حالىقارالىق كورمەگە كاريب قاۋىمداستىعىنان ون ەل كەلەدى

جاقىندا نيۋ-يوركتە وتكەن بۇۇ باس اسسامبلەياسى 71-ءشى سەسسياسىنىڭ اياسىندا «ەكسپو-2017» حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆ كاريب قاۋىمداستىعىنىڭ (كاريكوم) باس حاتشىسى يرۆين لا روكپەن كەزدەستى. كەزدەسۋ قورىتىندىسىندا كاريب قاۋىمداستىعىنىڭ ەكسپو-2017 كورمەسىنە قاتىسۋى تۋرالى شارتقا قول قويىلدى. ەكىجاقتى كەزدەسۋ بارىسىندا ر.جوشىباەۆ ي.لا روكتى حالىقارالىق كورمەنى وتكىزۋگە بايلانىستى جاسالىپ جاتقان دايىندىق ماسەلەلەرىمەن جان-جاقتى تانىستىردى. ول سونىمەن بىرگە كاريكوم-نىڭ باس حاتشىسىن الەمدىك كورمەنىڭ جۇمىسى باستالعان كەزدە استانا قالاسىنا كەلۋگە شاقىردى. ءوز كەزەگىندە كاريكوم-نىڭ باس حاتشىسى ەكسپو-2017 كور­مەسىنىڭ باس تاقىرىبى – «بولا­شاقتىڭ ەنەرگياسى» كاريب باس­سەينىندەگى ەلدەر ءۇشىن قانشا­لىقتى ماڭىزدى ەكەندىگىن تىلگە تيەك ەتتى. ونىڭ ايتۋىنشا, كاريب قاۋىمداستىعى ەلدەرىنىڭ كوپشىلىگى ءداستۇرلى ەنەرگيا كوزدەرىنەن تاپشىلىق كورىپ كەلەدى. سوندىقتان بۇل ەلدەر بالامالى قۋات كوزدەرىن يگەرۋگە ەرەكشە ىنتالىلىق بىلدىرۋدە. تاراپتار بۇۇ قاۋىپسىزدىك كەڭەسىنە قازاقستاننىڭ مۇشە بولۋىنا بايلانىستى سۋ, ەنەرگيا جانە ازىق-ت ۇلىك قاۋىپسىزدىگى ماسەلەلەرى بويىنشا جان-جاقتى ديالوگ وتكىزۋگە مۇددەلىلىكتەرىن ءبىلدىردى. بۇل ماسەلەلەر كاريب قاۋىمداستىعى ەلدەرى ءۇشىن وتە وزەكتى بولىپ تابىلادى. سەبەبى, بۇل مەملەكەتتەر جاھاندىق جىلىنۋ ءۇردىسى باستالعاننان بەرى اۋا رايىنىڭ كەلەڭسىز اپاتتارىنا ءجيى تاپ بولۋدا. بۇگىنگى كۇنگە دەيىن كاريب قاۋىمداستىعىنا قاراستى 10 مەملەكەت كورمە جۇمىسىنا قاتى­سا­تىندىعىن راستادى. ولار­دىڭ قاتارىندا انتيگۋا جانە بار­بۋدا, بەليز, دومينيكا, گرە­نادا, گايانا, گايتي, سەنت-كيتس جانە نەۆيس, سەنت-ۆينسەنت جانە گرەنادينى, سەنت-ليۋسيا جانە سۋرينا مەملەكەتتەرى بار. وسى اتالعان ەلدەردىڭ اتىنان كورمەنىڭ بىرىڭعاي كوميسسارى رەتىندە كاريكوم-نىڭ باس حاتشىسى يرۆين لا روك تاعاي­ىن­دالدى. بۇل ءوز كەزەگىندە ەلوردادا وتەتىن ەكسپو-2017 كورمە­سىنىڭ كاريب باسسەينى ەلدەرى ءۇشىن ماڭىزىنىڭ اسا زور ەكەندىگىن كورسەتسە كەرەك. نيۋ-يورك قالاسىنداعى كەزدەسۋلەر اياسىندا ءراپىل جو­شى­باەۆ بۇۇ-نىڭ ءالسىز دامىعان ەلدەر, تەڭىزگە شىعاتىن جولى جوق ەلدەر جانە شاعىن ارالدارداعى دامۋشى ەلدەر بويىنشا جوعارى وكىلى – باس حاتشىنىڭ ورىنباسارى گيا چاندرو اچاريەمەن جانە بۇۇ باس حاتشىسىنىڭ تۇ­راق­تى دامۋ جونىندەگى ورىن­باسارى ۆۋ حونبومەن كەزدە­ستى. تاراپتار بۇۇ اتىنان ەكسپو-2017 حا­لىقارالىق ماماندان­دى­رىلعان كورمەسىنە بىرىڭعاي كوميس­سار تاعايىنداۋ, استانا قالا­سىنداعى كورمە جۇمىسى كەزىندە بۇۇ قۇرىلىمىندا وتكىزىلەتىن تاقىرىپتىق شارالاردى, سونىمەن بىرگە, بۇۇ-نىڭ كليماتتىڭ وزگەرۋى جونىندەگى كونۆەنتسياسىن ءىس جۇزىنە اسىرۋ بارىسىنداعى ماسەلەلەردى جان-جاقتى تالقىلادى. ۇلان سانجار