تەاتردىڭ اقشاسىنا توي جاساعان ديرەكتوردىڭ ىسىندە جاڭا دەرەكتەر پايدا بولدى

قوستاناي وبلىستىق قازاق دراما تەاترىنىڭ بۇرىنعى ديرەكتورى نۇرلان ەرەكەشەۆكە, باس بۋحگالتەرى  گۇلزادا بەكتۇرسىنوۆاعا جانە كاسسير-بۋحگالتەرى  مەڭسۇلۋ كۇلتاەۆاعا قاتىستى سوت بارىسىندا جاڭا دەرەكتەر اشىلا ءتۇستى. قىلمىستى جابۋ ءۇشىن ۇشەۋى اقىلداسىپ, كومەككە مەملەكەتتىك ءاۋديتتىڭ  باس مامانى دوسجان تولەباەۆتى شاقىرادى. ول كومەك بەرەتىن بولىپ اقىسىنا ۇشەۋىنەن 4 ميلليون 400 مىڭ تەڭگە الادى. ارتىنان قولىنان كەلمەگەنىن ايتىپ, اقشانى قايتا اكەپ بەرەدى. ول باس بۋحگالتەر مەن كاسسيرگە قۇجاتتاردى قۇرتۋ ءۇشىن تەاتردا ءورت ۇيىمداستىرۋعا كەڭەس بەرەدى. بىراق ايەلدەر وعان بارمايدى. تەاتر ەسەبىنەن اقشا الۋ ءۇشىن ديرەكتور مەن باس بۋحگالتەر باس رەجيسسەر ەرسايىن تولەۋبايدان 5 پەسا «ساتىپ العان» بولىپ, ونىمەن 5 ميلليون تەڭگەگە كەلىسىم-شارتقا  وتىرادى. وسى اقشانى كۇلتاەۆانىڭ  «ءىستى ءبىتىرىپ بەرەمىن» دەگەن تانىسى ۆيكتور بولتس دەگەن كاسىپكەر تانىسىنا بەرەدى. بولتس ءوزىنىڭ استاناداعى ۇلتتىق گۆارديادا قىزمەت ىستەيتىن اسقار اقداۋلەتوۆ دەگەن تانىسى بار ەكەنىن ايتىپ,  ونىڭ ءىستى شەشىپ بەرەتىنىنە سەندىرەدى.  اقداۋلەتوۆ ءىستى تىندىرۋ ءۇشىن تاعى دا 16 ميلليون تەڭگە سۇراتقانىن ايتادى. كۇلتاەۆا 16 ميلليون تەڭگەنى تابۋ ءۇشىن پاتەرىن, ماشيناسىن ساتادى, 4 ميلليون تەڭگەنى تەاتردىڭ ەسەبىنەن الادى. اقشانى اقداۋلەتوۆ كەلىپ, كۇلتاەۆادان الىپ كەتەدى. ول اقشانىڭ ءبىر بولىگى وڭىردەگى ءبىر ءىرى شەنەۋنىككە بەرىلەتىنىن ايتقان. بىراق اقداۋلەتوۆ تە, 21 ميلليون تەڭگە دە  سول كۇيى جوق بولادى.  ول سوتقا بىرنەشە رەت شاقىرىلسا دا كەلگەن جوق. ءنازيرا جارىمبەتوۆا, قوستاناي