كادىمگى تۇبىرتەكتەردى ويناتىپ اۆتوكولىك ۇتىپ الۋعا بولادى

 ەندى قازاقستاننىڭ كەز كەلگەن ازاماتى كادىمگى تاۋار ساتىپ العان كەزدە بەرىلەتىن تۇبىرتەكتەرمەن لوتەرەياعا قاتىسىپ, باعالى جۇلدەلەر ۇتىپ الۋىنا بولادى. قازاننىڭ 1-ىنەن «تۇبىرتەكتى تالاپ ەتىپ جۇلدە ۇتىپ ال» اتتى اكتسيا باستالادى. ونىڭ ماقساتى ازاماتتاردىڭ توۆار, جۇمىس جانە قىزمەت تۇتىنۋشىسى رەتىندەگى ءوز مۇددەلەرىن قورعاۋ بويىنشا قۇقىقتىق مادەنيەتىن قالىپتاستىرۋ. مەملەكەتتىك كىرىستەر كوميتەتىنىڭ رەسمي وكىلى مۇراتباي جۇمانبايدىڭ ايتۋىنشا مۇنداي اكتسيا وتكەن جىلى ايماقتاردا وتكىزىلگەن. ونىڭ اياسىندا 200-دەن اسا جۇلدە, ونىڭ ىشىندە باس جۇلدە – Chevrolet ماركاسىنىڭ اۆتوكولىگى ۇتىسقا سالىنىپ, ءوز يەلەرىن تاپقان. ازاماتتار اكتسياعا قاتىسۋى ءۇشىن ساتىپ العان تاۋار, قىزمەت نەمەسە جۇمىس بويىنشا فيسكالدى تۇبىرتەكتەردى مەملەكەتتىك كىرىس ورگاندارىنا بەرۋى كەرەك ەدى. رەسپۋبليكا بويىنشا اكتسياعا 2 ملن. اسا ادام قاتىسىپ, 10 ملن. اسا تۇبىرتەك جىبەردى. اكتسيانى وتكىزۋ ناتيجەسىندە زاڭنان تىس جۇمىس ىستەپ كەلگەن 9 مىڭنان اسا جەكە كاسىپكەر سالىقتىق تىركەۋگە قويىلدى, 8 مىڭنان استام باقىلاۋ كاسسالىق اپپاراتتار تىركەلگەن. «قازاقستاندىقتار وزدەرىنىڭ بەلسەندى ارەكەتى ارقىلى كولەڭكەلى ەكونوميكا كولەمىنىڭ ازايۋىنا جانە كاسىپكەرلەر اراسىندا ادال باسەكەلەستىكتىڭ دامۋىنا ءوز ۇلەستەرىن قوسادى» دەيدى مۇرات جۇمانباي ءبىر جەردە تۇبىرتەكتەر WhatsApp قوسىمشاسى ارقىلى قابىلدانسا, ەندى ءبىر جەردە قاعاز لوتەرەيا بيلەتتەرىنە اۋىستىرىلىپ, جەڭىمپازدار لوتەرەيالىق بارابان ارقىلى انىقتالدى. «بيىل اكتسيا «اتامەكەن» ۇلتتىق كاسىپكەرلەر پالاتاسىنىڭ قارجىلىق قولداۋىمەن ەلەكتروندىق فورماتتا كولەڭكەلى ەكونوميكاعا قارسى «Wipon» ءموبيلدى قوسىمشاسى ارقىلى وتكىزىلەدى», - دەپ ەسكە سالدى م.جۇمانباي. بۇل ءموبيلدى قوسىمشا تازا قازاقستاندىق ءونىم. ونى اقىسىز كوشىرىپ الىپ, سمارتفونداردىڭ بارلىق تۇرلەرى مەن باسقا دا گادجەتتەردە پايدالانۋعا بولادى. اكتسياعا ساتىپ الىنعان تاۋار, جۇمىس نەمەسە قىزمەت ءۇشىن بەرىلگەن فيسكالدى تۇبىرتەك فوتوسىن جىبەرگەن قازاقستان رەسپۋبليكاسىنىڭ ازاماتتارى قاتىسا الادى. ەگەر فيسكالدى تۇبىرتەك بەرىلمەگەن جاعدايدا, ازاماتتار بۇل بۇزۋشىلىقتاردى كورسەتىپ شاعىم جىبەرە الادى. ۇتىس جەڭىمپازدارى تۇبىرتەكتى كەزدەيسوق تاڭداۋ ادىسىمەن انىقتالاتىن بولادى. جىبەرگەن چەك كوپ بولعان سايىن جۇلدەنى ۇتىپ الۋ مۇمكىندىگى دە وسە تۇسەدى. اكتسيا 2016 جىلعى 1 قازان مەن 15 جەلتوقسان ارالىعىندا وتكىزىلەدى. وسى كەزەڭدە بارلىق وبلىستار مەن استانا جانە الماتى قالالارىندا اي سايىن جۇلدەلەر تابىستالادى. فينال جىلدىڭ اياعىندا مەملەكەتتىك كىرىستەر كوميتەتىندە بولادى. وندا باعالى جۇلدەلەر, ونىڭ ىشىندە باس جۇلدە – اۆتوكولىك ۇتىسقا سالىنادى. ەسكەرتە كەتەتىن جايت, قايتالانىپ جىبەرىلگەن چەكتەر ۇتىسقا قاتىسپايدى! «جەڭىمپازدار اشىق تۇردە وبەكتيۆتى انىقتالۋى ءۇشىن وبلىس ورتالىقتارى مەن استانا جانە الماتى قالالارىندا, سونداي-اق مەملەكەتتىك كىرىستەر كوميتەتىنىڭ جانىندا قۇرامىنا كاسىپكەرلەر قاۋىمداستىعى, ۇكىمەتتىك ەمەس ۇيىمدار مەن بۇقارالىق اقپارات قۇرالدارىنىڭ وكىلدەرى كىرەتىن كوميسسيالار قۇرىلادى» دەدى مۇرات جۇمانباي. ايگەرىم توقسانبەك