شوقىر بولتەك ۇلى اتىنداعى تۋرنيرگە 150-دەن استام بوكسشى قاتىسادى

اقتاۋدا جىل سايىن وتەتىن ءداستۇرلى شوقىر بولتەك ۇلى اتىنداعى حالىقارالىق تۋريرگە بيىل 150-دەن استام بوكسشى قاتىسادى. بيىل قازاق بوكسىنىڭ اتاسى شوقىر بولتەك ۇلىنىڭ تۋىلعانىنا 100 جىل تولماق. 1916 جىلى ماڭعىستاۋ وبلىسىنىڭ جارمىش اۋىلىندا ومىرگە كەلگەن ول 1936 جىلى قازاقستانعا اۋەسقوي بوكستى العاش اكەلدى. ش.بولتەك ۇلى باسقارعان قازاق كسر قۇراما كومانداسى العاش رەت 1947 جىلى كسرو چەمپيوناتىنا قاتىستى. ءوزى رينگتە 223 كەزدەسۋ وتكىزىپ, ونىڭ 199-ىندا جەڭىسكە جەتكەن شوقىر قازاق بوكس تاريحىنا وشپەستەي ءىز قالدىردى. ەكىنشى دۇنيەجۇزىلىك سوعىستىڭ ارداگەرى, كسرو جانە قازاقستاننىڭ ءبىرىنشى سپورت شەبەرى, قر ەڭبەك سىڭىرگەن جاتتىقتىرۋشىسى شوقىر بولتەك ۇلىن ەسكە الۋعا ارنالعان حالىقارالىق بوكس ءتۋرنيرى اقتاۋ قالاسىنداعى «كاسپي» سپورت كەشەنىندە 28 قىركۇيەك-2 قازان ارالىعىندا وتەدى. ماڭعىستاۋ وبلىستىق بوكس فەدەراتسياسىنىڭ حابارلاۋىنشا, تۋرنيرگە قازاقستان, رەسەي, مونعوليا, ازەربايجان, وزبەكستان, قىرعىزستان, بەلورۋسسيا جانە تاجىكستاننان 150-دەن استام بوكسشى قاتىسادى. گۇلايىم شىنتەمىرقىزى, اقتاۋ