مۇنداي بىرىنە-ءبىرى ۇقساعان كۇندەلىكتى ەگىز تىرلىككە ءبارى مويىنسۇنعان. ياعني, تاڭعى سەگىزدەن تالاسىپ-تارماسىپ عيماراتقا كىرۋ, سوسىن سىعىلىسىپ ليفتىمەن جۇمىس كابينەتىڭە كوتەرىلۋ, كومپيۋتەرىڭنىڭ تۇيمەسىن باسۋ, ودان ءارى تەلەفون قوڭىراۋى, قاعاز, قۇجات. كەشكىسىن سۇلدەڭدى سۇيرەتىپ ۇيگە كەتىپ بارا جاتقانىڭ جاتتاندى تىرلىكتىڭ تاۋسىلماس پاراقتارىنا اينالعان. وسىنداي قىزمەتتەگىلەر اپتانىڭ سوڭىن اسىعا كۇتەدى. ءبىرى دوستارىمەن كەزدەسەدى, ەندى ءبىرى تۋىستارىن ارالايدى, كەلەسىسى سپورتپەن شۇعىلدانادى, تاعىسىن-تاعىلار. مەكەمەدە ارالاس-قۇرالاس جۇرگەن جولداستاردىڭ بىرقاتارى سەنبى كۇندەرى بيلياردتى ەرمەك ەتەتىنى بار. تاستاياقتىڭ تالعامپاز ويىنشىسى بولماساق تا ايتەۋىر اپتا بويى شارشاعان ميىڭدى ءبىراز سەرگىتىپ, جولداس-جورامەن سەيىلدەپ قالۋ ءۇشىن ءبىز دە اندا-ساندا سول جەرگە سوعىپ تۇرامىز. سەنبى كۇنى الدىن الا كەلىسىم بويىنشا قالاداعى بيليارد ورتالىقتارىنىڭ بىرىنە ەرتەرەك كەلدىم. جىگىتتەر ءالى تولىق جينالماپتى. ءار جەردە قولتىعى جاڭا سوگىلگەن بايگە اتتارىنداي قالىڭ دۇبىرگە ەندى كىرىسىپ جاتقان ويىنشىلار. قاراپ تۇرماي شاشى قايراتتى, قازاقى ءوڭدى جىگىت اعاسىن اڭگىمەگە تارتتىم. جاسى ەلۋدەن اسسا دا, سىپتاي بولعان دەنە بىتىمىنەن سپورتپەن ۇدايى شۇعىلداناتىنى كورىنىپ تۇر. جاڭا تانىسىمنىڭ اڭگىمەگە كەت ءارى ەمەستىگىن اڭعارعاندىقتان با «اعاش قازان قايناتا» تۇسۋگە ءوزىم دە ىڭعاي تانىتتىم. – بيليارد دەگەن دە مايدان دالاسى سياقتى عوي. ەپتىلىك تە, تاكتيكا دا, شىدامدىلىق تا كەرەك, دەدىم الداعى جۇيەلى اڭگىمەگە ارنا تارتىپ. – ونىڭ دا دۇرىس شىعار, باۋىرىم. بىراق شىن سوعىستى ەشبىر ويىنمەن سالىستىرا المايسىڭ. سوعىس ءولىم مەن ءومىردىڭ تالاسى. امان قالۋىڭ اسكەري دايىندىعىڭ, ايلا-امالىڭا عانا ەمەس, جولىڭ بولۋىنا دا تىكەلەي بايلانىستى. ەلۋدى جاڭا عانا ەڭسەرگەن ازاماتتىڭ قۇددى ۇلى وتان سوعىسىندا وت كەشىپ, فاشيستەرمەن قاسىق قانى قالعانشا شايقاسقان ارداگەر اتالارىمىز سياقتى سويلەگەنىنە تاڭىرقاي قارادىم. – اڭگىمەڭىزگە قاراعاندا اۋعان سوعىسىندا بولعانسىز-اۋ دەيمىن. – دۇرىس ايتاسىڭ, ءىنىم. اۋعان سوعىسى جايلى ءالى دە ايتىلماعان اقيقات كوپ قوي, – دەدى جىگىت اعاسى الداعى بۇكپەسىز اڭگىمەسىنىڭ تيەگىن اعىتۋعا ىڭعايلانىپ. 