تىگىن تسەحىنداعى تابىستى تىرلىك

بۇگىنگى كەزگە دەيىن ەلىمىزدە جەڭىل ونەركاسىپ سالاسى كەنجەلەپ قالدى دەگەن پىكىر قالىپتاسىپ كەلگەن بولاتىن. ايتسە دە, قازىرگى كۇنى ءوندىرىستىڭ بۇل ءتۇرى ەڭسەسىن تىكتەي باستاعانىن كورەمىز. كانە, وي تارازىسىنا سالىپ كورەيىكشى؟! ايتالىق جەڭىل ونەركاسىپتىڭ ەڭ باس­تى كورسەتكىشى – كيىم-كەشەك تىگۋ ءىسىن جولعا قويۋ ءۇشىن ۇلكەن فابريكا اشۋ مىندەتى بولا قويار ما ەكەن؟! ارينە, ءتىپتى دە مۇنداي قاجەتتىلىك جوق. كەرىسىنشە, بۇل باعىت شاعىن جەكە كاسىپكەرلىكتى دامىتۋعا وتە ىڭ­عايلى ەكەنى بايقالادى. ءبىر ءسۇيسى­نەرلىك جاعداي, ورال قالا­سىندا وسى ورايداعى شاعىن كاسىپ­كەر­لىك نى­ساندارى جاۋىننان كە­يىنگى ساڭى­راۋقۇلاقتاي كوكتەي دۇركىرەپ ءوسىپ كەلەدى. سونداي كاسىپورىنداردىڭ ءبىرى, ءتىپتى ءبىرى ەمەس-اۋ بىرەگەيى – «تۋجيلكين ا.ب.» جەكە كاسىپكەرلىگى دەۋگە بولادى. بۇگىندە ەلىمىزدە «بيز­نەس­تىڭ جول كارتاسى-2020» باع­دار­­لاماسىنىڭ شاپاعاتى مەن يگى­لىگىن كورىپ وتىرعان شاعىن, ورتا ءارى ءىرى بيزنەس يەلەرى جەتكىلىكتى. ءبىر ءسوز­بەن ايتقاندا, بۇل اۋقىمى وتە جوعا­رى باعدارلاما. كيىم-كەشەك تىگۋ­دى ماقسات ەتكەن جەرگىلىكتى جەكە كاسىپ يەلەرى دە وسى باعدارلاما شەڭ­­بەرىن­دەگى قولداۋ-كومەكتىڭ يگى­لى­گىن كورە باستادى. ونىڭ بۇل تار­ماعى «دامۋ-ءوندىرىس» دەپ اتالادى. ءبىر سوزبەن ايتقاندا, بۇل جەكە كاسىپ­كەرلىك سۋبەكتىلەرىن قولداۋ باع­دار­لاماسى بولىپ تابىلادى. بۇگىن­گى ماتەريالىمىزعا ارقاۋ بولىپ تارتىلعان شاعىن نىسان يەل­ەرى وسىن­داي قارجىلاي كومەكتىڭ ارقا­سىن­دا تەك سوڭعى ءبىر جىلدىڭ ىشىندە ءونىم كولەمىن اجەپتاۋىر وسىرۋگە قول جەتكىزدى. تىگىن تسەحى ارنايى كيىم تىگۋگە ماماندانعان. بۇعان قوسا تەنتتەر مەن برەزەنت جابىندار دا تىگىلەدى. سونىمەن قاتار, اسكەريلەر مەن كۇزەت قىزمەتىندەگىلەرگە ارنالعان كيىمدەرگە ارنايى لوگوتيپتەر مەن جاپسىرمالار سالىنادى. ونى تىگىن تسەحىنىڭ شەبەرلەرى ساندەپ ءور­نەكتەيدى. كومپانيا ءوز ونىمدەرىن وب­لىس اۋماعىندا وتكىزەدى. نەگىزگى سەرىك­تەستەرى بيۋدجەتتىك ۇيىمدار مەن جەكە تۇلعالار بولىپ تابىلادى. بۇل جونىندە گازەت تىلشىسىنە «تۋجيلكين ا.ب» جەكە كاسىپكەرلى­گىنىڭ مەنەدجەرى تاتيانا شەۆتسوۆا ءوز وي-پىكىرىن بىلايشا جەتكىزدى. – 2015 جىلى اقپان ايىندا ايماقتىق ۇيلەستىرۋ كەڭەسى جەكە كاسىپ­كەرلىكتىڭ «دامۋ-ءوندىرىس» باع­دارلاماسى بويىنشا التى پايىز­­دىق جەڭىلدىكپەن نەسيەلەۋدى كوزدەيتىن جوبانى ماقۇلدادى. ءبىز وسى جوباعا قاتىسقاندى ءجون كوردىك. ءسويتىپ, نەسيەلىك قاراجاتقا ۇلكەن اتەلە اشۋ ءۇشىن عيمارات, سونىمەن قاتار تسەح پەن اتەلەگە قاجەتتى قۇرال-جاب­دىقتار ساتىپ الىندى. بۇعان قوسا كيىم ءپىشۋ ۇستەلى مەن تىگىن ماشينالارى ساتىپ الىنىپ, ورناتىلدى. بۇگىندە ورالدىڭ ەكىنشى شاعىن اۋدانىندا ورنالاسقان مەكەن-جايداعى جاڭا تىگىن تسەحىندا وڭ­تۇستىك كورەيا وندىرىسشىلەرىنەن شىق­قان لازەرلى ورنەك سالۋ ماشيناسى جۇمىس ىستەپ تۇر. بۇل تەحنيكانىڭ كومەگىمەن كويلەك-كونشەكتەر كەستەلەنىپ ادەمىلەنەدى. بۇعان قوسا قاجەتتى پىشىندەگى ويۋ-ءور­نەكتەر جاسالادى. جوبانى جۇزەگە اسىرۋ ماقساتىندا ونداعان جاڭا جۇمىس ورىندارى قۇرىلعان. تىگىن تسەحىنداعى مامانداردىڭ كوڭىل كۇيى جوعارى. ءبىز ولارمەن تىلدەسكەن كەزىمىزدە تىگىنشى بريگادير ايمان ساۋىتوۆا بىلايشا پىكىر ءبىلدىردى. – جەكە كاسىپكەرلىك تسەحىندا تىگىنشى بولىپ ەڭبەك ەتۋدەمىن. تاپسىرىستاردىڭ تۇسۋىنە قاراي ارنايى كيىمدەر تىگەمىز. جالاقىمىز تىندىرعان ىسىمىزگە بايلانىستى تۇراقتى تۇردە تولەنەدى. زەينەتاقى قورىنىڭ اۋدارىمدارى جونىندە دە وسىلاي دەي الامىن. مۇنداعى جۇمىسىم وزىمە ۇنايدى. ۇجىم مەن باسشىلىق اراسىندا تۇسىنىستىك پەن ءوزارا كەلىسىم قالىپتاسقان. مىنە, وسىلايشا ورالداعى جاڭا تىگىن تسەحتاردىڭ ءبىرى قىزۋ جۇمىس ۇستىندە. تەمىر قۇسايىن, «ەگەمەن قازاقستان» ورال