جاس ۇلاندار انت بەردى

بۇگىن استانادا ساعادات نۇرماعامبەتوۆ اتىنداعى «جاس ۇلان» رەسپۋبليكالىق اسكەري مەكتەبىنە جاڭادان قابىلدانعان 62 ۇلان انت بەردى. ورتاعا كوك بايراعىمىز اكەلىنىپ, ىلە ءانۇران شىرقالعاننان كەيىن وقۋشىلاردىڭ انت قابىلداۋ ءراسىمى باستالدى. جيىن بارىسىندا اسكەري مەكتەپ باسشىسى, پولكوۆنيك مۇحتار مايكەەۆ: «1999 جىلدىڭ 4 قاراشاسىندا رەسمي تۇردە اشىلعان «جاس ۇلان» رەسپۋبليكالىق اسكەري مەكتەبى – ەلىمىزدىڭ قارۋلى كۇشتەرى سالاسىنا قىزمەت ەتۋدى ماقسات ەتكەن جەتكىنشەكتەردى تاربيەلەۋدە وزىندىك ورنى بار ءبىلىم وشاعى. قۇرىلعالى بەرگى 17 جىلدىڭ ىشىندە 700-دەن استام جاس تۇلەكتى تاربيەلەپ شىعارعان مەكتەپتىڭ تۇساۋىن ەلباسىنىڭ ءوزى كەسكەنى, سونداي-اق, ءبىلىم ۇياسىنا كەڭەس وداعىنىڭ باتىرى, حالىق قاھارمانى, قازاق حالقىنىڭ اتى اڭىزعا اينالعان باتىرى, ارميا گەنەرالى ساعادات نۇرماعامبەتوۆتىڭ ەسىمى بەرىلۋى ءبىزدىڭ ۇجىمعا ۇلكەن جاۋاپكەرشىلىك جۇكتەيدى. مىنە, وزدەرىڭىز كۋا بولىپ وتىرعانداي, مەكتەبىمىزگە بيىل قابىلدانعان 62 وقۋشى انت قابىلداۋ ۇستىندە. بۇل شارانىڭ ماڭىزى وتە زور», دەدى. شارا كەزىندە مەكتەپتەگى 4-وقۋ روتاسىنىڭ كومانديرى, اعا لەيتەنانت مارات بەيسەنبەكوۆ: «مەكتەبىمىزدە ۇلاندارعا وتانسۇيگىشتىك تاربيە بەرۋ بارىسىندا اسكەري پاتريوتتىق تاربيەگە, ەلباسى ۇسىنعان «ماڭگىلىك ەل» يدەياسىن تۇسىندىرۋگە باسىمدىقتار بەرىلەدى. سونداي-اق, ۇلاندارعا ار-نامىس, ادامگەرشىلىك, ادامنىڭ قۇقىقتارى مەن بوستاندىعىن سىيلاۋ قاعيداتتارىن ۇيرەتۋگە باسا نازار اۋدارىلادى», دەدى. انت قابىلداۋ ءراسىمى اياقتالعان سوڭ قورعانىس مينيسترلىگىنىڭ وكىلدەرى, ارداگەرلەر, ۇستازدار مەن اتا-انالار ءسوز سويلەپ, جاس ۇلاندارعا تابىس تىلەپ, پاراساتتى سوزدەرىن ارنادى. جولدىباي بازار