1979 جىل. كەڭەس اسكەرلەرىنىڭ شەكتەۋلى جاساعى جەرگىلىكتى حالىقتى ازات ەتۋ, سوتسياليستىك يدەيالاردى جاقتاۋ ماقساتىمەن اۋعانستانعا كىردى. بۇل سول كەزدە كەڭەستەر وداعى كوممۋنيستىك پارتياسى ورتالىق كوميتەتى ساياسي بيۋروسىنىڭ يۋ.اندروپوۆ, د.ۋستينوۆ, ا.گرومىكو, ل.برەجنەۆ سياقتى ساناۋلى عانا مۇشەلەرىنىڭ قۇپيا تۇردە شۇعىل قابىلداعان شەشىمى ەدى. كەڭەس باسشىلىعىنىڭ تۇپكى ماقساتى اۋعانستاندا بيلىككە تالاسقان رەسمي ۇكىمەت پەن وپپوزيتسيا مودجاحەدتەر اراسىندا قارۋلى قاقتىعىستارعا ارالاسىپ, اتالعان ەلدە تولىقتاي ساياسي باقىلاۋ جۇرگىزۋ بولاتىن. ناتيجەسىندە, اۋعان ەلىن باسقارىپ وتىرعان شاح حافيزۋللا ءاميندى الىپ تاستاپ, ورنىنا بابراك كارمالدى وتىرعىزۋ تۋرالى يدەياسىن كۇش كورسەتۋ ارقىلى جۇزەگە اسىرعانى بەلگىلى. وسىلايشا كەڭەس وداعىنىڭ اسكەرلەرى ۇزاق جىلدارعا جالعاسقان قارۋلى قاقتىعىستاردىڭ قاق ورتاسىنان ءبىر-اق شىقتى. بەلورۋسسيانىڭ ۆيتەبسك قالاسىندا اسكەري بورىشىمىزدى وتەپ جۇرگەن كەزىمىز. باس-اياعى ءتورت-بەس ايدا اسكەر ومىرىنە اجەپتاۋىر توسەلىپ قالدىق. تالاپ وتە كۇشتى. پاراشيۋتپەن ۇشاقتان 30 رەت سەكىرىپ, اتىسۋ, كۇنىنە 10 شاقىرىم جۇگىرۋ, ەرەجەسىز جەكپە-جەك سياقتى جاتتىعۋلارعا جانى ءسىرى ادام عانا شىداس بەرەدى. ءبىر كۇنى كەشكىسىن ديۆيزيا كومانديرى ءبارىمىزدى شۇعىل جيناپ, كسرو ورتالىق كوميتەتى مەن ۇكىمەتىنىڭ كەڭەس اسكەرىن اۋعانستانعا اتتاندىرۋ جونىندە قابىلداعان شەشىمىن جاريالادى. توسىن اقپاراتقا توسىرقاپ, بۇكىل پولك بولىپ ساپتا ءمىز باقپاي تۇرمىز. ديۆيزيا كومانديرى بۇكىل جاعدايدى ءتۇسىندىرىپ بولعاننان كەيىن, «ال ەندى اۋعانستاندا اسكەري بورىشىن وتەۋدى جالعاستىرعىسى كەلەتىندەر ءبىر قادام العا باسسىن», دەدى نىعارلاپ. پولكتىڭ توقسان پايىزدايى توپ باستادى. ءسويتىپ, ەدەل-جەدەل جولعا جينالىپ, ءبىر تاۋلىكتىڭ ىشىندە كابۋل قالاسىنا كەلىپ قوندىق. اينالا اتىس, زۋىلداعان وق, ويران-توپىر وت-جالىن. كابۋل اۋەجايىندا 10-15 تىكۇشاق ۇشۋعا دايىن تۇر ەكەن. ءار تىكۇشاققا 15-20 ادامنان ءبولىنىپ وتىرعاننان كەيىن قارا ءتۇندى ءتىلىپ بەيمالىم باعىتقا بەت تۇزەدىك. ارامىزدا ەشكىم قايدا, قاي باعىتقا, قانداي ماقساتتا ۇشىپ بارا جاتقانىمىز جايلى ەشنارسە بىلمەيدى. ەلدەن اۋعانستانعا اتتانعاندا ۇشاق ىشىندە بارىمىزگە اۆتومات تاراتىپ بەرگەن-ءتىن. الداعى ساتتە اجال وعىن بۇركيتىن سۋ جاڭا اۆتوماتتارىمىزعا سۇيەنىپ, كومەسكى تارتقان كورەشەگىمىزدى ويلاپ ابىرجىپ وتىرمىز. ءسويتىپ شامامەن