شەتەلدىك حيرۋرگتار باۋىرعا وتا جاساۋ تاجىريبەسىمەن ءبولىستى

وڭتۇستىك قازاقستان وبلىستىق كلينيكالىق اۋرۋحانانىڭ دارىگەرلەرى شەتەلدىك ماماندارمەن بىرىگىپ وتا جاسادى, دەپ حابارلايدى وبلىس اكىمىنىڭ ءباسپاسوز قىزمەتى. وسى تاجىريبە ارقىلى ولار بىلىكتىلىگىن ارتتىرۋدا. بۇل جولى مەديتسينالىق مەكەمەگە وڭتۇستىك كورەيادان حيرۋرگتار كەلىپ, باۋىرعا كۇردەلى وتا جاسالدى. بۇل دارىگەرلەر وبلىستىق كلينيكالىق اۋرۋحاناعا العاش كەلىپ وتىر. وڭتۇستىككورەيالىق ماماندار اقىلى حيرۋرگيا ءبولىمىنىڭ جۇمىسىمەن ءجىتى تانىسىپ, 36 جاستاعى ازاماتقا كۇردەلى وتا جاسادى. ەكى ەلدىڭ دارىگەرلەرى بىرلەسىپ جاساعان وپەراتسيادا ناۋقاستىڭ باۋىرىنىڭ جارامسىز بولىگى قاۋىپسىز جولمەن الىندى. كۇردەلى وتانىڭ ناتيجەسىندە الگى ازامات امان قالدى. ەندى باۋىر اۋرۋى مازالاماۋى ءتيىس دەيدى دارىگەرلەر. كلينيكالىق اۋرۋحانانىڭ ءبولىم مەڭگەرۋشىس جانبولات دىلدابەكوۆتىڭ ايتۋىنشا, بۇرىن باۋىردىڭ قۇرتىن اشىپ تازالايتىن بولسا, قازىر باۋىردى اشپاي, ساۋ جەرىنە تيىسپەي جارامسىز جەرىن عانا الىپ تاستاۋعا بولادى ەكەن. وسى ورايدا ايتا كەتۋ كەرەك, جىل باسىنان بەرى وبلىستىق كلينيكالىق اۋرۋحانادا باۋىرعا قاتىستى 13 وتا جاسالعان. ەڭ باستىسى, ناتيجەسى قاناعاتتانارلىق. ەندى كۇنگەيلىك دارىگەرلەر وڭتۇستىك كورەيا ماماندارىنان ترانسپلانتاتسيالىق وتا جاساۋ ءادىسىن مەڭگەرۋدە. ول ءۇشىن شەتەل اسىپ, ارنايى وقىپ كەلگەن ماماندار دا بار. سول دارىگەرلەر وبلىستىق كلينيكالىق اۋرۋحانادا بيىل العاش رەت بۇيرەك الماستىرۋ وتاسىن ويداعىداي ىسكە اسىرعان.