قازاقستان مەن قىرعىزستان تىركەۋسىز ەكى ەلدە بولۋ مەرزىمىن ۇزارتادى

بۇگىن استانادا قازاقستان مەن قىرعىزستاننىڭ سىرقى ساياسات ۆەدومستۆولارىنىڭ باسشىلارى ەرلان ىدىرىسوۆ پەن ەرلان ابدىلداەۆ بىرقاتار ماڭىزدى قۇجاتتارعا قول قويدى. تاراپتار قازاقستان رەسپۋبليكاسى مەن قىرعىز رەسپۋبليكاسى ازاماتتارىنىڭ ەكى ەل اۋماعىندا بولۋ ءتارتىبى تۋرالى كەلىسىمگە وزگەرىس ەنگىزۋ تۋرالى حاتتاماعا, رەادميسسيا تۋرالى كەلىسىم جانە 2017-2018 جىلدارداعى قازاقستان رەسپۋبليكاسى سىرتقى ىستەر مينيسترلىگى مەن قىرعىز رەسپۋبليكاسى سىرتقى ىستەر مينيسترلىگى اراسىنداعى ىنتىماقتاستىق باعدارلاماسىنا قول قويدى. «ءبىز ازاماتتارىمىزدىڭ ەكى ەلدە تىركەۋسىز بولۋىن رەتتەيتىن قۇجاتقا قول قويدىق. بۇل ەكى ەل ازاماتتارىنىڭ ەكى ەل اۋماعىندا بولۋ ءتارتىبى تۋرالى كەلىسىمگە وزگەرىس ەنگىزۋ تۋرالى حاتتاما. وسىعان سايكەس ەكى ەل ازاماتتارى 30 كۇنگە دەيىن تىركەۋسىز ەكى ەلدىڭ اۋماعىندا بولا الادى. ارينە, بۇل قۇجات مەملەكەت ىشىندەگى بەكىتۋ راسىمدەرىن تالاپ ەتەدى. ءبىز ەكى ەلدىڭ ازاماتتارى كۇتىپ جۇرگەن وسى قۇجات بەكىتۋ كەزىندە پارلامەنتتە كىدىرىپ قالمايدى دەگەن سەنىمدەمىز», - دەپ حابارلادى  ە. ابدىلداەۆ. سونداي-اق, مينيسترلەر شەكاراداعى وتكىزۋ پۋنكتەرىنىن دامىتۋ ماسەلەلەرىن تالقىلادى. «بۇل جۇمىس باستالىپ كەتتى جانە سايكەسىنشە ناتيجەسىن بەرىپ جاتىر. ءبىز جۇمىستى توقتاتپاي, ەكى ەل ازاماتتارىنا ءبىر-ءبىرىنىڭ ەلىنە باراردا جايلى جاعداي جاساۋ ءۇشىن, بارلىق شەكارا بويىنشا, بارلىق باقىلاۋ-وتكىزۋ پۋنكتەرىندە جۇمىستاردى جالعاستىرامىز دەپ كەلىستىك», - دەدى قىرعىزستان ءسىم باسشىسى. ە. ابدىلداەۆ قىرعىز دەلەگاتسياسىنىڭ كەلىسسوزدەردىڭ قورىتىندىسىنا كوڭىلدەرى تولاتىندىعىن ايتتى. ونىڭ ايتۋىنشا, ەلدەر اراسىنداعى قارىم-قاتىناستىڭ ىلگەرىلەمەلى دامۋ سەرپىنى بار. «بىزدە بىرقاتار شەشىلمەگەن ماسەلە بولسا دا, مازمۇندى اتقارىلعان جۇمىس كولەمى مەن ايتارلىقتاي الەۋەت بار. ەڭ باستىسى بىزدە كۇن تارتىبىندە تۇرعان بارلىق ماسەلەلەردى شەشۋگە دەگەن نيەت پەن ۇلكەن ۇمتىلىس بار. ءبىز وداقتاس, اعايىندى مەملەكەتتەرمىز. ءبىز سونداي بولدىق, سولاي بولىپ قالامىز دا», - دەدى ول.