ءبىر جارىم ساعاتتاي قالىڭ تۇندە اۋەدە «قالاقشالارىن اينالدىرعان» تىكۇشاق بيىكتىگىن تومەندەتىپ, قونۋعا بەت الدى. جەرگە جاقىنداعاندا قاراساق تاعى دا نوسەرلى جاڭبىرداي جاۋعان ءنوپىر وق (تراسسەرلىك وق –تۇندە جاناتىن). وتتان قاشقان ينەلىكتەي تىكۇشاق بىرازعا دەيىن دىرىلداپ جەرگە قونا الماي ءجۇردى. ءبىر كەزدە ازەر دەگەندە ىڭعايلى ورىنعا تابانىن تيگىزدى. شيراق قيمىلداپ جەرگە ءتۇسىپ جاتىرمىز. سول مەزەتتە ءبىزدىڭ الدىمىزدا بارعان بارلاۋ جاۋىنگەرلەرىنىڭ ءبىرازى جارالانعانى, جەر جاستانعانى بار, قان ساسىعان بوزداقتاردى تىكۇشاققا تيەپ جاتىر. وت پەن وقتىڭ اراسىنداعى استان-كەستەن دالانى, جارالى جاۋىنگەرلەردى ءوز كوزىمىزبەن كورگەندە عانا ءبىز كينوداعى ەمەس ومىردەگى سوعىستىڭ ورتىنە تۇسكەنىمىزدى تۇسىندىك. ءبىزدىڭ باتالون لاعمان پروۆينتسياسى مەحتەرلام قىشلاعىنا كەلىپ ورنالاستى. ءوزىم جاڭادان جاساقتالعان باتالوندا جالعىز قازاقپىن. كوممۋنيستىك رۋحتا ەزىلگەن حالىققا ەركىندىك اپەرەمىز دەپ كەلگەن جاۋىنگەرلەر مۇندا ورىن تەپكەنىمىزدە جەرگىلىكتى جۇرتتىڭ ءبىزدى باسقىنشى رەتىندە قابىلدايتىندىقتارىن بايقادىق. ەلدەن اتتاناردا سانامىزعا سىڭىرگەن قالىڭ جاۋدىڭ قاراسى ەندى كورىنبەيدى, ەكى جاق بولىپ قارۋ اسىنىپ سۇراپىل شايقاس جاساپ جاتقان جۇرتشىلىق تا جوق. ادۋىندى جەل اسپانداعى قورعاسىن بۇلتتاردى قورالاتا قۋىپ شىققانداي العاشقى كۇنگى اقىرزامان اتىس-شابىس تا ءىزىم-عايىم. ءبىزدىڭ بىلەتىنىمىز, تەك قانا ءبىر-بىرىمەن يتجىعىس ءتۇسىپ جاتقان جەرگىلىكتى تايپالار. جەڭىلگەن جاق كەڭەس اسكەرلەرىنەن كومەك سۇرايدى. بىردە مىنا تايپاعا, كەلەسى كۇنى قارسى جاققا بولىسادى. ءبىر كۇنى روتا بارلاۋعا شىعادى. تاۋداعى ءتيىستى مەجەگە جەتىپ, دۋشمانداردىڭ پاكىستان جاعىنان قارۋ-جاراقپەن ءوتۋىن باقىلاۋ ءۇشىن جايعاستىق. سول ەكى ورتادا مۇلگىگەن تىنىشتىق قايتا ورنادى. مۇنداي كەزدە سولداتتار ەرىگىپ, اركىم ءوز بىلگەنىمەن اينالىسادى. سونداي ەزىلگەن كۇندەردىڭ بىرىندە اسكەري بورىشىن بىرگە وتەپ جۇرگەن ەفرەيتور جىگىت قولىنا سنايپەرلىك ۆينتوۆكانى الىپ, قىشلاقتىڭ اۋلاسىندا ويناپ جۇرگەن اۋعان بالالارىن ءبىر بىرلەپ اتقىلاي باستادى. بىرەۋى قۇلاپ, ەندى بىرەۋى جاراقاتتانىپ, سۇيرەتىلە قاشىپ جاتىر. ەفرەيتور ءوزىنىڭ وسپادار قىلىعىنا ءوزى وتە ءماز. كوز الدىندا بولىپ جاتقان, تىلمەن ايتىپ جەتكىزە المايتىن سۇمدىق كورىنىسكە شىداي