ۇلتتىق برەند جەڭىمپازىنا – 5 ملن تەڭگە

قانداي دا ءبىر ەلدىڭ الەمگە ايگىلى برەندتەرى سول ەلدىڭ تۋريستىك تارتىمدىلىعىن جانە ينۆەستيتسيالىق تارتىمدىلىعىن ارتتىراتىنى, وندىرەتىن تاۋارلارىنىڭ تانىمال ءھام سەنىمدى بولۋىنا ىقپال ەتەتىنى بەلگىلى. ءتىپتى, برەندينگ مەملەكەتتىڭ حالىقارالىق ارەناداعى بەدەلىنە دە اسەر ەتە الادى. وسى ماسەلەگە وراي, ەلىمىزدە العاش رەت «قازاقستان رەسپۋبليكاسىنىڭ ۇلتتىق برەندىن» انىقتاۋ جونىندەگى رەسپۋبليكالىق بايقاۋ وتپەك. بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ ءوزىنىڭ فەيسبۋكتەگى پاراقشاسىندا حابارلادى. – ساپالى ەلدىك برەندينگكە قاشاندا سول مەملەكەتتىڭ شىنايى جەتىستىكتەرى نەگىز بولماق. بۇل دەگەنىمىز حالىقتىڭ ءبىلىم دەڭگەيى, ينفراقۇرىلىمدى دامىتۋ كورسەتكىشى, سىبايلاس جەمقورلىقپەن كۇرەستەگى تيىمدىلىگى, سپورتتاعى جانە باسقا دا جەتىستىكتەرى. سونىمەن قاتار, ەلدىڭ ءيميدجىن ساۋاتتى تۇردە ىلگەرىلەتۋ ءۇشىن ونىمەن بايلانىستى وبرازدار, يدەيالار مەن اسسوتسياتسيالار كرەاتيۆتى, قايتالانباس ءارى جادىڭدا جاتتالىپ قالاتىن سيمۆوليكامەن بىتە قايناسۋى كەرەك. وسىنداي ىرگەلى ءىستى ءبىزدىڭ ەلىمىز دە قولعا الۋدا. اتاپ ايتقاندا, بۇگىن قازاقستاننىڭ ۇلتتىق برەندىن انىقتاۋ جونىندەگى كونكۋرس باستالادى, – دەدى مينيستر. ءمينيستردىڭ ايتۋىنشا, برەندتى انىقتايتىن بايقاۋعا ۇسىنىلعان جۇمىستار مينيسترلىك سايتىندا ءبىر ايعا دەيىن قابىلدانادى. http://mic.gov.kz/kk/competition سايتىندا بايقاۋدىڭ ەرەجەسى تولىعىراق كورسەتىلگەن. قىسقاشا ايتىپ وتەر بولساق, وتىنىشپەن بىرگە لوگوتيپ, ۇران, ەركىن فورمادا جازىلعان جانە جۇمىستىڭ ءمانى مەن مازمۇنىن اشىپ كورسەتەتىن قىسقاشا تۇجىرىمداما جولدانۋى ءتيىس. ءمينيستردىڭ ايتۋىنشا, بايقاۋ ەكى كەزەڭنەن تۇرادى. ءبىرىنشى كەزەڭنىڭ جەڭىمپازدارى ينتەرنەتتە داۋىس بەرۋ ارقىلى انىقتالماق. مينيسترلىك سايتىندا كورسەتىلگەن ءتۇرلى برەندتەرگە داۋىس بەرگەن ينتەرنەت قولدانۋشىلار 15 كۇن ىشىندە ۇزدىك دەگەن جۇمىستاردى تاڭدايدى. ىرىكتەلىپ شىققان جۇمىستار ەكىنشى كەزەڭدە تانىمال قوعام جانە ساياسي قايراتكەرلەردەن, مادەنيەت پەن ونەر مايتالماندارىنان جاساقتالعان ساراپشىلىق كەڭەسكە ۇسىنىلادى. كەڭەس قۇرامىندا حالىقارالىق ساراپشىلار دا بار ەكەنىن ايتا كەتۋ كەرەك. اقپارات جانە كوممۋنيكاتسيالار مينيسترلىگىمەن قاتار, سىرتقى ىستەر مينيسترلىگى قۇرىلتايشى بولعان بايقاۋدىڭ جەڭىمپازىنا 5 000 000 تەڭگە كولەمىندە قارجىلاي سىياقى بەرىلەدى. ارنۇر اسقاروۆ, «ەگەمەن قازاقستان»