پارومعا ۇيا سالعان قارلىعاشتار

كۇرشىمگە جولى تۇسكەن جان بۇقتىرما ايدىنىنا كەلگەندە پارومعا وتىرادى. قوس جاعالاۋداعى قاتىناستى سوڭعى جىلدارى كۇردەلى جوندەۋدەن وتكەن «كۇرشىم» مەن «ەرتىس» پارومدارى جالعاپ تۇر. ءبىر پارومعا 70-كە جۋىق كولىك سىيا­دى. 200 تونناعا دەيىن جۇك كوتەرە الاتىن پاروم پالۋباسى ءبىر ءسات بوساعان ەمەس. كۇرشىم مەن قالجىر اراسىنداعى جول ورتاشا جوندەۋدەن وتكەلى بەرى زايسان جاعىنان دا قاتىناۋشىلار قاتارى ارتتى. پاروم ارقىلى ءوتىپ جۇرگەن زايساندىقتار جولدىڭ بۇل باعىتى ءبىرشاما قىسقا ءارى قولايلى ەكەنىن ايتادى. كولىكتەردى تولتىرا تيەپ العان سوڭ پارومدار زاكىردى كوتەرىپ, كوكشۋلان سۋدى قاق جارا جۇزە باس­تايدى. جولاۋشىلار دا كولىك­تەرىنەن شىعىپ, ايدىندى تاماشالايدى, پارومنىڭ ەكىنشى قاباتىنا كوتەرىلىپ, ءدامحانادان شاي ىشەدى, تەلەفوندارىنا سۋرەتكە تۇسەدى. مىنە, وسى ساتتە كۇللى جولاۋشىلاردىڭ نازارى پارومدى جاعالاي ۇشقان قارلىعاشتارعا اۋادى. ەندى ءبىر ساتتە قۇستاردىڭ پارومداعى ۇيا­لارىن دا بايقايسىز. اۋزىن اشا شۇپىرلەگەن بالاپاندارعا ازىق تاسىعان قارلىعاشتار ءبىر ءسات تە تولاستامايدى. وسى ءبىر سۋ كولىگىنە جىلىلىق سىيلاعان قارلىعاشتار پارومعا جىلدا ۇيا سالادى ەكەن. ون بەس جىلعا جۋىق ۋاقىت بويى قىزىلتۋ وتكەلىنىڭ مەڭگەرۋشىسى بولىپ ەڭبەك ەتىپ كەلە جاتقان باقىتبەك نۇرپەيىسوۆ قارلىعاشتارعا پاروم جولاۋشىلارىنىڭ ەشقايسىسى تيمەيتىنىن, كەرىسىنشە, قۇستارعا قىزىعا قاراپ, قولدا بار ازىعىن شاشۋعا تىرىساتىنىن ايتادى. – مەن پارومدا 2004 جىلدان بەرى جۇمىس ىستەيمىن. قارلىعاشتار سول كەزدە دە ءبىردى-ەكىلى ۇيا سالاتىن. قازىر ءار پارومدا ون شاقتى ۇيادان بار. ياعني, ەكى پارومدا جيىرماعا جۋىق ۇيا بار. ءبىزدىڭ قارلىعاشتارعا باۋىر باسىپ قالعانىمىز سونشالىق, جىلى جاققا كەتكەن سوڭ كەمەمىزدەگى قۇستار بازارىنىڭ تارقاعانىنا بىرازعا دەيىن ۇيرەنە الماي جۇرەمىز, – دەيدى باقىتبەك نۇرپەيىسوۆ. راسىندا, پارومعا وتىرعان سايىن اسەم دە ايدىك ايدىنمەن بىرگە سۋسىلداعان قاناتىمەن ساتكە تىنىم تاپپايتىن قارلىعاشقا قاراپ كوڭىلىڭىز كوتەرىلەدى. دۋمان اناش, «ەگەمەن قازاقستان» شىعىس قازاقستان وبلىسى, كۇرشىم اۋدانى سۋرەتتەردى تۇسىرگەن الەكسەي مازنيتسين