ەلباسى حورەوگرافيا اكادەمياسىنىڭ اشىلۋ راسىمىنە قاتىستى

مەملەكەت باسشىسى قازاق ۇلتتىق حورەوگرافيا اكادەمياسىنىڭ اشىلۋ راسىمىنە قاتىستى. بۇل تۋرالى akorda.kz حابارلادى. ءراسىمدى اشقان نۇرسۇلتان نازارباەۆ قازاقستاندىقتاردى ەلوردادا جاڭا جوعارى وقۋ ورنىنىڭ بوي كوتەرۋىمەن قۇتتىقتادى. «بۇگىن ءبىز استانادا جاڭا ونەر ورداسىن سالتاناتتى تۇردە اشىپ وتىرمىز. بۇل جەردە ۇلتتىق بالەت پەن بي شەبەرلەرىنىڭ جاڭا شوعىرى وقىپ-تاربيەلەنەدى. مۇندا قازاقستاندىق سالت-ءداستۇر دامىپ, الەمدىك دەڭگەيدەگى بي ونەرىن دامىتۋعا جاڭاشا قادامدار جاسالاتىن بولادى. ۇلتتىق حورەوگرافيا اكادەمياسى – ءبىزدىڭ ەلىمىزدە عانا ەمەس, بۇكىل ورتالىق ازيا ەلدەرىندەگى وسى ۇلگىدەگى العاشقى جوعارى وقۋ ورنى. وندا قازاقستاندىقتارمەن بىرگە وزگە شەت ەلدەردىڭ شىعارماشىل دارىندى جاستارى وقيتىن بولادى. ەلىمىزدەگى بۇل اكادەميا ۋاقىت وتە كەلە بۇكىل ەۋرازياداعى بالەت پەن بي شەبەرلەرىن دايىندايتىن جەتەكشى ورتالىقتاردىڭ ءبىرى بولاتىنىنا سەنەمىن», – دەدى قازاقستان پرەزيدەنتى. مەملەكەت باسشىسى اكادەمياداعى وقۋ ءىسى بي مەن بالەت ونەرىنىڭ نەگىزدەرىنەن باستاپ جوعارى وقۋ ورنىنان كەيىنگى ماگيسترلەر مەن دوكتورانتتاردى دايىنداۋعا دەيىنگى ءبىلىم بەرۋ ءۇردىسىنىڭ بارلىق دەڭگەيىن قامتيتىنىن اتاپ ءوتتى. «بۇل كوپ دەڭگەيلى كاسىبي حورەوگرافيالىق ءبىلىم بەرەتىن تولىق تسيكلدى اكادەميانىڭ ماڭىزدىلىعى مەن بىرەگەيلىگىن ەسكەرە وتىرىپ, وعان مەنىڭ جارلىعىممەن «ۇلتتىق جوعارى وقۋ ورنى» ايرىقشا مارتەبەسى بەرىلدى. سىزدەر وسى جاڭا ونەر ورداسىندا جوعارى حالىقارالىق ولشەم مەن ءبىلىم بەرۋدىڭ وتاندىق قايتالانباس ستاندارتىن قالىپتاستىرۋعا تيىسسىزدەر. سىزدەر قازاقستاننىڭ بي مەن بالەت ونەرىنىڭ جاڭا ۇلتتىق برەندىن ورنىقتىرادى دەپ سەنەمىن», – دەدى نۇرسۇلتان نازارباەۆ. سونداي-اق, قازاقستان پرەزيدەنتى وقۋ ورنىنىڭ بيۋدجەتتەن تىس قاراجات كوزدەرىنە سالىنعانىن ايتىپ, ساۋلەتشىلەر مەن قۇرىلىسشىلارعا اتقارعان جۇمىستارى مەن شىعارماشىلىق ەڭبەكتەرى ءۇشىن العىس ءبىلدىردى. ءراسىم بارىسىندا نۇرسۇلتان نازارباەۆ اكادەميا رەكتورى ا.اسىلمۇراتوۆاعا بالەرينانىڭ شاعىن ءمۇسىنىن تابىس ەتتى. «بۇل ءمۇسىندى تۇلەكتەر جىل سايىن ءبىرىنشى سىنىپ وقۋشىلارىنا تابىستايدى, ول بالەت ارتىستەرىنىڭ كاسىبي دەڭگەيىنىڭ ءوسۋىنىڭ جالعاستىعى مەن اكادەميانىڭ داستۇرلەر ساباقتاستىعىنىڭ سيمۆولى بولادى», – دەدى ەلباسى. قازاقستان پرەزيدەنتى اكادەميانىڭ قۇرمەتتى قوناقتار كىتابىنا قولتاڭبا جانە «ۋاقىت كاپسۋلاسىنا» ەستەلىك جازبا قالدىردى. بۇدان بولەك, ەلباسى بالەت زالىن, جاتاقحانانى, اسحانا مەن ءبىرىنشى سىنىپ وقۋشىلارىنا ارنالعان وقۋ سىنىپتارىن ارالاپ كوردى. نۇرسۇلتان نازارباەۆ سالتاناتتىڭ قورىتىندىسى بويىنشا وتكەن بريفينگ بارىسىندا بارشا قازاقستاندىقتاردى كەلە جاتقان ءبىلىم كۇنىمەن قۇتتىقتاپ, وقۋشىلارعا, اتا-انالار مەن مۇعالىمدەرگە تابىس پەن مىقتى دەنساۋلىق تىلەدى. ايدار ورىسباەۆ