«دەنساۋلىق» پويىزى اقتوبەگە اتتاندى

اقتوبە وبلىسىنىڭ شالعايداعى ەلدى مەكەندەرىنىڭ تۇرعىندارىنا, تەمىرجولشىلارىنا جانە ولاردىڭ وتباسى مۇشەلەرىنە ەندى دياگنوستيكالىق تەكسەرىلۋ جانە مەديتسينالىق كومەك الۋ ءۇشىن رەسپۋبليكامىزدىڭ ءىرى قالالارىنا بارماي-اق, تولىق مەديتسينالىق تەكسەرىستەن وتۋگە جانە جەتەكشى مامانداردىڭ بىلىكتى كەڭەسىن الۋعا مۇمكىندىك بار. اقتوبە وبلىسىنىڭ الىستاعى ستانسالارىنا ەلىمىز تاۋەلسىزدىگىنىڭ 25 جىلدىعىنا ارنالعان رەسپۋبليكالىق اكتسيا اياسىندا «دەنساۋلىق» كەڭەستىك-دياگنوستيكالىق پويىزى جول تارتادى. «دەنساۋلىق» پويىزى وبلىستىڭ 6 ستانساسىنا قىزمەت كورسەتۋدى جوسپارلاپ وتىر. 29 قىركۇيەك كۇنى العا ستانساسىنان باستاپ, ودان ءارى كەستە بويىنشا 4-9 قازان ارالىعىندا مۇعالجار ستانساسىنا, 10-13 قازان ارالىعىندا شالقار ستانساسىنا, 14-19 قازان ارالىعىندا تەمىر ستانساسىنا, 20-24 قازان ارالىعىندا حرومتاۋ ستانساسىنا جانە 25-28 قازان ارالىعىندا اقتوبە ستانساسىنا مەديتسينالىق قىزمەت كورسەتەدى. «جىلجىمالى ەمحانا» دەپ اتالىپ كەتكەن مەديتسينالىق پويىزدىڭ ۆاگوندارىندا دارىگەرلەردىڭ كابينەتتەرى, دياگنوستيكالىق كورپۋس, تىركەۋ ءبولىمى, تاماقتانۋ جانە دەم­الۋ بلوكتارى  ورنالاسقان. پويىزدا ۋدز-دياگنوستيكالاۋ, تاڭۋ, پروتسەدۋرالىق كابينەتتەر جانە شاعىن حيرۋرگيالىق وپەراتسيالار جاسايتىن وپەراتسيالىق بلوك قاراستىرىلعان. بارلىق كابينەتتەر تولىقتاي كومپيۋتەرلەنگەن. دياگنوستيكالىق زەرتتەۋلەردىڭ جانە تاپسىرىلعان تالدامانىڭ ناتيجەسى دە كوپ كۇتتىرمەيدى. 2016 جىلدىڭ باسىنان «سالاماتتى قازاق­ستان», «جاردەم» جانە «دەنساۋلىق» كەڭەستىك-دياگنوستيكالىق پويىزدارىمەن 133 كۇن ىشىندە قاراعاندى, اقمولا, سولتۇستىك قازاقستان, قوستاناي, پاۆلودار, باتىس قازاقستان, اتىراۋ, ماڭعىستاۋ, شىعىس قازاقستان, الماتى, قىزىلوردا, وڭتۇستىك قازاقستان جانە جامبىل وبلىستارىنىڭ 154 ستانساسىنىڭ 35 520 تۇرعىنى تەكسەرىلدى, ولاردىڭ 5 422-ءسى بالالار. دارىگەرلەرگە كەلۋشىلەردىڭ جالپى سانى 274 285 ادامدى قۇرادى. 183 536 دياگنوستيكالىق پروتسەدۋرا, 1 004 امبۋلاتورلىق وپەراتسيا جاسالدى. ماممولوگتا 5 397 ايەل ادام قارالدى. 10 219 تۇرعىنعا ستوماتولوگيالىق كومەك كورسەتىلدى. جۇمىس ناتيجەسىندە پويىز ماماندارى 86 292 اۋرۋ ءتۇرىن تىركەدى, ولاردىڭ 8 446-سى بالالاردا. 1 168 قاتەرلى ىسىك انىقتالدى. شالعايداعى ەلدى مەكەن تۇرعىندارى وسىنداي كومەك كورسەتىلگەنىنە العىس ايتىپ, ريزاشىلىقتارىن بىلدىرۋدە. راۋان قايدار, «ەگەمەن قازاقستان»