جاڭا ترانسفورماتوردىڭ قۋاتى ون قالاعا جەتەدى

كەنتاۋ ترانسفورماتور زاۋىتى ءوزىنىڭ باستاۋىن 1959 جىلدان الادى. زاۋىت تاريحىندا ەڭ العاشقى تم-180/10 ترانسفورماتورى كونۆەيەردەن 1960 جىلدىڭ 10 ماۋسىمىندا شىعارىلعان ەكەن. 2005 جىلدان باستاپ «حالىق تۇتىناتىن تاۋارلار» اتالىمى بويىنشا «وڭتۇستىك قازاقستان وبلىسىنىڭ ۇزدىك تاۋارى» ماراپاتىنا يە بولعان كتز سودان بەرى بيىگىنەن الاسارعان جوق. 2012 جىلى «التىن ساپا» رەسپۋبليكالىق بايقاۋىندا باس جۇلدەنى جەڭىپ الدى. الەمنىڭ بىرقاتار مەملەكەتتەرىمەن ءىس­كەر­لىك قارىم-قاتىناستاعى كتز جاقىندا تۇڭعىش رەت 80 مە­گا­ۆاتتىق ترانسفورماتوردى قۇ­راستىرىپ شىعاردى. – بۇل تاريحي جاڭالىق, – دەيدى كەنتاۋ قالاسىنىڭ اكىمى ابدىباقىت ماقۇلباەۆ. – ويتكەنى, بۇعان دەيىن زاۋىت ەڭ مىقتى دەگەندە 63 مەگاۆاتت بولاتىن ترانسفورماتورلار دايىنداپ كەلگەن. ەگەر جاڭا ترانسفورماتوردىڭ قۋاتىن بايقاعىڭىز كەلسە, ول كەنتاۋ سياقتى ونشاقتى قالانى جارىقپەن تولىق قامتاماسىز ەتە الادى. زاۋىت باسشىلىعى جاڭا ترانسفورماتورعا قازىردىڭ ءوزىن­دە تاپسىرىستار ءتۇسىپ جات­قان­دىعىن ايتادى. قازىر كتز تو­لىق­تاي جاڭعىرتۋدان ءوتىپ, اۆتوماتتاندىرىلعان. ءوندىرىس كولەمى جيىرما جىلدا جيىرما ەسەگە وسسە, ءونىم كولەمى مەجەلەگەن جوسپاردان اسىپ, 11 ملرد تەڭگەگە جەتكەن. بىلتىر ەكسپورت كولەمى 33 پايىز بولسا, بيىل 40 پايىز بولدى. تاپسىرىس بەرۋشىلەردىڭ قاتارىندا بۇرىننان ارىپتەس بولعان رەسەي, قىرعىزستان, ءوز­بەكستان مەملەكەتتەرىنەن بولەك, بيىل بەلورۋسسيا مەملەكەتى قو­سىلدى. الەمدىك داعدارىس جۇمىسى جولعا دۇرىس قويىلعان, بۇگىنگى كۇن تالابىمەن ۇندەسەتىن كا­سىپ­ورىن ءۇشىن قورقىنىشتى ەمەس. كەنتاۋ ترانسفورماتور زاۋىتىنىڭ باسشىلىعى 2017 جىل­دىڭ ال­عاشقى ايلارىنا دەيىن تاپسىرىس الىپ قويعاندارىن ايتادى. باقتيار تايجان, «ەگەمەن قازاقستان» وڭتۇستىك قازاقستان وبلىسى