وڭتۇستىك قازاقستان وبلىسىنىڭ ماقتاارال اۋدانىندا 330 مىڭ حالىق تۇرادى. ولار نەگىزىنەن ماقتا وندىرۋمەن اينالىسادى. اۋدان رەسپۋبليكادا وندىرىلەتىن ماقتانىڭ 70 پايىزىنا جۋىعىن بەرەدى. اۋداندا 136 مىڭ گەكتار سۋارمالى جەرلەردىڭ 83 مىڭىنا ماقتا ەگىلىپ, جىل سايىن مول ءونىم الىپ كەلگەن.
الايدا, سوڭعى جىلدارى اۋدانداعى سۋارمالى جەرلەردى اعىن سۋمەن قامتاماسىز ەتۋ ۇلكەن پروبلەماعا اينالۋدا. اعىن سۋ قىرعىز, وزبەك, تاجىك مەملەكەتتەرى ارقىلى وتەتىن سىرداريا وزەنىنەن الىنادى. ماقتاارال اۋدانىنىڭ ۇشتەن ەكى بولىگىن اعىن سۋمەن قامتاماسىز ەتەتىن «دوستىق» كانالى وزبەكستان اۋماعىنان باستاۋ الادى جانە ول سول ەلدىڭ مەنشىگىندە.
بيىلعى جىل اۋدان بويىنشا قاجەتتى 1ملرد 116 ملن تەكشە مەتر اعىن سۋدىڭ 980 ميلليونى عانا نەمەسە 87,8 پايىزى الىندى. ونىڭ ءوزى دە كەشىگىپ, ۆەگەتاتسيانىڭ سوڭىنا قاراي بەرىلدى. ال اعىن سۋدىڭ ەڭ كەرەك كەزى شىلدە مەن تامىز ايىنىڭ باسىندا «دوستىق» كانالىنان قاجەتتى 310 ملن تەكشە مەتر سۋدىڭ 93 ميلليونى عانا بەرىلىپ, ەگىلگەن داقىلدار, اسىرەسە, ماقتا شىلدەدەگى 45-47 گرادۋس اپتاپ ىستىقتا سۋارىلماي, شولدەن زارداپ شەكتى, 1500 گا جەر مۇلدە سۋارىلماي قالدى. ارينە, بۇل جاعدايدا ماقتانىڭ ونىمدىلىگى, سورتى, سالماعى تومەندەيدى. شارۋالاردىڭ الا جازداي اپتاپ ىستىقتا ەتكەن ەڭبەكتەرىنىڭ قايتارىمى تومەن بولادى. مۇنداي جاعدايلار سىرداريا باسسەينىندە ورنالاسقان مەملەكەتتەردىڭ ۇكىمەتتەرى اراسىندا وزەن سۋىن ءتيىمدى پايدالانۋ تۋرالى الدىن الا كەلىسپەۋشىلىكتىڭ جانە تۋىنداعان پروبلەمالاردىڭ ۇكىمەتارالىق دەڭگەيلەردە الدىن الا ۋاقتىلى شەشىلمەۋىنىڭ سالدارىنان بولىپ وتىر. وسىعان سايلاۋشىلار تامىز ايىنىڭ سوڭىندا بولعان كەزدەسۋلەردە وزدەرىنىڭ نارازىلىقتارىن ايتا كەلە, الداعى كەزدە وسى ماسەلەنىڭ وڭ شەشىلۋىنە ىقپال ەتۋدى مەنەن تىلەك ەتكەن بولاتىن.
مىنە, وسى تىلەكتى ەسكەرە كەلە, ۇكىمەت باسشىسى باقىتجان ساعىنتاەۆقا تومەندەگىدەي ءوتىنىش بىلدىرىلگەن دەپۋتاتتىق ساۋال جولدادىم:
- وڭتۇستىك قازاقستان جانە قىزىلوردا وبلىستارىن اعىن سۋمەن تۇراقتى قامتاماسىز ەتۋ ءۇشىن شەكارالىق سىرداريا وزەنىنىڭ سۋىن ءتيىمدى پايدالانۋ تۋرالى ءتيىستى مەملەكەتتەردىڭ ۇكىمەتتەرىمەن الدىن الا جىل باسىنان ناقتى شارالار قاراستىرىپ, ونىڭ ورىندالۋىن قاتاڭ باقىلاۋعا الۋدى;
- وڭتۇستىك قازاقستان وبلىسى ماقتاارال اۋدانىن اعىن سۋمەن قامتاماسىز ەتەتىن وزبەكستان مەنشىگىندەگى «دوستىق» كانالى ارقىلى بەرىلەتىن اعىن سۋ كولەمىن ناقتىلاپ, الدىن الا ۇكىمەتارالىق كەلىسىمشارت جاساۋ تۋرالى تاپسىرما بەرۋىڭىزدى وتىنەمىن.
