مەملەكەت باسشىسى ۇلتتىق بانك توراعاسىن قابىلدادى

قازاقستان پرەزيدەنتى ۇلتتىق بانك توراعاسى دانيار اقىشەۆتى قابىلدادى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان ەگەمەن-اقپارات حابارلادى. كەزدەسۋ بارىسىندا د.اقىشەۆ مەملەكەت باسشىسىنا ۇلتتىق بانكتىڭ قازىرگى قىزمەتى تۋرالى باياندادى. نۇرسۇلتان نازارباەۆ قارجى نارىعىن رەتتەۋشى رەتىندەگى ۇلتتىق بانك جۇمىسىنىڭ ماڭىزدىلىعىنا نازار اۋداردى. ۇلتتىق بانك توراعاسى ەلباسىنا ۆاليۋتا نارىعى مەن ينفلياتسيا ۇدەرىستەرىندەگى جاعداي تۋرالى مالىمدەدى. – بيىلعى 8 ايدا ينفلياتسيا 5,4% بولدى. ءسىزدىڭ تاپسىرماڭىزعا سايكەس, ۇكىمەت پەن جەرگىلىكتى اتقارۋشى ورگاندار باعانىڭ نەگىزسىز وسۋىنە جول بەرمەۋ شارالارىن ىسكە اسىرۋدا. مۇناي باعاسى مەن رەسەي ءرۋبلى باعامىنىڭ تۇراقتانۋى جاعدايىندا ۆاليۋتا نارىعىنداعى احۋال قالىپقا ءتۇستى, – دەدى د.اقىشەۆ. بۇدان بولەك, ۇلتتىق بانك توراعاسى ۇلتتىق ۆاليۋتاداعى دەپوزيتتەر سانىنىڭ ارتقانىن ايتتى. سونداي-اق, نەسيەلەندىرۋدى جانداندىرۋ ۇدەرىسىندە وڭ قارقىن بايقالادى. اتاپ ايتقاندا, جىل باسىنان بەرى شاعىن كاسىپكەرلىك سەكتورىن نەسيەلەندىرۋ 35%-عا ارتقان. كەزدەسۋ قورىتىندىسى بويىنشا پرەزيدەنت بىرقاتار ناقتى تاپسىرما بەردى. ەگەمەن-اقپارات