الماعاندىقتان ارتىنان جەتىپ كەلىپ, قولىمداعى قارۋمەن قاق ماڭدايدان ۇرىپ, جەرگە سۇلاتتىم. ءبىرازدان كەيىن ەسىن جيناعان ەفرەيتور: «سەن, جاۋ جاعىنا شىقتىڭ. سەن ساتقىنسىڭ», دەدى قالش-قالش ەتىپ. كەيىن باتالونعا ورالعاننان سوڭ, باتالونداعى اسابيستكە (اسكەردەگى ۇلتتىق قاۋىپسىزدىك قىزمەتكەرى) بارىپ مەن تۋرالى شاعىم ءتۇسىردى. ارتىنشا اياقتالىپ بولمايتىن تەرگەۋ-تەكسەرۋ جۇمىستارى باستالدى. اۋەلى كەڭەس اسكەرىنىڭ جاۋىنگەرىن قاساقانا ۇرىپ قۇلاتۋدىڭ ارتىندا قانداي ارام پيعىل جاتقانى سۇرالدى. كىشكەنتاي جەتكىنشەكتەرگە بولىسۋىما ءوزىمنىڭ جانە اۋعان بالالارىنىڭ ءبىر مۇسىلماننىڭ بالالارى ەكەندىگىمىز سەبەپ بولعانى ايتىلدى. كوممۋنيستىك بۇلجىماس يدەيالارعا دەگەن تۇراقسىزدىعىم قاتاڭ سىنعا الىندى. ءىس ناسىرعا شاۋىپ, مەنى ەلگە قايتارۋ, ودان ءارى قىلمىستىق ءىس قوزعاۋ جونىندە كۇردەلى ماسەلەلەر ۋشىعا باستادى. اڭگۇدىك جاۋىنگەردىڭ ءازازىل ارەكەتىنە ارالاسامىن دەپ ءوزىمنىڭ تۇتىلعانىمدى سەزىپ, كۇرەسەرگە دارمەن تاپپاي جۇرگەندە الماتىدان اتتاناردا العاشقى دايىندىق جاتتىعۋلارىنا جەتەكشىلىك جاساعان كومانديرىمىز ءبىزدىڭ باتالونعا كەلگەنىن ەستىدىم. دەرەۋ ىزدەستىرىپ, شتابتىڭ جانىندا جولىعۋدىڭ رەتىن تاپتىم. ءمان-جايدى بۇگە-شىگەسىنە دەيىن جايىپ سالدىم. اسىقپاي تىڭداعان بايسالدى كوماندير ءوزىنىڭ توقتامىن ايتتى. – وزگە ەلدە جۇرگەن سوڭ جەرگىلىكتى جۇرتتىڭ سەندەردى وگەيسىنە قابىلدايتىنىن بىلەسىڭدەر. سوندىقتان ءاربىر قادامدارىڭدى بايىپپەن باسىپ, ساق جۇرۋلەرىڭ كەرەك. بىراق سەنىڭ بالالارعا اراشا ءتۇسۋىڭدى مەن قۇپتايمىن, ازامات ەكەنىڭدى كورسەتتىڭ. وسىنداي ەسكەرتپەلەرىمەن قوسا ءبىراز اقىل-كەڭەسىن ايتقان جەرلەسىمىز بەيكۇنا بالالاردى باسىنعان باسبۇزارعا جازا قولدانىلاتىنىن جانە ءوزىمنىڭ ودان ءارى اسكەري بورىشىن جالعاستىرا بەرەتىنىمدى جەتكىزدى. ارادا ءبىر-ەكى اي وتكەندە ءبىزدىڭ جاۋىنگەرلىك توپتىڭ ورىن اۋىستىرۋى تۋرالى جوعارىدان بۇيرىق كەلدى. شۇعىل جينالا باستادىق. شاتىردى جيناستىرۋعا, تەحنيكانى تيەۋگە جانە اسكەريلەردى ساپقا تۇرعىزۋعا جاۋاپتى سەرجانت كومانديردىڭ الدىنا كەپ تىك تۇرىپ, جولعا شىعۋعا ءازىر ەكەندىكتەرىن باياندادى. باياناتىنىڭ سوڭىندا ورتالىقتان كەلىسىلگەن قوسىمشا جۇك كولىگىنىڭ جەتپەي قالۋىنا بايلانىستى ءبىراز زاتتاردى, ونىڭ ىشىندە سالماعى اۋىر قارۋ-جاراقتى قالدىرىپ كەتۋگە تۋرا كەلەتىنىن