ورەندەرىمىز جىگەر تانىتا الماي تۇر

قىركۇيەكتىڭ 21-ءى كۇنى رەسەي فەدەراتسياسىنىڭ حانتى-مانسي اۆتونوميالى رەسپۋبليكاسىنىڭ ورتالىعى – يۋگرا قالاسىندا رەسمي تۇردە اشىلعان شاحماتتان الەمنىڭ 14, 16 جانە 18 جاسقا دەيىنگى جاسوسپىرىمدەرى اراسىنداعى چەمپيو­ناتىندا قازىرگە دەيىن 5 راۋندتىڭ ويىندارى وينالىپ ءبىتتى. جارىستا كۇتكەندەگىدەي, ءتورتىنشى تۋردان باستاپ كۇشتى قارسىلاستار ءبىر-بىرلەرىمەن بەتپە-بەت كەزدەسە باستادى. بۇل ولاردىڭ اراسىندا نەگىزىندە كىمنىڭ باستى جۇلدەلەرگە تالاساتىندارىن دا ءبىرشاما بايقاتىپ قويدى. جاھاندىق جارىستىڭ ءۇش كاتەگورياداعى توپ باستاۋشىلارى قاتارىنان ءبىز رەسەي, قىتاي, پولشا, ارمەنيا, گرەكيا, اۆستريا, ءۇندىستان, يتاليا, نيدەرلاند, يران جانە گرۋزيا ەلدەرىنىڭ شاحماتشىلارىن كورىپ وتىرمىز. وكىنىشكە قاراي, بۇل ساپتا قازاقستاننىڭ بىردە-ءبىر سپورتشىسى جوق. ءبىزدىڭ ورەندەرىمىز كوش باستاعان نەگىزگى توپ ويىنشىلارىنان ۇپاي قورى جاعىنان قازىردىڭ وزىندە ءبىراز قالىپ قويدى. ال 4-راۋندتىڭ 18 جاسقا دەيىنگىلەردىڭ كەزدەسۋلەرىندە ءبىز ءۇشىن ناعىز ءپرينتسيپتى ماتچ تاياۋ­دا عانا رەسەي قۇراماسى ساپىنا اۋىسىپ كەتكەن بۇرىنعى وتانداسىمىز ءبيبىسارا اساۋباەۆا (سۋرەتتە) مەن ديليارا البەكوۆانىڭ اراسىندا وينالدى. بۇل كەزدەسۋدە جاسى الدەقايدا كىشى ءبيبىسارا ءوزىنىڭ بۇرىنعى جەرلەس اپكەسىن ۇتىپ كەتتى. جالپى, ءبىزدىڭ شاحماتشىلار تۋرنيردە الا-قۇلا ويىن كورسەتىپ كەلەدى. ولاردىڭ اراسىنداعى ۇزدىك دەگەندەردىڭ ءوزى ءبىر كەزدەسۋ­دە ۇتسا, كەلەسىسىندە ساتسىزدىككە ۇشىراپ قالىپ جاتىر. ازىرگە جەڭىستى جەڭىس­كە جالعاستىرىپ كەلە جاتقان ەش­قاي­سىسى جوق. ماسەلەن, سايىس­تى اي­تارلىقتاي جاقسى باستاعان 14 جاسار رامازان جالماحانوۆ 4-5 راۋندتاردا ۇشىراسقان اۆستريالىق فەليكس بلوگبەرگەردەن دە, بەلورۋس ۆياچەسلاۆ زارۋبيتسكيدەن دە ۇتىلدى. ال 18 جاسقا دەيىنگىلەردىڭ ءوز ىشىمىزدەگى ليدەرى جانات سايىن 4-تۋردا ارميان مانۆەل پەتروسياننان جەڭىلسە, كەلەسى تۋردا گرۋزين يراكلي احۆلەديانيدەن سونىڭ ەسەسىن قاي­تار­عانداي بولدى. سول سياقتى 16 جاس­قا دەيىنگىلەردىڭ اراسىندا ءبىز­دەن 1-تۋردان سۋىرىلىپ العا شىق­قان جاندوس اعمانوۆ 4-راۋندتا رەسەيلىك ولەكساندر ترياپيشكومەن كەزدەسكەندە, اتتان اۋىپ تۇسكەندەي كۇي كەشتى. ونىمەن قاتارلاسا شاپقان دەنيس ماحنەۆ وسى تۇستا كەرەكتى ۇپايلار جيناۋى, سونىڭ ىشىندە جاندوسپەن ويىندى تەڭ اياقتاۋى ارقاسىندا ونىڭ الدىنا ءتۇسىپ كەتتى. بۇگىنگە دەيىن قازاقستاندىقتار كوشىندە تۋرنيردەگى اۋەلگى پوزيتسياسىن كوپ جوعالتا قويماعان جانات سايىن بولىپ وتىر. ول 10-ورىندا كەلەدى. سودان كەيىنگى مىقتىمىز – 14 جاسار اسەل سەرىكباي ەسەپتى كەزەڭدە الدىمەن رەسەيلىك ەكاتەرينا گولتسەۆاعا ەسە جىبەرسە, سوڭىنان بەلگيالىق داريا ءۆانديۋفيۋستى ءسۇرىندىردى. وسىنىڭ ءوزى ونىڭ بۇرىنعى 6-ورنىنان سىرعىپ, 15-باسقىشقا ءبىر-اق تۇسۋىنە جەتىپ جاتتى. ال بۇدان كەيىنگىلەردىڭ دۇركىرەگەن دۇرمەككە ىلەسىپ كەلە جاتقاندارى تەك ءۇشىنشى وندىقتىڭ اۋماعىنان عانا قول بۇلعاي الادى. چەمپيونات شۆەيتسار جۇيەسىمەن وتكىزىلۋدە. سوندىقتان ول 11 راۋندتان تۇرادى. بىرىنشىلىككە قاتىسۋشىلار بۇرناعى كۇنى ءۇزىلىس الدى. ال كەشە كەشكە 6-تۋردىڭ ويىندارى وينالدى. دەمەك, وسىدان كەيىن ورمەكتىڭ ءجۇزى اۋعالى تۇر. جارىس سول قارقىنىمەن 3 قازانعا دەيىن بارىپ, تىنىس تابادى. ەرتەڭىنە چەمپيوناتتىڭ جابىلۋ سالتاناتى وتەدى. دامير قوجامقۇل