جاسوسپىرىمدەردىڭ جاھاندىق جارىسى

ءوز قاتارىنداعى مىقتىلاردى انىقتادى رەسەيدىڭ حانتى-مانسي (يۋگرا) اۆتونوميالى وكرۋگىندە بۇرناعى كۇنى مارەگە جەتكەن جاسوسپىرىمدەر اراسىنداعى الەم چەمپيوناتى ەڭ سوڭعى تۋرعا دەيىن بارىنشا تارتىستى ءوتتى. مۇندا تەك 14 جاسقا دەيىنگى ۇلدار باسەكەسىندە ءۇشىنشى راۋند­تان توپ باستاعان رەسەيلىك سەمەن لوماسوۆ قانا پوزيتسياسىن ساق­تاپ قالا الدى. كەلەسى رەسەيلىك اندرەي ەسيپەنكو كۇمىس مەدالعا قول جەتكىزدى. ءۇشىنشى ورىنعا كەيىنگى تۋرلاردا ءساتتى ويناعان وزبەكستاندىق نوديربەك ياكۋببوەۆ كوتەرىلدى. ال ءبىزدىڭ ۇلانداردان ەڭ جوعارى ناتيجە كورسەتكەن رامازان جالماحانوۆ 20-ورىنعا تۇراق­تا­دى. كەلەسى وكىلىمىز رۋسلان ءسالىموۆ چەمپيوناتتى 40-شى بولىپ اياقتادى. وسى جاستاعى قىزداردىڭ سا­يىسىندا رەيتينگىدە 12-ءشى بولىپ تۇرعان قىتايلىق جينەر چجۋ توپ جاردى. ول ءتورتىنشى تۋردان باستاپ توپ باسىنا تالاسقانىمەن, تۋر­نيردىڭ سوڭىنا دەيىن سول ورىندى ساقتاپ قالا الاتىنى كۇماندى بولدى. دەگەنمەن, ءبىرىنشى ورىندى ەشكىمگە بەرە قويمادى. بۇدان كەيىن رەسەيلىك الەكساندرا مالتسەۆسكايا – كۇمىس, اقش وكىلى اننە ۆانگ قولا مەدالدار يەلەندى. بۇل ورتاداعى ءبىزدىڭ اسەل سەرىكباي – 22-ءشى, ال ساقىپجامال بارماعامبەتوۆا 32-ءشى ورىندارعا ورنالاستى. 16 جاسقا دەيىنگى ەر بالالار توبىندا ارميان حايك مارتيروسيان چەمپيوندىق القا تاقتى. ەكىنشى ورىنعا رەسەيلىك ولەكساندر ترياپيشكو, ءۇشىنشى ساتىعا ۆەت­نامدىق تحانگ ترون مينگح ورنا­لاس­تى. بارلىق كاتەگورياداعى قازاق­­ستاندىقتار اراسىنان ۇزدىك شىق­قان وسى شوعىرداعى جاندوس اعمانوۆ 11-ورىنعا تابان تىرەدى. بۇدان ءارى دەنيس ماحنەۆ – 22-ءشى, داستان تۇرار – 25-ءشى, تيمۋر نۇرجانوۆ 37-ءشى ورىندارعا جاي­عاستى. وسى جاستاعى قىزدار جارى­سىندا العاشقى ءۇش ورىندى ءۇندى­ستاندىق اكانكشا حاگاۆانە, يران­دىق موبينە اليناساب جانە رەسەي­لىك پولينا شۋۆالوۆا ءبولىستى. ءبىزدىڭ قىزداردان اليسا قوزىباەۆا – 41-ءشى, ارناش باۋىرجان 46-شى بولدى. جاستارى 18-گە دەيىنگىلەردىڭ اراسىندا ارميان مانۆەل پەتروسيان, رەسەيلىك ماكسيم ۆاۆۋلين, يران­دىق شاحين لورپاريزانگەنە ءجۇل­دەگەرلەر شوعىرىن قۇرادى. ال قازاقستاندىقتار ارىستانبەك ورازاەۆ – 31-ءشى, جانات سايىن – 40-شى, ايرات سادۋباەۆ 61-ءشى ورىننان تابىلدى. وسى دەڭگەيدەگى قىزدار توبىنداعى جالعىز وكىلى­مىز ديليارا البەكوۆانىڭ العان اسۋى دا مىقتى بولا قويمادى. ول مارە­گە 41-ءشى بولىپ جەتتى. ءجۇل­دەگەر­لەر تۇعىرىنا گرەك ستاۆروۋلا تسولاكيدوۋ, رەسەيلىك الەك­ساندرا وبولەنتسەۆا جانە يزرايل­دىك ميچەل لاحاۆ كوتەرىلدى. سەرىك ءپىرنازار, «ەگەمەن قازاقستان»