شەكتەن شىقپا, شەنەۋنىك

جاڭادان قۇرىلعان قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى جاقتان جاقسىلىقتىڭ نىشانىنداي جاعىمدى ءبىر جاڭالىق كەلىپ جەتتى. ەندى الداعى ۋاقىتتا اگەنتتىك سىبايلاس جەمقورلىققا قارسى زاڭنامالاردى بۇزۋشىلىققا جانە مەملەكەتتىك قىزمەتشىلەر تاراپىنان سىبايلاس جەمقورلىققا توزبەۋ پرينتسيپتەرىنىڭ بۇلجىتپاي ورىندالۋىنا باسىمدىق بەرمەكشى ەكەن. باسقالاي ايتقاندا, اگەنتتىك پاراقورلاردى اۋىزدىقتاۋعا بەل شەشىپ كىرىسەتىن سەكىلدى. قارقىنى وسىنى اڭعارتادى. اگەنتتىكتەن كەلىپ تۇسكەن اق­پاراتقا سۇيەنسەك, ەندىگى جەردە كوزىن شەل باسقان شەنەۋنىكتەر­دىڭ, مەملەكەتتىك قىزمەتشىلەردىڭ بەي­ادەپ ارەكەتتەرىنە قاتىستى ازاماتتاردىڭ شاعىمدارى تۇ­راقتى تۇردە تىركەۋگە الىنادى. ازاماتتار كوبىنەسە مەملەكەتتىك قىزمەتشىلەردىڭ اراسىنداعى ءبىر-بىرىنە ىقىلاس تانىتۋ كەڭىنەن تارالعاندىعىن اتاپ كورسەتەدى ەكەن. بۇلار – سىيلىقتار بەرۋ جانە ءارتۇرلى ىڭعايداعى كوڭىل كوتەرەتىن شارالار ۇيىمداستىرۋ, قىزمەتتىك سۋبورديناتسيانىڭ ساقتالماۋى. اگەنتتىكتىڭ اقپاراتى بويىنشا, مۇنداي جاعدايلاردىڭ پايدا بولۋىنىڭ باستى سەبەبى, وزىنەن تومەنگى مەملەكەتتىك ورگانداردىڭ قىزمەتىن تەكسەرۋ ماقساتىنداعى قىزمەتتىك ءىسساپارلار بولىپ تابىلادى. ادەتتە, تەكسەرۋ كەزىندە لاۋازىمدى تۇلعالاردى كوڭىل كوتەرەتىن مەكەمەلەرگە اپارۋ, ولار­عا قىمبات سىيلىقتار سىيلاۋ, قوناق ءۇي اقىسىن تولەۋ, سونداي-اق تەكسەرىستىڭ ناتيجەسى جاقسى بولۋى ءۇشىن پارا ۇسىنىلادى. ماسەلەن, اگەنتتىك تاراپىنان قاراعاندى وبلىسىنا كوشپەلى تەكسەرىسپەن بارعان قارجى باقى­لاۋ كوميتەتىنىڭ لاۋازىمدى تۇل­عالارىنا «ەرەكشە قاتىناس» فاك­تىلەرى انىقتالدى. وسىنداي زاڭ بۇزۋشىلىقتار وڭىرلىك مەك­تەپتەردى تەكسەرگەن وڭتۇستىك قا­زاق­ستان جانە اقتوبە وبلىستارى بويىنشا ءبىلىم سالاسىن باقىلاۋ بويىنشا دەپارتامەنتتەردىڭ لاۋازىمدى تۇلعالارى تاراپىنان دا تىركەلدى. وسىعان ۇقساس فاكتىلەر دەنساۋلىق ساقتاۋ جانە جەر قاتىناستارى سالاسىندا دا كەزدەستى. بۇدان باسقا باسشىلاردىڭ تۋعان كۇندەرىن تويلاتۋ ءۇشىن قىزمەتكەرلەردەن اقشا جيناۋ فاك­تىسى دە كەزدەسەدى. بۇگىنگى كۇنگە دەيىن مۇنداي كورىنىس ورتالىق, سونداي جەرگىلىكتى دەڭگەيدەگى, جالپى بارلىق مەملەكەتتىك اپپاراتقا ءتان دەپ ايتۋعا بولادى. قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ازاماتتاردىڭ وسىنداي شاعىمدارى قاتاڭ با­قىلاۋعا الىنىپ, مەملەكەتتىك قىزمەتشىلەردى ادەپ نورمالارى مەن سىبايلاس جەمقورلىق شەك­تەۋ­لەردى بۇلجىتپاي ورىنداۋىنا كەپىلدىك بەرەدى. اگەنتتىكتە تەگىن كونسۋل­تاتيۆ­تىك ورتالىق جۇمىس ىستەيدى, وعان 1424 ءنومىرى ارقىلى قازاقستان بويىنشا حابارلاسۋعا بولادى. سىزدەردىڭ بارلىق شاعىمدارىڭىز قابىلدانادى جانە قارالادى. اگەنتتىك وسىلاي دەيدى. باس­قاسىن قايدام, اگەنتتىكتىڭ انت-سۋ ىشپەسە دە جىبەرگەن وسى حا­بار­لاماسىنىڭ ءوزى كوڭىلگە كادىمگىدەي دەم بەرىپ وتىر... عابيت ىسكەندەر ۇلى, «ەگەمەن قازاقستان»