ايتتى. باتالون كومانديرى ءۇنسىز ويلانىپ قالدى. بەت الپەتىنەن ءبىر جىمىسقى ارەكەتكە بارعىسى كەپ تۇرعانى بايقالادى. ءبىر كەزدە ءتۇيىنى قيىن ەسەپتىڭ شەشىمىن تاپقانداي ىرجيدى دا, سەرجانتتى شەتكە شىعارىپ كۇبىرلەپ تۇسىنىكسىز تاپسىرمالار بەرىپ جاتتى. سويتسەك, زىميان ويلى كوماندير جوعارى جاقتان ەكى اي بويى ەرىگىپ جاتتى دەگەن ەسكەرتۋ الىپ قالماۋ ءۇشىن ءبىر وقپەن ەكى قوياندى اتىپ الماق پيعىلدا اۋىر قىلمىسقا بارۋدى ۇيعارىپتى. جاۋىنگەرلەرگە زەڭبىرەكتەرگە ارتىق-اۋىس سناريادتاردى وقتاۋدى جانە تاۋ بوكتەرىندە تۇرعىندارى تىنىش ۇيقىدا جاتقان قىشلاققا قاراي باعىتتاۋدى بۇيىردى. ءبىر پاستە ايلى اسپان استىنىڭ استان-كەستەڭى شىعىپ, كوز الدىمىزدا بۇتىندەي ءبىر ەلدى مەكەننىڭ ك ۇلى كوككە ۇشتى. ادامنىڭ ايۋاننان بەتەر مۇنداي ازعىندىعىنا دەنەم قالشىلداپ, كوزىمنەن جاس ىرشىپ شىقتى. جاڭا ورىنعا بەكىنگەننەن كەيىنگى تىنىش كۇندەر تاعى باستالدى. ءبىر كۇنى كومانديرىمىز اسا ماڭىزدى اسكەري وپەراتسيا جوسپارلانىپ وتىرعانىن قۇپيا تۇردە جەتكىزىپ, ەرەكشە دايىندىقتان وتكەن ازاماتتار الدىن الا بارلاۋعا جىبەرىلەتىنىمىزدى ەسكەرتتى. تاڭ قىلاڭ بەرە بارلاۋعا شىقتىق. مۇمكىندىگىنشە توبە-توبەنىڭ توڭىرەگىن تاسالاپ جاياۋ ءجۇرىپ كەلەمىز. كەلەسى ءبىر توبەنىڭ ۇستىنە شىعا بەرگەنىمىز سول ەدى جان-جاقتان ىسىلداعان وقتاردىڭ داۋىسى ەستىلدى. جاپا-تارماعاي جەرگە جابىستىق. جاۋدىڭ توڭىرەكتى اينالدىرا وق جاۋدىرتىپ جاتقانىنان-اق ءبارىمىز قورشاۋدا قالعانىمىزدى سەزدىم. ەڭبەكتەپ قاسىمدا كەلە جاتقان جولداسىمنىڭ جانىنا بارسام اجالىنا تۋرالاپ كەلگەن وق بەت الپەتىن وپىرىپ كەتكەن ەكەن. جارالىلاردىڭ ىڭىرسىعان داۋىستارى ەستىلەدى. ەس جيعاندارىمىز اۆتوماتتارىمىزدى دەرەۋ ىڭعايلاپ قارسى جاققا وق اتتىق. قال-قادەرىمىزشە قاراۋىل توبەنى قورعاۋمەن كەش باتتى. ءبىزدىڭ ارنايى دايىندىقتان وتكەن توپ ەكەنىمىزدى ەستىگەندىكتەن بە, تۇندە شابۋىل جاسالا قويعان جوق. تاڭەرتەڭ جان-جاقتان تاعى دا سۋسىلداپ وق اتىلدى. ەكىنشى كۇن باستالدى. تالعاجاۋعا الىپ شىققان ازىن-اۋلاق تاماق تا تاۋسىلا باستادى. شەيىت بولعان جولداستارىمىزدىڭ مايىتتەرى بۇزىلىپ, جاعىمسىز ءيىس قولقانى قابادى. اڭدىعان جاۋدىڭ الماي تىنباسىنا مويىنسۇنا باستادىق. ءبارىمىز قالجىرادىق. مەنىڭ دە ءال-دارمەنىم تاۋسىلا تۇسكەنىن سەزەمىن. دۋشماندار كۇندە كەشكىسىن رۋپور ارقىلى: «سەندەر بەرىلىڭدەر, جاندارىڭ امان قالادى, پاكىستاننان ءزاۋلىم ءۇي بەرىلەدى, قالاعان قىزدارىڭا ۇيلەنەسىڭدەر» دەپ ءبىزدى ۇگىتتەيدى. قازاقستان تۇرعاندا قايداعى ءزاۋلىم ءۇي, قايداعى قور قىزى!؟ كوز الدىما اۋعانعا اتتانىپ بارا جاتقانداعى تۋعان ەل, جاسىل جەلەك اۋىلىم كەلدى. اتا-انام, باۋىرلارىم, دوستارىمنىڭ ءبارى-ءبارى جانارىمنىڭ الدىندا كينو لەنتاداي زىمىراپ ءوتىپ جاتىر, ءوتىپ جاتىر. كەنەت شىنىمەن دە بوتەن ەلدە ايدالاداعى ءبىر توبەنىڭ باسىندا وسىلاي كوز جۇمام با دەگەن سۇمدىق وي ساناما ساق ەتە قالدى. وكىنىشتى-اق. ماڭايدى ءبىر شولىپ الىپ, وزىممەن بىرگە الىپ جۇرەتىن شاعىن قول راديونىڭ قۇلاعىن بۇراي باستادىم. ءبىر ارنادا تۇسىنىكسىز تىلدە ءان ايتىلىپ جاتىر, ەندى بىرىندە سۇحبات ءجۇرىپ جاتقان سىڭايلى. ءبىر كەزدە جانىما جاقىن ءاننىڭ اۋەزىنە سەلت ەتە قالدىم. سەنەر-سەنبەسىمدى بىلمەيمىن, راديودان ءانشى روزا رىمباەۆا «اتامەكەن» ءانىن اۋەلەتىپ جاتىر. «اينالدىم سەنى-اي, اتامەكەن-اي» دەپ ءاننىڭ قايىرماسىنا كەلگەندە كوزىمنەن جاس قالاي شىعىپ كەتكەنىن بايقامادىم. جاڭا عانا قيماستىقپەن ەسكە الىپ جاتقان تۋعان ەلدىڭ كورىنىستەرى وزگەشە ءبىر جارقىن سۋرەتتەرمەن جالعاستى. ولىممەن بەتپە-بەت كەلىپ وتىرعاندىقتان با, اجالعا مويىنسۇنا وتىرىپ اللادان شىن جۇرەگىممەن تىلەك تىلەدىم. «ە, جاراتقان يەم جانىمدى ەرتە مە, كەش پە الاتىنىڭدى انىق بىلەمىن. قاي كەزدە الساڭ دا ءوز قۇزىرىڭدا, تەك قانا تۋعان وتانىم قازاقستاندى ءبىر رەت كورۋگە جار بولا كور», دەدىم. تاعى دا قاس قارايا باستادى. اينالا قورشاعان جاۋ ءبىز ءالى ەشقايدا كەتكەن جوقپىز دەگەندەي اندا-ساندا وق اتىپ قويادى. كەنەت تىكۇشاقتار كەلىپ, دۋشماندار پوزيتسياسىن اتقىلاعاننان كەيىن ءبىز سىتىلىپ شىقتىق. ... ۇنسىزدىك. اعامىز قولىنداعى تاستاياعىن قاتتى قىسىپ ۇستاپ ءبىرشاما ويلانىپ قالعان ەكەن. مەن دە ەرەكشە اڭگىمەنىڭ اسەرىنەن ارىلا الماي, ءوزىمنىڭ جانە دوس-جاراننىڭ بۇگىنگى بەيبىت ءومىردىڭ باعاسىن بىلمەي, تىنىشتىقتىڭ قادىرىنە جەتپەي جۇرگەنىمىزدى سەزىنگەندەي بولدىم. – اتامىز قازاق: «قىرىق جىل قىرعىن بولسا دا اجالدى ولەدى» دەگەن. وسىلايشا, اللا تاعالانىڭ جازۋىمەن امان قالدىق, ءىنىم. ەسىڭدە بولسىن, بۇل دۇنيەدە اقشا دا, قىزمەت تە وتباسىڭنىڭ اماندىعىنا, وتانىڭنىڭ تىنىشتىعىنا ەشقاشان جەتپەيدى, دەپ تۇيىندەدى اڭگىمەسىن اعالىق اقادال تىلەكپەن.
قۋات بوراش,
جۋرناليست
