ەلباسى قىرعىزستان سىرتقى ىستەر مينيسترىمەن كەزدەستى

قازاقستان پرەزيدەنتى نۇرسۇلتان نازارباەۆ قىرعىز رەسپۋبليكاسىنىڭ سىرتقى ىستەر ءمينيسترى ەرلان ابدىلداەۆپەن كەزدەستى, دەپ حابارلايدى اقوردانىڭ ءباسپاسوز قىزمەتى. كەزدەسۋ بارىسىندا قازاقستان مەن قىرعىزستاننىڭ ءوزارا ءىس-قيمىلىنىڭ باستى باعىتتارى جانە ەكى ەلدىڭ بىرلەسكەن جۇمىسىنىڭ الداعى پەرسپەكتيۆالى سالالارى تالقىلاندى. بۇدان بولەك, تاراپتار وڭىرلىك جانە حالىقارالىق كۇن تارتىبىندەگى وزەكتى جايتتار جونىندە پىكىر الماستى. نۇرسۇلتان نازارباەۆ قازاقستان مەن قىرعىزستاندى تاريحي دوستىق جانە تىعىز ىنتىماقتاستىق بايلانىستىرىپ وتىرعانىن اتاپ ءوتتى. - ەلدەرىڭىز ءبىزدىڭ جاقىن كورشىمىز ءارى سەرىكتەسىمىز بولىپ سانالادى. ارامىزدا ەشقانداي شەشىلمەگەن ماسەلە بولماۋعا ءتيىس جانە قارىم-قاتىناسىمىز باسقالارعا ۇلگى بولۋى كەرەك. الەمدەگى كۇردەلى ەكونوميكالىق جانە ساياسي احۋالدى ەسكەرە وتىرىپ, بىرگە بولۋىمىز قاجەت, - دەدى قازاقستان پرەزيدەنتى. ە.ابدىلداەۆ قىرعىزستان پرەزيدەنتى ا.اتامباەۆتىڭ سالەمىن جەتكىزىپ, ەكىجاقتى ىنتىماقتاستىقتىڭ ودان ءارى نىعايا بەرەتىنىنە سەنىم ءبىلدىردى.