جاڭا سەسسياداعى العاشقى بيۋرو وتىرىسى

كەشە ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ جاڭا سەسسياداعى العاشقى بيۋرو وتىرىسى ءوتتى, دەپ حابارلادى ءماجىلىستىڭ ءباسپاسوز قىزمەتى. وندا الداعى جالپى وتىرىستىڭ كۇن ءتارتىبى قارالدى. حالىق قالاۋلىلارى نازارىنا «1994 جىلعى 15 ساۋىردەگى ۇلى وتان سوعىسىنىڭ قاتىسۋشىلارى مەن مۇگەدەكتەرىنە, باسقا مەملەكەتتەردىڭ اۋماعىنداعى ۇرىس قيمىلدارىنا قاتىسۋشىلارعا, قازا تاپقان اسكەري قىزمەتشىلەردىڭ وتباسىلارىنا ارنالعان جەڭىلدىكتەر مەن كەپىلدىكتەردى ءوزارا تانۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن تالقىلاۋ ۇسىنىلادى. سونىمەن قاتار, تاعى دا بىرقاتار راتيفيكاتسيالىق قۇجاتتاردى جۇ­مىسقا قابىلداۋ كوزدەلگەن. ولار: قا­زاقستان ۇكىمەتى مەن اتوم ەنەرگيا­سى جونىندەگى حالىقارالىق اگەنتتىك اراسىنداعى قازاقستاندا اتوم ەنەرگيا­سى جونىندەگى حالىقارالىق اگەنتتىكتىڭ ءتو­مەن بايىتىلعان ۋران بانكىن قۇرۋ, قازاقستان ۇكىمەتى مەن بىرىككەن ۇلتتار ۇيىمىنىڭ ءبىلىم, عىلىم جانە مادەنيەت ماسەلەلەرى جونىندەگى ۇيىمى (يۋنەسكو) اراسىنداعى قازاقستاندا ورتالىق ازيا وڭىرلىك گلياتسيولوگيالىق ورتالىعىن قۇرۋ (2-سانات) تۋرالى كەلىسىمدەردى, سونداي-اق, قازاقستان مەن رەسەي اراسىنداعى قوسارلانعان سالىق سالۋدى بولدىرماۋ جانە تابىس پەن كاپيتالعا سالىق تولەۋدەن جالتارۋعا جول بەرمەۋ تۋرالى كونۆەنتسيا شەڭبەرىندە ەكى ەلدىڭ ۋاكىلەتتى ورگاندارى بەرگەن رەزيدەنتتىكتى راستايتىن رەسمي قۇ­جات­تاردى تانۋ ءتارتىبى تۋرالى نوتالار ال­ماسۋ نىسانىنداعى ۇكىمەتارالىق كەلى­سىمدى راتيفيكاتسيالاۋعا قاتىستى بولماق. وسى كۇنى ەكسترەميزمگە جانە تەرروريزمگە قارسى ءىس-قيمىل جانە دە جەرگىلىكتى ءوزىن ءوزى باسقارۋدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى بويىنشا بەيىندى كوميتەتتەرگە قورىتىندى ازىرلەۋ مەرزىمى تاعايىندالماق. سونداي-اق, بيۋرو پارلامەنت ءماجىلىسىنىڭ جانىنان باق وكىلدەرىن اككرەديتتەۋ ەرەجەسىن بەكىتتى.