بارلىق جول مەكتەپكە اپارادى

«التى الاشتىڭ بالاسى باس قوسسا, توردەگى ورىن – مۇعالىمدىكى» دەگەن ەكەن ماعجان جۇماباەۆ. ارينە, بۇل وتكەن عاسىردىڭ باسىندا, قازاق دالاسىندا ۇستاز اتاۋلىنىڭ مۇلدەم از كەزىندە ايتىلعان شىعار. ايتسە دە, ارادا قانشاما زامان وتسە دە مۇعالىمنىڭ مارتەبەسى سول بيىگىنەن تومەندەگەن جوق. ويتكەنى, بۇگىنگى زامان – ءبىلىمدىنىڭ زامانى. بىلىكتى, ءبىلىمدى, وزىق ويلى ۇستازدىڭ قاشاندا ورنى بولەك. ءبىزدىڭ ەلدە بارلىق جول مەكتەپكە اپارادى. وسى ءبىر كيەلى شاڭىراققا باس سۇقپاعان, ءبىلىم الماعان, قوڭىراۋىنىڭ سىڭ­عىرىن ەستىمەگەن ادام كەم­دە-كەم. بالكىم جوق تا بولار... وسىدان كەيىن كەشە ءوزىڭدى وقىت­قان, ال بۇگىن بالاڭىزدىڭ, نەمەرە­لەرى­ڭىز­دىڭ بويىنا ءبىلىم ءنارىن قۇيىپ ءجۇر­گەن ۇستازداردىڭ توزىمدىلىگىنە, سابىر­لىعى مەن شىدامدىلىعىنا قايران قالماي كورىڭىز. ارينە, ءبىلىم بەرۋ جۇيەسىنىڭ تابىستى جۇمىس ىستەۋى ساپالى زاماناۋي ينفراقۇرىلىمعا بايلانىستى. جاقىندا عانا وبلىس ورتالىعىندا وتكەن تامىز كەڭەسىندە كوپتەگەن ماسەلەلەر ايتىلىپ, ءبىراز نارسەگە قانىقتىق. ەلىمىزدە جاڭا ءبىلىم نىساندارىن سوعۋ بويىنشا قىرۋار جۇمىستار اتقارىلىپ كەلەدى. مەملەكەت باسشىسىنىڭ كەزەكتى جولداۋىنا سايكەس 2016 جىلدىڭ 1 قاڭتارىنان ءبىلىم قىزمەتكەرلەرىنىڭ جالاقىسى 29 پايىزعا, شاكىرتاقىنىڭ ورتاشا العاندا 30 پايىزعا ءوسۋى دە – وسى سالاعا دەگەن ۇلكەن الەۋمەتتىك قولداۋ بولدى. ولاي بولسا, ەل يگىلىگى ءۇشىن ايانباي ەڭبەك ەتۋ – بارشامىزدىڭ نەگىزگى مىندەتىمىز. ەلىمىزدە تاۋەلسىزدىك تۋى جەلبىرەگەلى بەرى جامبىل وبلىسىندا 92 جاڭا ءبىلىم نىساندارى ىسكە قوسىلىپتى. ونىڭ ىشىندە 71 مەكتەپ, 20 بالاباقشا, 1 كوللەدج پايدالانۋعا بەرىلىپتى. وسىنىڭ ارقاسىندا 46 توزىعى جەتكەن, 8 ءۇش اۋىسىمدى, 10 ورىن تاپشىلىعى بار, 7 ىڭعايلاستىرىلعان عيمارات­تا ورنالاسقان مەكتەپتەر ماسەلەسى شەشىلگەن. ءبىلىم مەكەمەلەرىنىڭ ماتە­ريالدىق-تەحنيكالىق بازاسىن ارتتىرۋعا, جوندەۋ جۇمىستارىنا, وقۋلىقتارمەن قامتاماسىز ەتۋگە بولىنەتىن قارجى كولەمى جىل سايىن ۇلعايىپ كەلەدى. وسى جاسالعان جاعدايلاردىڭ ءبارى – ەلباسىنىڭ ءبىلىم سالاسىنا, ەل بولاشاعىنا جاساپ وتىرعان ۇلكەن قولداۋى, قامقورلىعى. ەندىگى مىندەت – وزىمىزگە جۇك­تەلگەن جاۋاپكەرشىلىگى مول جۇمىستى ابىرويمەن ورىنداۋ! وبلىس ۇستازدارى جاڭا وقۋ جىلىندا ءبىلىمدى ۇرپاق, تاربيەلى شاكىرت, سانالى ازامات تاربيەلەپ شىعارۋعا بار كۇش-جىگەرىن جۇم­ساي­دى دەپ سەنەمىن. گۇلشات اسانوۆا, №26 جاڭاتالاپ ورتا مەكتەبىنىڭ مۇعالىمى جامبىل وبلىسى, جۋالى اۋدانى